السلام عليكم ورحمة الله وبركاته
يسعد صباحكم أو مساكم وين ماكنتوا...
شهر نوفمبر شهر التسوق اللي الكل ينتظره، تخفيضات نهاية الخريف، تخفيضات البلاك فرايدي والسايبر موندي... والكولكشنات والمنتجات الخاصة بموسم الأعياد والكرسمس والنيويير.. وأطقم الهدايا خصوصاً أطقم العطور، السكن كير والمكياج
وما شاء الأسئلة عن تغطية البلاك فرايدي هالمرة مبكرة.. مع إني سنوياً ما أحط وأجمع كل شي إلا على آخر الوقت
اليوم الأربعا والبلاك فرايدي السنة بيصادف 24 نوفمبر والسايبر موندي بيكون 27 نوفمبر.. المقدمة بخليها للمعلومات العامة والتوصيات والعروض المتوقعة، مع لنكات السنوات الفايتة عشان يمديكم تاخذون فكرة، تجهزون الميزانية وتجهزون أي أشياء ناقصة عندكم مثل بطاقة، حساب بايبال، عنوان أمريكي...
بس لا تنسون... على كبر إغراء التخفيضات بس حاولوا إنكم ماتشترون شي ماتحتاجونه ولا تكدسون كميات ماتحتاجونها.. عادي تدور السنة وتصير التخفيضات من جديد وانتوا للحين عندكم ستوك وبعد بتغريكم التخفيضات الجديدة.. اسألوا مجربة!
كعادة مقدمات مواضيع الأون لاين شوبنغ، إذا نهائياً ماعندكم أي فكرة عن الأونلاين شوبنغ، فضوا كم ساعة من وقتكم لقراءة دليلي للشوبنغ أون لاين ووعد بتعرفون كل اللي تحتاجونه وراح تقدرون تبدؤون بشكل شبه فوري.. بعد ماتجهزون الناقص عندكم:
[ الشوبنغ أون لاين من الألف للياء - Shopping Online from A-Z ]
وأما شركة الشحن اللي انا استخدمها حالياً للمواقع الأمريكية اللي ماتشحن مباشرة هي فشز فاست، عندها خدمة تجميع لمدة ١٨٠ يوم، إعادة تغليف لتقليل الحجم، التعامل مع شركات شحن مختلفة ودايماً توصل بأقل من اسبوع، ممتازة من كل النواحي ماعدا لشحن البطاريات غير مسموح + شحن القطع الكبيرة جداً عشان الوزن الحجمي.
من هني تقدرون تشتركون:
وهني بموضوع سابق لي عن تخفيض نوردستروم السنوي شارحتها بالتفاصيل:
[ دليل التخفيض السنوي لموقع نوردستروم سنة 2017 NORDSTROM ANNIVERSARY SALE PICKS ]
وهالموضوعين تغطيني لعروض البلاك فرايدي لسنوات 2015 و2016، اخذوا شوي من وقتكم عشان تعرفون المواقع اللي تسوي عروض وشكثر.. مو شرط العروض نفسها تتكرر كل سنة بس غالباً إذا الموقع مسوي بالسنوات اللي قبل يعني أكيد السنة بعد يكون عنده شي.. فبيمديكم تجهزون لستة مبدئية للمواقع اللي تبون تتابعونها بالبلاك فرايدي.
بلاك فرايدي 2016
{ 2016 BLACK FRIDAY & YEAR END SALES | تخفيضات البلاك الفرايدي ونهاية السنة }
بلاك فرايدي 2015
[ دليل عروضات وتخفيضات البلاك فرايدي لسنة ٢٠١٥ - موضوع محدث باستمرار ]
وهالموضوع كالعادة بيكون متجدد وبجمع فيه كل العروض اللي تمر علي وأشوفها للبلاك فراديي وللسايبر موندي، بالترتيب من الأقدم للأحدث حسب وقت الإضافة.. وقبل إضافة عروض السنة بعطيكم نصايح عامة وتوصياتي من واقع خبرتي كوني متابعة للأون لاين شوبنغ في السنوات الأخيرة.
نبتدي على بركة الله.. جهزوا كوب قهوتكم ودفتر ملاحظات أو أبلكيشن النوتس... ورجعوا
| الماركات الهاي إند وماركات البيوتي والسكن كير |
قريب نهاية السنة وموسم الأعياد والبلاك فرايدي تكون فرصة حلوة للشراء من الماركات.. سواء كانت ملابس، شنط، أحذية، إكسسوارات.. أو حتى مكياج وماركات عناية.
