[ سلسلة السفــر / إيــطــاليــا: فلورنس - بيزا - كومو - بيلاجيو ]

السلام عليكم ورحمة الله وبركاته 

يسعد صباحكم أو مساكم وين ماكنتوا 

البوست الثالث وقبل الأخير في مدن السفر - تغطية فلورنس وبيزا، وليك كومو وبيلاجيو. 

سلسلة السفر بالترتيب: 

١. [ المواقع والأبلكيشنات اللي استخدمها للتخطيط قبل وأثناء السفر ]
[ HERE | هنا ]

٢. [ اليونـــان: أثينــا وسانتورينــي ]
[ HERE | هنا ]

٣. [ رومـــا والريــف الإيـطـالـي / تـوسـكـانـي ]

[ Here | هنا ]

[ فـلـورنـس ]

بعد التغذية البصرية في توسكاني، رحنا فلورنس

السكن: شقة 

الوصول: ١٤ سبتمبر الضحى

الخطوط: قطار داخلي من محطة توسكاني سان إليرو إلى محطة كامبو دي مارتي فلورنس – نص ساعة، قطار داخل إلى ومن بيزا

التنقلات: مشي، باصات عمومية، قطار

الأيام: يوم الوصول + يومين كاملين

المخطط والهدف من الزيارة: تمشي، تسوق، تصوير، وزيارة بيزا

مختصر فــلــورنــس: 

مناسبة للتمشي والتصوير والتسوق، خصوصاً المنتوجات الجلدية منتشرة بكثرة

الوقت: المنطقة الوحيدة اللي حسيت وقتنا فيها أبداً ماكان كافي.. تحتاج على الأقل 4 إلى 5 أيام، أجوائها حلوة للتمشي وحتى ساحاتها جميلة... مريحة ولطيفة بشكل عام

السكن: الشقة كانت جميلة وحديثة وواسعة حتى فيها مطبخ كبيرة، الأثاث مع إنه بسيط بس كله خشبي عاطي الشقة مظهر مودرن لطيف والمنطقة نفسها حلوة، العيب الوحيد إن أصوات الشارع كانت عندنا، خصوصاص إن الجو حلو ماحتجنا تكييف فطول الليل كنا نسمع اصوات الناس برا، وكان في رحة مجاري شوي عند المصعد

الأكل: كافيه الريوق كان من أحلى أماكن الريوق بالسفرة كلها، باقي المطاعم كانت عادية بالشارع وماصار عندنا وقت نركز على تجربة مطاعم أكثر.

المواصلات والتنقل: الباص جداً عملي ووقفاته بكل مكان، التاكسي بس موجود عند الطلب واستخدمناه بس للتنقل من وإلى محطة القطار.

المحلات والتسوق: فها وايد محلات جلدية ومحلات تذكارات، وفيها فروع للماركات العالمية قريب الدومو، قوتشي، ماكسمارا، ميوميو وغيرهم 

اللغة والتواصل والشعب: اللي تعاملنا معاهم بالفندق والشقة كانت انجليزيتهم ممتازة إلى جيدة جداً أغلبهم ولطيفين.

الأجواء العامة: الأجواء كانت جميلة جداً، بدون مطر والجو معتدل والغيوم كانت مناسبة جداً للتصوير.

الأمان: بشكل عام حسيتها آمنة، يمكن ماعدا الأماكن المزحومة كالعادة الحذر واجب وضروري.

[ فلورنس – اليوم الأول ]

وصلنا فلورنس الضحى وحجزنا بالشقة الجيك إن ٣ الظهر بس الشقة تابعة لمجموعة فندقية فعطونا اسم فندق نحط فيه أغراضنا، الفندق كان قريب المركز والساحة القريبة من الكنيسة الكبيرة، طلعنا نتمشى وقررنا نشوف وين بريمارك دام عندنا كم ساعة ماعندي لهم برنامج محدد، لما سويت سيرج في قوقل مابس طلع غنه مو بمركز المدينة صاير بمجمع بمنطقة سكنية ويحتاج ساعة وربع تقريباً بالباص العمومي وتبديل مرة وحدة فقلنا يالله ماعليه، أول باص كان من وحدة من الساحة وبسرعة لقيناه، أخذنا تذكرة من الجهاز اللي بالشارع ووقفنا بعد أقل من ١٠ دقايق عند الوقفة اللي المفروض ناخذ منها القطار الثاني اللي بياخذ تقريباً ساعة وبعدها نمشي كم دقيقة للمجمع...

