السلام عليكم ورحمة الله وبركاته
يسعد مساكم أو صباحكم وين ماكنتوا...
شخبار البلاك فرايدي؟ أحس السنة المواقع وحتى المحلات زاايدين بالبلاك فرايدي مو؟ عسى بس سمعتوا نصيحتي ببوست التغطية وتعقلتوا بالشراء وماكودتوا؟؟ أنا اشتريت كم شي لما يوصلون إن شاء الله بصورهم.
بوست اليوم من سلسلة الأون لاين شوبنغ.
استلمت باكج اليوم، فيه تجميعات طلبيات مختلفة، ورغم إني أعتبر خبيرة أون لاين شوبنغ، بس سويت كم غلطة، بالأحرى فاتتني كم نقطة مانتبهت لها وكانت نتيجتها إني دفعت مبالع مرتفعة للشحن، وشحن أكثر من مرة... فكان السبب إني أتكلم عن هالنقطة في فقرة الـ Unboxing بسناب، وأكتب موضوع جديد هني بالسلسلة بالتفاصيل.
البوست بيكون مركز بس على الشحن، يعني خل نقول مرحلة متقدمة من الشوبنغ أون لاين، لتحسين الشوبنغ أونلاين للناس اللي أساساً تتسوق، أما اللي ودهم يتعلمون الأون لاين شوبنغ من الصفر... أرد أحط لكم موضوع الأساسيات، من شحن وغير شحن:
[ الشوبنغ أون لاين من الألف للياء - Shopping Online from A-Z ]
والموضوع السابق بسلسلة الأون لاين شوبنغ كان عن كل شي يتعلق بموقع أمازون:
[ سلسلة الأون لاين شوبنغ: أمازون + شوية مشتريات | ONLINE SHOPPING SERIES: AMAZON + SMALL HAUL ]
أما بوست اليوم بيغطي الشحن كله من الألف للياء، إن شاء الله بيكون له فايدة كبيرة لكم لأن فعلاً أكثر الأسئلة اللي أنسأل عنها تكون متعلقة بالشحن.
أنواع الشحن في التسوق أون لاين نوعين:
- الشحن المباشر
- الشحن الغير مباشر / باستخدام صناديق التحويل اللي تقدمها الشركات المختلفة.
غالباً المواقع اللي تشحن مباشر تعطي تنبيه مباشرة من أول ماينفتح الموقع وحتى أغلبها تعرض المنتجات بسعر العملة المحلية بعد، وإذا الموقع مايعطي تنبيه، من البروفايل تسجلون عنوانكم المحلي، وراح يبين في خطوة الشحن إذا يقبل الشحن مع السعر، لو مايقبل بيكون في مسج إن الموقع مايشحن لهالدولة ويطلب عنوان محلي – أمريكي او بريطاني مثلاً، بهالحالة لازم استخدام نوع ثاني من الشحن.
بما إن ترتيب العنوان المحلي يختلف من دولة للثانية، فمافي ترتيب محدد لطريقة إدخال العنوان، يتدخل مثل ماهو ماشي في الدولة،
مثلاً في البحرين عندنا العنوان بهالترتيب:
الإسم - رقم البيت/المبني/الفيلا – رقم أو إسم الطريق – رقم المجمع السكني والمنطقة – ورقم التلفون مهم ينذكر بكل شحنة حتى لو مافي مكان مخصص للهاتف حطوط بنهاية العنوان.
لأن الباكج بعد مايدخل الدولة، يستلمونه الشركة بفرعهم اللي داخل دولة التسليم فهم بيمشون على العنوان المحلي باختلافه بين الدول.
[ الشحــن المباشــر ]
الشحن المباشر معناه مباشرةَ للعنوان المحلي للبيت بدون الحاجة لأي وسيط سواء صندوق بريد أو عنوان اجنبي أو شخص.. مباشرة من الموقع للبيت – شفتوا شلون تطلبون من مطعم وتعطونهم عنوان البيت ويوصلكم للباب؟ نفس الفكرة – باختلاف التوقيت والسعر.