أفضل المواقع اللي يُستفاد من عروضهم على الماركات هم مواقع الديبارتمنت ستور اللي تجمع ماركات مختلفة، نظام هالمواقع في التخفيض مختلف، يا إما يكون بنسبة محددة إما تكون ثابتة أو تزيد وتنقص حسب القيمة الكلية للطلب، أو تخفيض مبلغ لما يوصل الطلب لقيمة محددة، أو يكون قسم خاص للتخفيض فيه قطع عليها تخفيض يوصل حتى 40-50% وبعضها أقل، بالإضافة إلى أطقم الهدايا اللي تنزل بسعر خاص اقل بوايد من لما تنشرى كل قطعة بروحها.
فارفتش موقع أوروبي يجمع بوتيكات الماركات المختلفة، الطلب يكون من فارفتش بس الطلب ينشحن من بوتيك الماركة من فروعها المختلفة بأوروبا.. فارفتش من أكبر المواقع اللي تجمع ماركات الهاي إند براندز والماركات العادية... والبرايفت سيل اللي يكون حصري للمشتركين بالقائمة البريدية يكون أقوى من السيل اللي ينفتح للكل بعده.. فيه قطع ماتتفوت وتطير بسرعة... الموقع معروف عنه مضمون وآمن ويشحن لكل دول العالم وأحياناً الشحن يكون مجاني، اللي ودهم يضيفون كم قطعة ماركة لكولكشنهم... أنصحهم يحطون فارفتش على راس القائمة.
مواقع الديبارتمنت ستورز الأمريكية مثل نوردستروم، نيمن ماركس، بارنيز، بلومنغ ديلز، ميسيز، ساكس ففث أفنيو، شوب بوب، هالمواقع يتشابهون من ناحية تنوع المنتجات والماركات عندهم ويتنافسون بالعروض، أغلبهم بيكون عندهم قطع بقسم السيل لنهاية السيزن.. غير القطع والأطقم والعروض الحصرية اللي تختلف من موقع لموقع، اللعام مثلاً عرض نيمن ماركة 50$ تخفيض من كل طلب فوق الـ 200$ كان ممتاز.. لأنه كان يشمل أغلب القطع حتى الأطقم اللي أساساً نازلة بسعر خاص، نوردستروم كانعندهم تخفيضات إإضافية على أغلب المكياج، وقطع نازلة بس بالبلاك فرايدي أو السايبر موندي ليوم واحد، وغير قسم التخفيضات العام والهدايا مع المشتريات، شوب بوب مع إن كولكشنه أقل من الباقين وأصغر.. بس عروضه كانت حلوة تخفيض على كل شي وتزيد النسبة كل مازادت قيمة الطلب.
بالنسبة لللبيوتي، الموقع الأفضل بدون منازع وغير الديبارتمنت ستور هو سيفورا... الأطقم اللي ينزلونها تجننن من ناحيةا لقطع والأسعار، وغير تخفيضات البيوتي إنسايدر والنقاط.. للأسف سيفورا ماعاد يقبل الشحن لشركات الشحن، الحل إما الشراء من سيفور اعن طريق موقع جي سي بيني – فيه بعض الأشياء مو كلها، أو استخدام خدمة الشراء من مواقع الشحن مثل فشز فاست.. سمعت إنهم يقدرون يطلبون من سيفورا بس شخصياً ماجربتهم، أو الشحن لعنوان سكني إذا عندكم أحد في أمريكا.
موقع سكين ستور بعد حلو وعندهم شحن حول العالم، فيه منتجات عناية أكثر من المكياج، وبيوتي إنكاونتر بعد يوصل مباشر وأكثر اللي فيه عطور.. هالموقع يتميز مع موقع فراغرانس إكس المتخصص للعطور ويشحن مباشرة... إن موجود فيهم عطور قديمة ومقطوعة.
| الثياب |
غير ماركات الديبارتمنت ستورز اللي تمشي عليها العروض اللي ذكرتهم فوق، في مواقع متخصصة بالثياب بشكل خاص وعندهم أشياء ثانية ومتوقع يسوون عروض حلوة بالبلاك فرايدي...