وصلنا الوقفة.. ننتظر وننتظر وننتظر، احنا واقفين بالمحطة الصح بس مافي باص مع ان وقته حسب قوقل مابس مع وقت وصولنا :/ بس مافي! مشينا لبداية الشارع واللفة مافي وقفة ثانية.. انتظرنا أكثر من ساعة وشي اخر شي استسلمنا ههههه أخذنا الباص للمنطقة القريبة من المركز مرة ثانية ونزلنا نتجول ونستكشف الشوارع، وندور مكان أكل..

شفنا مطعم صغيرون في واحد من الشوارع اللطيفة وكان كله ناس ايطاليين ياكلون فحسيناه لذيذ ودخلنا ناكل.. طبعاً طلبت بيتزا! وكانت

لذيذة، بعدها رجعنا الفندق أخذنا شنطنا وطلبنا تاكسي، 

التكاسي بإيطاليا طريقتهم منظمة أكثر بس تحتاج تعود ـ التكاسي ماتوقف بالشارع حتى لو فاضية ومنطقة سياحية، لهم أماكن وقفات محددة بالساحات وبالترتيب، أو بالاتصال أو الطلب، الفندق طلبوا لنا بالغلط اول تاكسي صغير ماكفى شنطنا فاضطر يمشي ويتصلون لنا بفان، وصلنا الشقة اخذنا تقريباً ربع ساعة، المنطقة مو بالسنتر بس كانت حيوية بعد، فيها كم مطعم ومحطة باص أقل من خمس دقايق مشي.. حطينا أغراضنا وأمي وأختي بغوا يرتاحون أما أنا قررت أطلع أتمشى وألحق على الوقت الباقي من العصر بالتصوير، فأخذت كاميرتي وطلعت أتمشى لمنطقة الجسور..

فلورنس مشهورة بنهر آرنو وبجسوره، الجو كان حلوو فقررت إني أمشي على قوقل مابس، أخذت تقريباً أربعين دقيقة من شقتنا لين وصلت لشارع الجسور.. شارع طويل بمحاذاة نهر فلورنس وقريب للساحات الرئيسية وبين كل كم مئة متر يوصل بين جانبينه جسر، مشيت بمحاذاة هالجسور.. من حظي هاليوم إن الغيم كان جميييل والجو ككل صافي والماي هادي.. فالصور بمجهود بسيط طلعت جميلة كأنها لوحة 

وبعد حبيت إن كل ما أمشي مسافة وأوصل لجسر ثاني يتغير المنظر، أول جسر مريت منه بوحدة من الجهات كان منظر الشجر والعشب وجبال توسكاني تبان من بعيد

من الجهة الثانية، من صوري المفضلة لهالمنطقة، تبين اجزاء من معالم فلورنس الشهيرة، مثل قبب الكنائس المشهورة اللي في ساحاتها، والغيمة كان مكانها صح مع المباني

وبين كل كم دقيقة، يمر قارب بمجاديف.. بعد مامريت على ثلاث جسور يمكن؟ ومن كل جسر التقطت صور من زوايا مختلفة قدر الامكان حاولت أطلع جمال المحيط، الغيوم، جوانب الطريق، القوارب، سطح الماي، المباني، وغيرهم…

لين وصلت جسر بونتي فيكيوو.. أشهر جسور فلورنس، قريب من ساحة ديلا ريبابليكا

جسر فيكيوو الحجري موجود من القرون الوسطى، وحتى سنة ١٢١٨ كان هو الجسر الوحيد على نهر آرنو اللي يربط جانبين الجسر من أضيق نقطة في النهر، تمت إعادة بناءه بعد الفيضان اللي صار سنة ١٣٤٥ وخلال الحرب العالمية الثانية (١٩٣٩-١٩٤٥)، جسر آرنو كان الجسر الوحيد اللي مادمروه الجنود الألمان الهاربين بس دمروا المباني اللي على جانبينه، وفي سنة ١٩٦٦ في الثاني من نوفمبر، صمد الجسر قدام فيضان نهر آرنو بدون مايتدمر.