مميزات الشحن المباشر:
- سهل من ناحية إنه العملية كلها في خطوة وحدة وموقع واحد من الاختيار والشراء ويبقى الإستلام بس، ماله داعي إنتظار وصوله للصندوق وطلب إعادة التغليف والشحن، وإذا كان الشحن مع شركة متخصصة بالشحن الدولي وفيها تتبع.. بيكون المسار مباشر وسريع (هالكلام أكثر شي ينطبق على المواقع الأوروبية هي الأسرع، بعدها الأمريكية تختلف حسب الشركة، ونهايتها الآسيوية، تطورت في الفترة الأخيرة بس للحين فيها تأخير خصوصاً شحن البردي الحكومي اللي بدون تتبع)
- سعر الشحن يتحدد مباشرة وقت الطلب فيعطي المجال لتحديد إذا كان المجموع يسوى أو لا، يدون مفاجآت الشحن بالصناديق اللي يعتمد على وزن الكرتون وفي حالات يكون الشحن أعلى من سعر المنتجات إذا كانت ثقيلة ويكون خلاص ملزومين ندفع!.
- عملية الإسترجاع والتبديل تكون سهلة جداً في المواقع اللي عندها شحن مباشر، مفيدة خصوصاً في مقاسات الأحذية والملابس، ليبل الاسترجاع يكون موجود ومذكورة مدة الاسترجاع، ساعات حتى شركة الشحن اللي وصلت الشحنة تتكفل تاخذها من البيت للترجيع، أو يستلمونها من مكتبهم.
- في حالة تعرض قطعة للكسر أو الضرر في الشحن، الموقع نفسه بيتكفل بالاستبدال والترجيع لأن هم شاحنينها مباشر وسلامتها مسؤوليتهم، عكس لما تكون قطعة انشحنت لعنوان أمريكي مثلاُ وبعدها دولي، ووصلت مكسورة.. هني احتمال كبير الموقع مايرضى يبدلها لأن بيقولون إنها كانت مشحونة شحن داخلي ووصلت سليمة (الشحن الداخلي تغليفه يفرق عن الدولي يكون أخف وأصغر، تخيلوا توصيل المندوبين مثلاً) وحتى لو قبلوا بالتبديل، في أوقات كثيرة يطلبون من الزبون يتكفل بترجيع القطعة للعنوان المحلي اللي وصلوا له.
- وقت الطلب من مواقع تشحن مباشرة إذا سعر الشحن مو مجاني أو مو ثابت، أفضل تجميع أكثر من قطعة في الطلب لأن غالباً يكون النظام إن السعر الأساسي للشحن يكون مع القطعة الأولى وبعدها مع كل قطعة إضافية يزيد مبلغ بسيطة، ومبلغ الشحن النهائي لما يتوزع على عدد القطع يكون معقول، غير لما تنطلب كل قطعة أو قطعتين بروحهم بطلبات منفصلة.
عيوب الشحن المباشر:
- شركات الشحن المباشر متعددة حول العالم، المدة ممكن تكون طويلة لما الشحن يكون على شركات عن طريق البريد الحكومي في الدولة (خصوصاً من الصين، أو من أمريكا لما يستخدمون أرخص خدمة من البردي الأمريكي الحكومي)، وممكن عليها ضريبة، قانون الضرائب والجمارك يختلف من دولة للثانية، غالباً يحددون قيمة محددة والشحنات اللي تزيد قيمتها عنها يفرضون عليها ضريبة جمركية، أغلب الدول ذاكرة معلومات الجمارك أون لاين في مواقع الوزارة المختصة، أفضل تبحثون عنها خصوصاً للي يطلبون قطع متعددة.
- أحياناً بعض شركات الشحن الإقتصادي المباشر منخفضة التكلفة بدون تتبع، وهذا يعرض الشحنة لإحتمال الضياع...
- الموقع هو اللي يحدد شركات الشحن المباشر اللي بيتعامل معاها، فلو كانت كل الشركات في اللستة مثلاً من الشركات البطيئة أو غير مضمونة، بيكون إختيار صعب ومجازفة.
- بعض شركات الشحن المباشر يكون سعر الشحن مرتفع جداً ومبالغ فيه مقارنة بسعر السلعة المشتراة.