أول موقع أسوس.. أحب أسوس! مرتب وفيه ثياب مناسبة لمناسبات مختلفة، يومية، طلعات خفيفة، مناسبات بسيطة، رياضة.. وماركات مختلفة وأسعارها متفاوتة ومناسبة... وشحنهم مجاني ومن تجربتي يوصل خلال أقل من أسبوعين وشحن مدفعون ثابت يوصل بأقل من أسبوع، يفضل استخدام المدفعون وقت المواسم بسبب الزحمة... سنة 2015 تخفيض أسوس كان 30% على كل شي و2016 كان 20% على كل شي.. غير قسم التخفيضات العام اللي فيه قطع وااايد + عندهم أقسام ثانية مثل إكسسوارات البيت، المكياج، وينطبق عليهم التخفيض.
من مواقع الثياب الثانية اللي متوقع يسوون سيل... ريفر آيلاند، توب شوب، أوربن آوت فيترز، هاوس أوف فريجر، قاب، نمشي... وغيرهم.
نصيحة... مروا على هالمواقع من الحين وسجلوا وإذا عجبكم شي ضيفوه بالباسكت والوش لست، ليش؟ عشان لما تبتدي التخفيضات مباشرة تعرفون إذا القطع اللي عجبتكم عليها تخفيض والشراء يصير أسرع.
| أمازون |
أمازون بوقت البلاك فرايدي والسايبر موندي كمية كبييييرة من المنتجات تصير عليها عرض، ونظامهم يكون نظام الفلاش ديلز.. أمازون يخلون صفحة خاصة لهالوقت، وكل يوم يحطون المنتجات اللي بتصير عليها عروض.. الحلو إنهم يحطون شنو المنتجات مع الوقت.. يعني في فرصة للتجول وإذا في شي يسوى ينعرف بالضبط متى الوقت اللي راح يصير في السيل، الأشياء تنزل بكميات محددة ويكون معروض شكثر باقي... الحل الأمثل لعروض أمازون الاشتراك في أمازون برايم (يعطي شهر مجاناً وبعدين يصير الالغاء) والشحن على شركة تجميع.. عشان لو مثلا في منتج أو منتج يسوون ويوم ثاني بعد منتجين.. يصير نستفيد من شحن البرايم المجاني وشركة الشحن تجمعهم صندوق واحد... الأشياء متنوعة من الكترونيات، أدوات منزلية، مكياج، حتى أدوات شخصية وتنظيف... في أشياء حتى لو سعرها حلو بس ماراح تسوى الشحن لنا... كالعادة.
| ماركات الإنستقرام |
ماركات الإنستقرام قصدي الماركات اللي تعتمد بشكل كبير على التسويق في قنواتها بالسوشيال ميديا وعلى البيع أون لاين أكثر من البيع بالمحلات، بعضهم أصلاً متوفرين بس أون لاين.. هالماركات غالباً تخفيضاتهم تكون كبيرة من 20-50% وعلى أغلب المنتجات إذا مو كلها... فرصة للشراء إذا حاطين ببالكم شي تحتاجونه.. بس تذكروا إنكم ماتكدسون، يفضل تتابعون صفحاتهم بالانستقرام لأنهم يعلنون عن الوقت بالضبط.. وأي كوبون كود للعروض
من هالماركات على سبيل المثال – أغلبهم ماركات مكياج وثياب للبس اليومي والكاجول: ذا بالم، كلر بوب، هاوس أوف لاشز، ليلا ميلاني، أنستازيا بيفرلي هيلز، تارت، جيرارد كوزمتكس، زويفا، سيجما، كوستال سنتس، بي إتش كوزمتكس، جور كوزمتكس، فوريو، أوفرا، بيكا، كايلي، لايم كرايم، شي إن، جويز، فاشن نوفا... وغيرهم.
| الماركات بمواقعها الخاصة |
تخفيضات البراند أو الماركة نفسها في موقعها الخاص، يا إما يكون تخفييض بنسبة محددة على الموقع كله لوقت محدد.. أو ينزلون مجموعة من المنتجات بتخفييض متفاوت، غير عروض الشحن المجاني والعينات أحياناً... حركة التسوق من الحين واضافة القطع للسلة والوش لست بعد مفيدة بهالمواقع.