هالجسر كان ومازال مشهور بوجود المحلات في وسطه، فوق النهر، خلال العصور ومن القرن ١٣ انتشرت المحلات المختلفة في الجسر، خصوصاً محلات الجزارين وبياعين الاسماك بس بعدها صار مسموح بس لمحلات الذهب والمجوهرات، حالياً المحلات على الجسر كلها محلات ذهب إيطالي وتذكارات ومحات قطع فنية وبكل محل في دريشة صغيرة مباشرة تطل على النهر، الجسر ككل مو كبير، والمنطقة مزحومة بس شكله حلو وومميز والوصول له مايضيع فيستاهل الزيارة والمرور وتصوير كم صورة مع أقواسه السفلية وطابع البناء من القرون الوسطى اللي للحين محتفظ فيه.. ذكرني بمباني بروج الجميلة، تميت عنده لحد وقت الغروب.. ومع الغيوم الجميلة بذاك اليوم.. المنظر كان جميل جداً

بعد ماصار ظلام، رجعت الشقة بعد مشي، وفي طريق رجعتي مريت على باسيلكا/كنيسة سانتا كروز من برا، هالكنيسة مدفون فيها اشهر الفنانين اإيطاليين ومنهم مايكل آنجلو، غاليليو، فوسكولو، روسيني وماركوني وغيرهم.

بعدها رجعت لأمي واختي وطلعنا تعشينا بمطعم من الشوارع المحيطة فينا… طبعاً طلبت بيتزا بس يومها غيرت واخذت فور جيزز

[ فلورنس – اليوم الثاني ]

هذا اليوم خلينا نصه لزيارة بيزا والبرج المايل المشهور، بيزا مدينة في توسكاني وقريبة من فلورنس، بالقطار حوالي ساعة والتذكرة تقريباً ثمانية يورو للون وي. 

أول ماوصلنا بيزا قررنا نمشي من محطة القطار لين المنطقة اللي فيها البرج عشان نتعرف على المدينة ككل مو بس البرج، أول شي قعدنا بكافيه عند المحطة وتريقنا ريوق خفيف وقهوة وبعدها إنطلقنا مع قوقل مابس والمشي كان حول ٣٠ دقيقة

على الطريق مرينا على جسر والمنظر منه كان جمييييل.. بيزا معروفة بالبرج بس مع إن فيها مناظر حلوة مثل هالجسر مثلاً:

الجسر كان قريب للبرج، وصلناه بعد تقريباً حول خمس دقايق والمنطقة بينهم أغلبها كافيهات ومحلات، طبعاً أكثر منطقة مزحومة هي منطقة البرج، بس البرج جميل ويستحق الزيارة...

برج بيزا المايل هو برج الجسر التابع لكاتدرائية بيزا، إنشهر بسبب ميلانه، البرج كان مبني كأي برج عادي عمودي ولكنه إبتدى يميل بعد فترة قصيرة من بنائه اللي طلع من أول مراحل البناء بس إستمر البناء على الميلان، وهذا اللي خلاه من أشهر الأبراج في العالم! إستغرق بناءه ١٩٩ سنة!! يعني تقريباً قرنين من الزمن... بدأ سنة ١١٧٣ ميلادي، البرج جميل أبيض ومبني من الرخام بشكل كامل ومكون من ثمان طوابق، يرتفع ٥٦ متر عن سطح الأرض والوصول لأعلى نقطة بركوب ٢٩٤ درجة أو المصعد الكهربائي، ماركبنا داخل واكتفينا بالمنظر من برا.. الصف كان طويل غير إن المنظر من فوق بيكون بس للمدينة من فوق.

بعد ماقضينا وقت كافي عند البرج واشترينا تذكارات رجعنا مشينا لمحظة القطار وفي طريقنا شفنا بازار أو اللي يسمونه Thrift Shop بياعين عارضين أشياء مختلفة للبيت، اكسسوارات، لوحات، تحف، ملابس، منحوتات، وغيرهم.. بعضها جديدة وبعضها قديمة وكان المكان حلوو كأنه سوق شعبي.. حصلت فيه أكواب إسبريسو/قهوة تركية تجنن!

بعدها أخذنا القطار لفلورنس، ورحنا ساحة الدومو الشهيرة، ساحة الدومو اللي فيها كاتدرائية فلورنس الكبيرة، سانتا ماريا ديل فيورا، مازلت منبهررة من كمية التفااااصيل الدقيقة في بناء هالكنيسة! حتى الآن هذي أعتبرها أجمل مبنى كنيسة شفته من ناحية دقة التفاصيل.. والحجم.. ضخمة ضخمة ضــخمـــة!!!