من تجاربي أفضل شركات الشحن المباشر اللي جربتها للشحن إلى البحرين، بالترتيب:
- Fedex فيدكس الأسرع على الإطلاق، من أمريكا تاخذ يومين إلى أربعة أيام عالبرايورتي إذا ماصادفت ويك إند، التتبع دقيق ويصير أبديت خلال دقايق وحتى خدمة العملاء في البحرين ممتازة ويردون بسرعة، ويهتمون بالشحنة صح،
- Aramex أرامكس مع إنها تعتبر إقتصادية بس للبحرين شحنها سريع وغالباً مباشر وإذا بيوقف قبل البحرين بيوقف يوم واحد في دبي، من أمريكا تحتاج أسبوع تقريباً ومن أوروبا أحياناً يومين إذا طلعت قبل ويكند. خدمة العملاء عندهم ممتازة وسواقهم أصدقائي ههههه على طول يتصلون لي بيوم التسليم يستفسرون يوصلون للبيت أو الدوام.
- DHL دي إتش إل، سعرها مرتفع مقارنة بالباقي ولكن في بعض المواقع مثل آي هيرب يكون الشحن رخيص بسبب إتفاقيتهم مع الموقع، واللي يميزهم إنهم يشحنون أشياء ماتشحنها كل الشركات مثل العطور والسوائل.
- UPS سعرهم غالي لو الشحن عن طريقهم مباشرة بس معقول لو من موقع عندهم إتفاقية معاه مثل أمازون بريطانيا، عيبهم خدمة العملاء جداً سيئة ومايردون على التلفون أبداً! غير إنه أحياناً مايلتزمون بيوم الشحن بنص اليوم يتغير ليوم ثاني... أفقد نص أعصابي إذا عندي شحنة على يو بي إي وتأخرت واحتجت أتابعها خصوصاً إذا كان ويكند! وكذا شخص بسناب قالولي إنهم يعانون من نفس المشكلة مايردون لو تحترق تلفوناتهم.
هذا تقييمي للشركات وشحنها للبحرين، بس أعرف من تجارب صديقاتي إن مستوى خدمات كل الشركات يفرق من دولة للثانية، بالخليج وغير الخليج، فتأكدوا من ناس مجربين من ديرتكم عن مستوى الخدمة بين الشركات قبل ما تختارون الشركة اللي بتستخدمونها.
باقي الشركات الحكومية مثل البريد الأمريكي والبريد الصيني خصوصاً، أتجنب التعامل معاهم إلا لو بطلب أشياء بسيطة إستهلاكية وقيمتها مو كبيرة ومو معرضة للكسر، مثل أشياء بلاستيكية استهلاكية جذي، في حالة إنها تأخرت أو تعرضت لحوادث هههههه ماراح أخسر شي.
[ الشحن من الدول الأوروبية ]
الشحن من الدول الأوروبية هو شحن مباشر بس له مميزات إضافية تميزه عن باقي الدول (أمريكا خصوصاً)
- أول ميزة ضريبة القيمة المضافة VAT: أغلب الدول الأوروبية وبريطانيا عندهم ضريبة مضافة على السلع توصل نسبتها إلى 20%، هالقيمة تنضاف لأي سلعة تنشرى داخل الاتحاد الأوروبي، لما السلعة تنشحن عن طريق صندوق وسيط، بتعتبر للاستخدام المحلي وبتنحسب قيمة التاكس، أما لو الموقع نفسه عنده الشحن مباشر بتنخصم قيمة التاكس من السعر، يعني مثل عملية إرجاع التاكس فري في مطارات أوروبا.
- لما الماركة أصلها أوروبي، المكياج والشوزات والشنط خصوصاً.. سعرها يكون أرخص بشوي مقارنة بنفس القطعة في أمريكا أو في الدول العربية، على سبيل المثال شارلوت تيلبري، كودالي، وغيرهم، حتى بعض الهاي إند براند تكون أرخص إذا كانت الماركة أوروبية، مثل أسعار شوزات كريستان لوبوتان بنيت أبورتر مع شحن مباشر أرخص من سعرهم بالدولار في نوردستروم ونيمن ماركس، خصوصاً لما القطع تنشحن مباشرة وينشال منها التاكس.