من هالبراندز: مونيكا فينادر، توري بورش، كيت سبيد، مايكل كورس، كيلز، كلينيك، مارك جيكوبز، هينري بيندل، سماش بوكس، بوبي براون... وغيرهم.
| آي هيرب |
محبوب الجماهير بهالفترة يا إما ينزل منتجات بأسعار خاصة وأطقم، واللعام كان التخفيض 10% على كل المواقع... مع استخدام الكود الخاص لأي أحد تعرفون اللي غالباً يكون 5%، يعني المجموع بيكون 15%، وممكن يسوون عروض على الشحن بعد.
لا تنسون تشيكون مواقع الكاش باك، يزيدون نسبة الكاش باك في هالفترة، بعضها توصل حتى 10%.. يعني لو الموقع عنده تخفيض 30% + كاش باك 10% المجموع بيكون 40%
شروحات الكاش باك من المدونة:
إيبيتس:
مستر ريبيتس:
وهذي كانت مقدمة مواضيع البلاك فرايدي للسنة وأهم التقسيمات، والحين وقت العروض
الموقع/الماركة: أمازون | www.amazon.com
شحن مباشر: متوفر بس غالب المنتجات اللي تشملها العوض ببتكون شحن داخلي سواء كان أمازون أمريكا أو بريطانيا، الاثنين عندهم صفحة عروض
نوع المنتجات: متنوعة
البلاك فرايدي / السايبر موندي: صفحة خاصة للعروض، فلاش ديلز عروض متعددة تستمر لوقت محدود وبعدها تتغير القطع
الكيندل بموديلاته المختلفة كالعادة نازل بتخفيض البلاك فرايدي والسنة التخفيض أكثر/ الكيندل بيبر وايت ب٩٠$ كل سنة يكون $١٠٠، ممتاز للقراءة، حجمه صغير خفيف وفيه اضاءة ذاتية وشحنه يعيش أسابيع ويحمل آلاف الكتب.
الموقع: نوردستوم | www.Nordstrom.com
شحن مباشر: متوفر لبعض المنتجات
نوع المنتجات: ديببارتمنت ستور منتجاته متنوعة
البلاك فرايدي / السايبر موندي: خمسة أيام من العروض تبتدي بالبلاك فرايد 23 نوفمبر وتنتهي بالسايبر موندي 27 نوفمبر 2017، التركيز الأكبر بيكون على منتجات السكن كير والبيوتي، بعضها بتخفيض وبعضها نازلة بأطقم حصرية لنوردستروم، وبعضها شراء واحد والثاني مجان... يعني عروض راهية + قسم السيل الموسمي 40% إبتدى
(مصدر تخفيضات نوردستروم من موقع آلور Allure.com): اللستة طويلة ففضلت أحط لها لنك مباشر أفضل بدل ما أترجمها كلها... مما شاء الله عروض على ماركات واايد.. ذكرتني بالانيفرسري سيل، الأفضل من الحين تسوون لستة وماتتسوقون عشوائي
أحب ماركات نوردستروم للبيوتي والسكن كير، بلقي نظرة على العروض إذا شفت شي أحتاجه ونازل بست حلو مابطوفه.. صفحة البلاك فرايدي:
الموقع/الماركة: آي هيرب | www.iherb.com
شحن مباشر: متوفر
نوع المنتجات: هاي إند براندز
البلاك فرايدي / السايبر موندي: لحين ماعلنوا عن البلاك فرايدي بس غالباً بيكون ١٠٪، بس حالياً التخفيض للي تحصلونه من الكود الخاص بيكون ١٠٪ لنهاية نوفمبر بدل ٥٪.. كودي بآي هيرب: DQB354 أو من اللنك:
https://www.iherb.com/?rcode=DQB354
https://www.iherb.com/c/iherb-brands/?rcode=DQB354
https://www.iherb.com/?rcode=DQB354
https://www.iherb.com/c/iherb-brands/?rcode=DQB354
الموقع/الماركة: فارفتش | www.farfetch.com
شحن مباشر: متوفر
نوع المنتجات: هاي إند براندز
البلاك فرايدي / السايبر موندي: البرايفت سيل للبلاك فرايدي حالياً مفتوح للمشتركين في القائمة البريدية + 10% إضافية على القطع المخفضة مع كود X1017لفترة محدودة + سيل البلاك الفرايدي العام بيبدأ يوم الجمعة، على نسبة كبيرة من المنتجات الهاي إند براندز.