بناءها يعتبر من أكبر مباني العالم، فيه أكثر من ٤ ملايين قطعة حجر/طابوق بوزن أكثر من ٤٠ ألف طن والحجم الكلي يعادل حجم نص ملعب كرة قدم! أما القبة فانتركت للأخير،

هالكاتدرائية استغرقت أكثر من ١٤٠ سنة لبناءها، بدأ التخطيط ورسم الخرائط لبناءها قبل عصر النهضة، سنة ١٢٩٣م، المخطوطات والخرايط الأولية احتوت على القبة رغم إن بهذيك الفترة ماكانت متوفرة الامكانيات والتطور لبناء هالنوع القببي في المباني، عشان هالسبب استغرق البناء أكثر من ١٤٠ سنة عشان يكتمل، كانت أكثر من ١٠٠ سنة مرت على بدء بناء الكنيسة بدون أي حل أو طريقة لبناء القبة الموجودة في التصميم الأولي وكبر حجم المبنى عن اللي كان مخطط له وبقاءه بدون القبة، مع هذا أهل فلرونس كانوا مصممين إنهم يبنون شي مميز عن باقي المدن المحيطة فبقت الجزئية المتعلقة بالقبة مؤجلة.

بعدها، تمت إقامة مسابقة ومنافسة للعامة للمشاركة بإقتراحات وطريقة لبناء القبة، الحل وقتها كان إستخدام دعامة خشبية للبناء بس كان مُستبعد بسبب إنه كان راح يكلف استخدام وقطع ٤٠٠ شجرة، من بين المتقدمين للمسابقة كان فيليبو برونيلسي، اللي قدم فكرة تتنفذ بدون استخدام الخشب... واستخدم (بيضة) لتوصيل فكرته.. وفاز!

إنولد فيليبو برونيليسي بعد أكثر من ٨٠ سنة من البدء في بناء سانتا ماريا، وكان صائغ ذهب وقبل القبة، مابنى شي بحياته! قضى سنوات من حياته في دراسة فن المعمار الروماني في روما قبل مايرجع لفلورنس.. مكان ولادته ومكان كنيسة سانتا ماريا اللي اشترك في بالمسابقة وفاز.

أثناء المسابقة، ماكشف برونليسي عن خططه لبناء الكنيسة، أثار انتباه الحكام وبالتالي فاز بالجائزة بحيلة البيضة، طلع البيضة وطلب من كل واحد من الموجودين يحاول بوقف البيضة بدون ماتتحرك وبدون ماتنكسر، طبعاً محد قدر ينفذها، إلا هو.. مسك البيضة بشكل عمودي وضرب الجزء الأسفل منها بحافة الطاولة.. النتيجة إنهاإنكسرت من تحت وثبتت واقفة على الطاولة، مع هذا حتى بعد ما أقنع الحكام بفوزه ما كشف مخططاته اللي راح يستخدمها للبناء –اللي أساساً كان أول تجربه له ومبني على افتراضات- وبدأ البناء سنة ١٤٢٠م مع فريقه اللي كان من ضمنهم منافسه اللي هزمه في تصميم الأبواب البرونزية لنفس الكاتدرائية قبل كم سنة: غيبرتي. بعد ماكتمل البناء في القرن الخامس عشر كانت أكبر كاتدرائية في أوروبا، حالياً هي الثالثة عالمياً، بعد بعد كاتدرائية سانت بيتر في روما (الفاتيكان) وكاتدرائية سان بول في لندن، استغرت بناء القبة واكتماله ١٦ سنة بس، تعتبر سرعة قياسية جداً، وحتى اليوم.. تبقى القبة هذي أكبر قبة مبنية في العالم.

بعد ماعرفت تاريخها والتحديات اللي مرت فيها.. أغرمت فيها أكثر! فعلاً تحفة معمارية.

بعدها رجعنا لشارع الجسور مرة ثانية عشان أمي وأختي.