- ثالث شي السرعة.. مثل السفر بالضبط، مثل ما رحلات الطيران للدول الأوروبية تكون مباشرة أو بالكثير ترانزيت واحد قصير مقارنة بالرحلة الطويلة والوقفات المتعددة في رحلات الطيران لأمريكا أو كندا أو آسيا أو إستراليا مثلاً، نفس الشي طلبات الشوبنغ أون لاين من الدول الأوروبية خطها يكون مباشر والرحلة أقصر.
[ شحن الأجهزة الكهربائية ]
من الأشياء اللي مهم شراءها من دول أوروبا الأجهزة الكهربائية، السبب إن التيار الكهربي في الدول الأوروبية نفسه التيار في الخليح، التيار والبلاك في بريطانيا هو النوع الثلاثي المستخدم بالخليج، في أوروبا التيار نفسه بس البلاك يكون الثنائي المدور، يركب بسهولة بالقطع البلاستيكية، أما من أمريكا فـ التيار والبلاك اثنينهم مختلفين، التيار 110 والبلاك الثنائي الي مثل الشريط، لازم يحتاج محول خاص.
بعض الأجهزة البسيطة من أمريكا تشتغل مع محولات السوبرماركت العادية، بس المجازفة ماتسوى مع كل الاجهزة خصوصاً الكبيرة والغالية، إحتمال كبير تحترق بسبب تغير التيار وخلاص ماتتصلح، أو تحتج محول كهربائي خاص بحول التيار بشكل كامل، بالبيت كنا طالبين لأختي هدية كتجن إيد من امريكا.. ماكنت حزتها أعرف قصة التيار، بعد كم استخدام وقف يشتغل! لما اخذناه تافولا وكيلهم بالخليج قالوا إنه احترقت فيه قطعة بسبب التيار وبيحاولون يفتحونه احتمال يتصلح واحتمال لا! تم عندهم مدة طويلة والحمدلله تصلح.. بس دفعنا له مبلغ كبير للتصليح وزين لقينا المحول الخاص.
فلطلب الأجهزة الكهربائية أون لاين، الخيار الأول الأفضل دايماً بريطانيا وبعده أمريكا والخيار الأخير أمريكا.. لو الجهاز متوفر بس بأمريكا مثلاً، لازم التأكد إنه شغال على تيار 110 و 220، هالمعلومات كلها تكون بوصف المنتج.
[ شحن العطور والسوائل والبطاريات ]
دايماً دايماً توصلني أسئلة شلون تشحنين السوائل.. وايد ناس يظنون إنه المكياج مثل الكونسيلر، الفاونديشن، أصباغ الأظافر، الفكس بلس، الزيوت، هذول سوائل وممنوع شحنها!
أول شي، هذي ما تعتبر سوائل.. حتى لو كان قوامها سائل طالما مو مضغوطة ولا قابلة للإشتعال غالباً تنشحن بدون مشاكل سواء شحن مباشر أو شحن بصندوق، السوائل اللي عليها إشكالية هي السوائل اللي تنحط بعلب مضغوطة قابلة للإشتعال مثل المعطرات، العطور، أصباغ الأظافر بكميات كبيرة.. هالقطع تشكل خطر في الطيران لأنها احتمال تحترق وتسبب إنفجار، شحنها مسمووح بس بظروف خاصة ورسوم إضافية للتغليف ورسوم إضافية للشحن بعد، وتسبب لها تأخير غالباً.
البطاريات والباوربانك شحنها بعد في الفترة الأخيرة صار معقد، الصندوق اللي عندي وأخليه لهالطوارئ هو صندوق ماي يو إس والشحن مع دي إتش إل.. خصوصاً البطاريات والسوائل أما العطور ما أطلب أون لاين وايد بس إذا أطلب من مواقع مباشرة لأنها الحين صارت موجودة وايد.