نفس ماقلت بالمقدمة، فارفتش تقريباً الموقع رقم 1 لاستفادة من العروض على قطع الهاي إند براندز، لأنه يجمع ماركات مختلفة والكولكشن ضخم.
الموقع/الماركة: أسوس | www.asos.com
شحن مباشر: متوفر مجاني – ومتوفر مدفوع ثابت 20 باوند إسترليني
نوع المنتجات: متنوعة بين ملابس المناسبات المختلفة، اكسسوارات الفاشن واكسسوارات المنزل الشخصية
البلاك فرايدي / السايبر موندي: 30% على كامل الموقع في الفترة بين 23 نوفمبر الجمعة إلى 28 نوفمبر الثلاثاء مع كود EPIC30 + قسم خاص للقطع اللي أساساً مخفضة بالتخفيضات الموسمية في قسم الآوتلت
أسوس من مواقعي المفضلة للثياب... هالأسبوع أكيد بلقي نظره والقطع الي تعجبني بجهزها بالباسكت.
الموقع/الماركة: ماك | www.maccosmetics.com
شحن مباشر: غير متوفر، يحتاج صندوق أمريكي، الدفع بالبايبال + يحتاج برنامج VPN
نوع المنتجات: مكياج وفرش
البلاك فرايدي / السايبر موندي: تخفيض 25% لعضوية السيلكت (الإشتراك مجاني) من ٢٣ نوفمبر الجمعة إلى ٢٧ نوفمبر الاثنين
ماك غني عن التعريف، من الأشياء اللي ماتتفوت: الآي شادوز السنقل الريفيل ($٦)، الفرش (خصوصاً إنهم قريب بيحولونهم لشعر صناعي)، الأرواج، البلاشرات، شادوات الإكسترا دايمنشن، إضاءات الإكسترا دايمنشن، المنرال باودر
الموقع/الماركة: مونيكا فينادر | www.Monicavinader.com
شحن مباشر: متوفر ومجاني
نوع المنتجات: إكسسوارات مطلية
البلاك فرايدي / السايبر موندي: 30% على منتجات مختارة وشحن دولي مجاني – بدأت من الحين
عجبني تخفيض مونيكا السنة خصوصاً على الأساور... أذكر اللعام كنت بطلب من التخفيض بس كان الكولكشن المضمون بالتخفيض أقل من السنة.
الموقع/الماركة: زويفا | www.zoevacosmetics.com
شحن مباشر: متوفر
نوع المنتجات: مكياج وفرش
البلاك فرايدي / السايبر موندي: تخفيض 20% على كامل الموقع بكود ZFS2017
فرش زويفا كوالتيهم ممتاز من أفضل فرش المكياج في السوق.. وألوانهم تجنن! فرصة حلوة وماتتفوت للي يحتاجون فرش مكياج.
الموقع/الماركة: بوك ديبوزتري | www.bookdepository.com
شحن مباشر: متوفر، مجاني حتى لو كتاب واحد عبر البريد الحكومي
نوع المنتجات: كتب
البلاك فرايدي / السايبر موندي: خصومات متنوعة ومختلفة كل يوم لمدة أسبوع
بوك ديبوزتري من مواقعي المفضلة لطلب الكتب - بعض الكتب ممكن تكون أغلى من مواقع ثانية بس مميزاته أي كتاب انجليزي تقريباً موجود فيه + أياً كان عدد الكتب الشحن مجاني، بعكس بعض المواقع اللي الشحن يكون حسب الوزن - الشحن على البريد الحكمي وأغلب الظن كل كتاب ينشحن بروحه وبدون تراكنغ بس الكتب ماتضيع، توصل خلال أسبوعين وممكن أسرع وممكن تتأخر شوي بأوقات الزحمة
الموقع/الماركة: توري بورش | www.toryburch.com
شحن مباشر: غير متوفر – يتطلب صندوق أمريكي
نوع المنتجات: فاشن واكسسوارات
البلاك فرايدي / السايبر موندي: 30% على القطع بالأسعار الكاملة مع كود THANKS
الموقع/الماركة: | www.katespade.com
شحن مباشر: غير متوفر – يتطلب صندوق أمريكي
نوع المنتجات: فاشن واكسسوارات
البلاك فرايدي / السايبر موندي: 30% على كامل الموقع مع كود GIVEJOY
الموقع/الماركة: بلومنغ ديلز | www.bloomingdales.com
شحن مباشر: متوفر بس مو لكل شي
نوع المنتجات: ديببارتمنت ستور منتجاته متنوعة
البلاك فرايدي / السايبر موندي: عروض متعددة:
من 17 إلى 22 نوفمبر: تخفيض البيق براون باق - $25 من كل $200،
23 نوفمبر يوم البلاك فرايدي على القطع Buy More, Save More: 15% للطلبات بين 150$ - 299.99$ | 20% للطلبات بين 300$ - 300.99$ | 25% للطلبات فوق $400، بالإضافة للشحن المجاني وقسم التخفيضات الموسمية.