تفاصيل وأبواب من فلورنس وبيزا:

[ فلورنس – اليوم الثالث ]

اليوم هذا يوم مغادرتنا، طلعنا من الصبح وحطينا شنطنا في محطة القطار وطلعنا نتجول في الشوارع المحيطة فيها وتريقنا بكافيه فطورر مشهور في فلورنس.. حيوي وما يهدأ! الكافيه نفسه يبيع ورد وشوكولاته والورد بكل مكان.. جداً جميل ومريح وأكلهم وقهوتهم لذيييذة أنا طلبت قهوة وبانكيك فواكه وأختي أومليت، وأمي غرانولا كانت عندهم قعدة داخلية بسقف زجاجي والغرفة فيها بيانو.. للأسف ماشفناها إلا لما كنا بنطلع.

[ بـحـيـرة كـومـو / لـيـك كـومـو وبـيـلاجـيـو ]

السكن: شقة من Airbnb

الوصول: ٥ ونص عصراً

الخطوط: رحلة قطار من فلورنس إلى ميلان (ساعتين) وبعدها من ميلان إلى فارينا (ساعة)

التنقلات: مشي، تاكسي محلي

الأيام: يوم الوصول + يومين كاملين

المخطط والهدف من الزيارة: تمشي، استرخاء، تغذية بصرية وتصوير

مختصر لــيــك كــومــو: 

مناسبة للتمشي والتمتع بالمناظر الجميلة الجبلية والهدوء والاسترخاء.. مثالية للتصوير

الوقت: يومين كاملين كانوا كافيين تماماً

السكن: الشقة كانت جميلة وإطلالتها تجنن وفيها كل شي ضروري وحتى فيها ضيافة سناكات خفيفة. موقعها بمنطقة مرتفعة بنص الجبل تقريباً والنزول للمركز تحت يحتاج حوالي ٤٠ ساعة مشي أو أقل من عشر دقايق تاكسي، في وقفات باص بس ماعرفنا لهم.

الأكل: أخذنا أكل من السوبرماركات للشقة، الغدا في بيلاجيو جيد جداً والقهوة ممتازة، كافيه محطة فارينا جيد.

المواصلات والتنقل: المشي، التكاسي المحلي (لازم بالاتصال) الباخرة للرحلة القسيرة بين الجزر، والقطار للوصول والمغادرة

المحلات والتسوق: سوق محدود، أكثر شي تذكارات وبعض الأشياء اليدوية في بيلاجيو

اللغة والتواصل والشعب: اللي تعاملنا معاهم بالتاكسي للشقة والكافيهات كانت انجليزيتهم ممتازة إلى جيدة جداً أغلبهم

الأجواء العامة: الأجواء كانت جميلة جداً، بدون مطر والجو معتدل والغيوم كانت مناسبة جداً للتصوير.

الأمان: بشكل عام آمنة.

هدفنا من زيارة ليك كومو كان الاسترخاء مرة ثانية بعيد عن صخب المدن وشم هوا وف نفس الوقت الاستمتاع بمناظر جديدة علينا، جبال وبحيرات.. فاخترت شقة من اير بي ان ب مع فيو.. والفيو كان شي خياالي من الغرف.. مباشرة على البحيرة والجبال..

أول يوم وصلنا تعابة من القطار فبس رحنا السوبرماركت اشترينا اغراض، الشقة بدون أكل.. واستمتعنا بالمنظر من فوق.

[ كومو اليوم الأول ]

طلعنا وماكنا عارفين نظام الباصات فقلنا بنمشي، حسب ماقال لنا صاحب الشقة إن المشوار ياخذ ثلث ساعة.. طلع ياخذ ساعة إلا ربع على الاقل، مع ان المشية متعبة بس بصراحة المناظر تسوووى.. سكنا كان في نقطة مرتفعة وعشان ننزل للمنطقة الحيوية لازم ننزل، المناظر كانت خرافية!! جمال مو طبيعي.. والجو كان مغيم ومنظر الجبل جدامنا كان جنه الغيم تقطع قمته.

وسبحان الله كل أنواع الأشجار والنباتات والورود نامية على طول الطريق بطريقة عشوائية ومتداخلة وبدون تدخل يد البشر... حتى درايش البيوت وبلكوناتها ومداخلها مزينة بالنباتات، السكان بصراحة محظوظين بمناظر تسر العييين!! جمال خلاب

ومرينا على مقبرة استوقفتنا.. جدامها كانت مساحة صغيرة بني اشجار وفيها تذكارات صغيرة وكلها بتواريخ محددة... قلت يمكن ضحايا حادث محدد؟ قلت بسوي سيرج عنها وبكتشف...