أغلب الصناديق الأجنبية ماتقبل شحن هالمواد، بس في مواقع تشحنها مباشرةً هم يتكفلون بالشحن، شحنهم دايماُ أغلى فالأفضل شرائهم بس في حالة الإضطرار، خصوصاً لما الشي يكون متوفر محلياً.. لأن رسوم الشحن بتكون مرتفعة... هالكلام ينطبق خصوصاً على أي شي فيه بطاريات وباور بانك، مثل ماشفتوا ببوكس اليوم شصار معاي بسبب كفر الشحن الإضافي للآيفون ٧ لأني نسيت من البداية أشحنه لماي يو إس وشحنته لفشز فاست، لو فكرت بهالنقطة وقت الطلب كنت ماطلبته من أساس، ماتسوى العنوة أنا طلبته لأن كان عليه عرض ومافكرت بكونه فيه بطارية وبتتعقد أموره بالشحن.
مواقع مجربة تشحن مباشر، كلها مواقع يا أنا شخصياً جربتها، أو شفت تجارب لهم من ناس أعرفهم وأتابعهم وأثق بكلامهم.
آخر تحديث للقائمة: ٢٦ نوفمبر ٢٠١٧
[ الشحــن الغيـر مباشــر / باستخدام الصناديق الأجنبية ]
الشحن الغير مباشر معناته الموقع يقبل البطاقات من أنحاء العالم بس مايقبل شحن الطلبات إلى على عنوان محلي بنفس الدول أو بدول محددة، وهني دور صناديق التحويل اللي تقدمها الشركات المختلفة سواء مباشرة من شركة الشحن نفسها، أو شركة تقدم صندايق شحن بالتعاون مع شركات مختلفة بالصندوق الواحد، في مواقع ماتقبل لا الشحن المباشر ولا الشحن عن طريق العناوين هذي (بسبب إنها تصنف كعناوين غير سكنية وتعرفها المواقع) أمثال هالمواقع سيفورا وموقع أولتا - وهالمواقع مالها حل الا استخدام عنوان سكني لشخص فعلاً ساكن في اميركا او الدولة اللي فيها الموقع.
عناوين الشحن تتكفل باستلام الطلب من الموقع كعنوان داخلي، وبعدها تحويل الكرتون للعنوان اللي يطلبه الشخص كشحن دولي والرسوم حسب الوزن، كل شخص يكون له كود محدد أو رقم ينحط بالعناوين وقت الطلب، عشان تتسجل طلباته باسمه.
صناديق الشحن الغير مباشر تنقسم لقسمين، قسم يحول ويشحن الصناديق مباشرة وقت استلامها لعنوان العميل، وقسم يحتفظ بكل الطلبات اللي توصل بحساب العميل (المدة المجانية تحددها الشركة وبعدها التخزين عليه رسوم وتفرق من شركة للثانية)، لين يطلب العميل شحنها مباشرة.
مميزات الشحن الغيـر مباشر بصناديق التجميع:
- إعادة تغليف وتجميع الطلبات ببوكس واحد، وبالتالي جمع الكسور والغرامات كلها بوزن واحد.
- التخلص من التخزين الاضافي اللي يزيدالحجم، مثل كراتين الاحذية، الاكياس الاضافية
- تغليف وحماية إضافية للقطع القابلة للكسر أثناء الشحن.
- فحص الكرتون والتاكد من سلامة القطع من الكسر، التاكد من إنها تشتغل (رسوم اضافية)
- تصوير محتويات الكرتون (رسوم إضافية)
- ترجيع / إستبدال القطع المتضررة أو لأي سبب (رسوم إضافية)
- الشراء بدل العميل (برسوم إضافية، تصلح كحل بديل للمواقع اللي ماتقبل بطاقات دولية)
- خيارات وشركات متعددة للشحن من الشركات اللي تقدم الخدمة بدون ماتكون تابعة حصرياً لشركة محددة، التنوع في الشركات يعطي العميل حرية اختيار الشركة المناسبة له، سواء من ناحية السرعة (تكون أغلى من الباقي) أو من ناحية القيمة الأفضل (تكون أبطأ من الشركات السريعة)
عيوب الشحن الغيـر مباشر بصناديق التجميع:
- العيب الأكبر والموجود بأغلب شركات التجميع: استخدام الوزن الفعلي والحجم الحجي للقياس، واستخدام السعر الأعلى للشحن.