وصلنا تحت قريب الغدا واخترنا مطعم يطل على مجرى ماي يطلع على البحيرة، يومها مرضت وضربتني انفلونزا فوقت الأكل كنت خلااص بديت أدوخ، 

بعد الغدا تمشينا تحت قريب البحيرة وعند الميناء المصغر اللي توقف فيه القوارب

وبعدها اخذنا تاكسي للشقة.. خذت مسكن وكولد & فلو عشان أستعيد طاقتي لبكرا.. واستمتعنا بالغروب وبباقي اليوم من شقتنا بعد ماشربنا كوفي من كافيه صغير قريب لشقتنا دلتنا عليه صاحبة التاكسي – اللي هي أساساً ساكنة بنفس بنايتنا.

[ كومو اليوم الثاني ]

اليوم هذا خليناه لرحلة بيلاجيو، بحيرة كومو كبيرة جداً وكومو وحدة من مناطق الي سميت البحيرة باسمها وغيرها مناطق وايد يطلون على البحيرة، وبواحد منهم الممثل المشهور جورج كلوني عنده بيت هناك، ومن هالمناطق منطقة إسينو، فارينا، بيرليدو اللي سكنا فيها، بيلاجيو وغيرهم...

منطقة بيلاجيو من أهم المناطق للزيارة وتعتبر من أحلى المناطق على البحيرة للتصوير، وفيها بعد نقاط تاريخية للزيارة، من بيرليدو إلى بيلاجيو ربع ساعة بالباخرة والتذكرة بحوالي ٤ يورو.

رحلة الباخرة بروحها شي جميل وتبين القرى من بعيد بمنظر أقرب للكرتون واللوحات!

أما بيلاجيو، اللي وصلناها بعد ربع ساعة بالباخرة فعلاً جميييييلة جداً جداً... الكافيهات والمطاعم تنتشر على الطرف، محلات الاكسسوارات والتحف والتذكارات، والادراج الجميلة..

أنا وأمي قررنا نسكتشفها مشي بدينا من الدرج اللي عند احد المحلات لفوق... زاويته مشهورة ببيلاجيو

أغلب الطريق اللي مشينا فيه كان طريق صخري وفيه نباتات من كله الجهات والزوايا.. مرينا على بيوت السكان وكل بيوت له طابعه الخاص من ناحية الالوان والتزيين، وقفنا عند نقطة الظاهر تستخدم لليخوت والقوارب وكان فيها بط ملقوف ومايخاف من البشر ههههه عطيناهم من البسكوت الاعواد المنتشر بايطاليا

ومن النقاط اللي وقفنا عندها طريق صغير حبييييته أغرمت فيه، هو جزء من ملكية خاصة ومباشرة ينزل بالبحر يستخدم للقوارب الصغيرة، تبين منه الجبال البعيدة والبحيرة وحزتها في الأفق كانت قوارب مارة.. المنظر كان خيالي.

وواصلنا للطرف الثاني الأهدأ من بيلاجو، أكثره فنادق وللسكن.. المنظر خيالي والله.

بعدها رجعنا للطرف الأول وتغدينا غدا خفيف بمطعم الفيو فيه يطل مباشرة على البحيرة وكنا نشوف البواخر وهي تعبر والنوارس، وبعدها شربت قهوة وسويت وقدامي هذا المنظر الجميل.

وقريب العصر أخذنا الباخرة راجعين لبيرليدو، منظر أشعة الشمس بين الغيوم كان جميل جداً... من أحلى الرحلات في السفرة كانت زيارة بيلاجيو والرحلة منها ولها.

رجعنا الشقة قريب الغروب

تفاصيل من كومو وبيلاجيو: 

اليوم الثالث كان يوم طلعتنا إلى ميلان، من الصبح بعد الجيك آوت نزلنا تحت وتريقنا وانطلقنا لآخر محطتين في إيطاليا... ميلان عاصمة الموضة وفينيسيا عاصمة الحب... 

وهالوقفتين بيكونون للبوست الأخير في سلسة مدن السفرة. 

إن شاء الله يكون بوست فلورنس وكومو عجبكم.. شخصياً أشوف أحلى الصور التقطتها بهالأيام بسبب الجو والغيوم اللي ساعدني بشكل كبيير وبسببهم طلعت الصور تجنن.

ألاقيكم على خير