شنو يعني وزن فعلي وشنو وزن حجمي؟
- الوزن الفعلي هو وزن الكرتون على الميزان، بغض النظر عن حجمه سواء كان كرتون صغير ولا كبير.. الرقم اللي يطلع على الميزان بالغرام أو الباوند (تقريبا قريب ال٥٠٠ غرام) أو كيلو غرام هو اللي ينحسب للشحن.
- الوزن الحجمي: هو الوزن اللي ينقاس باستخدام حجم الكرتون اللي راح ينشحن، ارتفاع وعرض وعمق الكرتون - يستخدم هالوزن للكراتين الكبيرة بغظ النظر عن اللي داخلها حتى لو كان خفيف ووزنه مايي كيلو! ينحسب الوزن على حجم الكرتون، كل مازاد الحجم ارتفع الوزن، والوزن الحجي غالباً ينقاس بحجم السنتيمتر أو الانش المكعب في كل متر.
شنو السبب اللي خلا الشركات تعتمد على نظام حساب سعر حسب الأكبر من الوزن الحجمي أو الفعلي؟
السبب إنه شركات الشحن تعتمد أرباحها بشكل كبير على شحن الباكجات، في السنوات الأخيرة لما كانت الحسبة بس على الوزن الفعلي اللي يطلع بالميزان، كانت طيارات الشحن تنشحن بكراتين فيها منتجات بأحجام كبيرة بس خفيفة، هالكراتين تاخذ مساحة كبيرة في الطيارة وبالمقابل اللي يدخل على شركة الشحن مبلغ بسيط معتمد على الوزن، فبعد ماكان الوزن الحجمي ينطبق على الكراتين من حجم محدد، من ٢٠١٥ بدأت أغلب الشركات وأولهم فيدكس ويو بي إس باستخدام الأكبر بين الوزنين الفعلي أالحجمي أياً كان الحجم.
من الشركات المعروفة عالمياً في حساب حجم البوكس أو التغليف مقارنة بحجم القطعة نفسها هي شركة آبل… لو تلاحظون كل منتجات آبل.. من الآيبود، السماعات، الآيفون، الآيباد، الماك بوك، الآي ماك.. كل شي ايي ببوكس يادوب أكبر شوي من حجم القطعة نفسها.. الزيادة بس تكفي الشواحن والكيابل والكاتلوجات بدون ماتكون زيادة فارغة بدن فايدة، ليش؟ مو بس لأن الباكج يكون أنيق شكلياً، بس لأن شركة آبل مصانعها بالصين، معناه كل المنتجات سنوياً تطلع بالملايين من الصين… بطائرات شحن، فكل ماكان الكراتين صغيرة وcompact كل ما زاد عدد الكراتين اللي تشيله طيارة وحدة، بالتالي قل عدد الطيارات الكلي المستخدم للشحنات - بالتالي قلّت كلفة الشحن.
تكلفة الوزن الحجي تختلف من شركة للثانية، الشركات اللي شحنها أسرع حسبتها للوزن الحجمي أغلى… بس كل موقع فيه خدمات شحن فيه حااسبة غلكترونية تحسب السعر التقريبي، تشترط معرفة القياسات التقريبية بالانش، هالشي ممكن يكن صعب خصوصاً لما طالبين الشي أونلاين، مع ان اغلب المواقع تكون حاطة مقاسات القطعة - بس مقاسات الكرتون تفرق، الأفضل التركيز على هالنقطة لما تطلبون شي حجمه كبير.. خصوصاً إذا القطعة نفسها حجمها ضخم وخفيفة، أو مغلفة… الشوزات والأحذية مثلاً، شركات التجميع عندها خيار التخلص من التغليف الزايد، الشوز ينحط بدون كرتون بالتالي ياخذ مساحة اقل بكرتون الشحن الاساسي، والشنط، واي شي.. بس في بعض المنتجات الاستغناء عن كراتينها صعب، مثل شوزات الماركات، علب الهدايات والأطقم، الأفضل بهالحالة يكون عندكم اشتراك بشركة تتعامل بالوزن الفعلي وشركة ثانية للتجميع تتعامل بالوزن الحجمي.. عالأقل لما كل الطلبات تنحظ ببكس واحد كبير، بينأخذ وزن الكرتون النهائي كقطعة وحدة. غير لما كل كرتون بينوزن وينشحن بروحه على حجمه… وهذا اللي غلطت فيه بالبوكس اللي صورته اليوم، لما بعد مافكرت بحجم طقم الأرواج من ماك وشحنته على صندوق التجميع اللي يتعامل بالوزن الحجمي بدل الوزن الفعلي.
أفضل ٣ شركات الشحن المباشر اللي جربتها وأنصح فيها مع بعض:
- شوب & شيب من أرامكس، رسوم الاشتراك تندفع مرة وحدة وبعدها كل شحنة حسب الوزن، تعطي صناديق بدول مختلفة غير أميركا وكل مرة تزيد، مثل: بريطانيا، فرنسا، إيطاليا، ألمانيا، دبي، تركيا، الهند، هونغ كونغ، وغيرهم، وكل ما انضافت دولة جددية تنضاف تلقائي للقائمة بدون حاجة لتسجيل جديد، أكبر ميزة غير الدول المختلفة هي حساب الوزن الفعلي… أحسن شركة لشحن الأغراض الكبيرة الخفيفة نسبياً أرامكس شوب & شيب اللي من أرامكس مباشرة بس، أرامكس غير شوب & شيب اللي متعاونة مع شركة الصناديق الثانية تستخدم الوزن الفعلي، عيبها إن مافيها تجميع.
- فشزفاست، الإشتراك فيها مجاني، الولاية اللي فيها الصندوق بدون ضرائب، توفر التجميع (مجاناً لمدة ١٨٠ يوم) وتتعامل مع كذا شركة (أرامكس، فيدكس نوعين، دي إتش إل نوعين - أفضل قيمة أرامكس -خلال أسبوع- وفيدكس إيكونومي -خلال ٤ أيام-) وعندها كل المميزات الإضافية اللي ذكرتها فوق، وخدمة الزباين عندهم ممتازة، عيوبهم يتعاملون بالوزن الحجي ومايشحنون البطاريات. لنك الإشتراك
- ماي يو إس: الخيار الأخير اللي أنصح المضطرين بس يشتركون فيه، تشبه مميزات فشة فاست، الفرق إن الاشتراك بفلوس (البريميوم ٦٠$ سنوياً وعندهم شهري)، التجميع مجاني لمدة ٣٠يوم بس وبعدها ١$ لكل باكج عن كل يوم، وبعد يتعاملون بالوزن الحجمي، ميزتهم إنهم يقبلون شحن البطاريات والعطور، مع إ شحن هالأشياء يستدعي دفع رسوم اضافية للتغليف، ورسوم إضافية للشحن، وتتأخر الشحنة عن المعتاد، بس هذي الحل الوحيد في حالة الإضطرار لشحن هالأشياء.
ختام موضوع اليوم، الشحن المباشر دايماً الخيار الأفضل لو كان متوفر، خصوصاً لما يكون مع شركة معروفة وبتتبع لأنه يكن متوقع ومعروف بدون مفاجآت تعتمد على الوزن، والخيار الثاني بيكون للشركات اللي تقدم خدمات التجميع والتخلص من التغليفات الاضافية لتقليل الحجم، والخيار الأخير ولكن المهم، شركات الشحن بالوزن الفعلي للاستخدام مع الاشياء الكبيرة حجماً.
إن شاء الله يكون موضوع اليوم مفيد كلم وقدرت أغطي فيه كل الجوانب المهتمة المتعلقة بالشحن من موقع الأون لاين شوبنغ ويسهل عليكم طلباتكم المستقبلية وتقدرون تختارون نوع الشحن المناسب لكم من حيث الاحتياج والقيمة.
ألاقيكم على خير!
xoxo
![[ BLOGLOIN' ]](https://blogger.googleusercontent.com/img/b/R29vZ2xl/AVvXsEiY2hCQPo30fwI8jVJI4mfwxSM-C78H5PA512Sh-m3Dtro5Pij8UOtU2b03VEzeKiumw84JrJt2BFeuvaJy8aMeUMKMY1jlu_op3sAAG0HVwk-c-BJPUqt5BcnXoavPvj1VmkRx-vbvNqU/s1600/BlogLovin.JPG)
%2B(1).jpg)
No comments