24 إلى 25 نوفمبر على قطع Buy More, Save More: 15% للطلبات بين 100$ إلى 199.99% | 20% للطلبات فوق $200 والشحن مجاني.
27 نوفمبر يوم السايبر موندي: 25% على نسبة كبيرة من المنتجات + 10% على مجموعة كبيرة من قسم البيوتي.
الموقع/الماركة: ميسيز | www.macys.com
شحن مباشر: متوفر بس مو لكل شي
نوع المنتجات: ديببارتمنت ستور منتجاته متنوعة
البلاك فرايدي / السايبر موندي: تخفيض حتى 40% على قطع متنوعة بقسم السيل + عروض مختلفة ومتنوعة بقسم البلاك فرايدي + تخفيض إضافي 15-20% على منتجات مختارة مع كود HURRY
الموقع/الماركة: نمشي | www.namshi.com
شحن مباشر: متوفر
نوع المنتجات: ملابس وأحذية وشنط متنوعة
البلاك فرايدي / السايبر موندي: كل يوم عروض وتخفيضات مختلفة
الموقع/الماركة: بلو فلاي | www.bluefly.com
شحن مباشر:
نوع المنتجات: ماركات متنوعة وهاي إند
البلاك فرايدي / السايبر موندي: ت
الموقع/الماركة: أنستازيا بيفرلي هيلز | www.anastasiabeverlyhills.com
شحن مباشر: متوفر بسعر ثابت، الدفع بالبايبال
نوع المنتجات: مكياج
البلاك فرايدي / السايبر موندي: من 24 نوفمبر البلاك فرايدي إلى 27 نوفمبر السايبر موندي: 50% على الكونتور، الشادوهات المفردة، البلاشر الثلاثي | 40% على باليتات الإضاءة، الأرواج السايلة والقلوسات | 30% على اللاينر، الأرواج المطفية | فرشاة مجانية مع الطلبات فوق 75%
الموقع/الماركة: تارت | www.tartecosmetics.com
شحن مباشر: متوفر ثابت
نوع المنتجات: مكياج
البلاك فرايدي / السايبر موندي: ٢٥٪ على كل شي تقريباً مع كود PREVIEW
الموقع/الماركة: فيل يونيك | www.feelunique.com
شحن مباشر: متوفر
نوع المنتجات: مكياج، عناية، شعر
البلاك فرايدي / السايبر موندي: عروض مختلفة كل يوم طول أسبوع البلاك فرايدي، ابتدت
الموقع/الماركة: سكن ستور | www.skinstore.com
شحن مباشر: متوفر
نوع المنتجات: منتجات عناية بالبشرة وتجميل
البلاك فرايدي / السايبر موندي: تخفيض 25% على مجموعة كبيرة من الماركات، وبعضها يوصل إلى 50%
الموقع/الماركة: فوريو | www.foreo.com
شحن مباشر: متوفر
نوع المنتجات: فرش سليكونية لتنظيف البشرة
البلاك فرايدي / السايبر موندي: 15% تخفيض على فرش لونا من تاريخ 23، بالموقع وفي نوردستروم
الموقع/الماركة: غلوسي ميك آب | www.glossymakeup.com
شحن مباشر: متوفر
نوع المنتجات: أدوات مكياج
البلاك فرايدي / السايبر موندي: 50% تخفيض يوم ٢٤ نوفمبر الجمعة مع إستخدام كود GMUBLACKFRIDAY
هنودي تمدح الرموش والاسفنجات.
الموقع/الماركة: لايم كرايم | www.limecrime.com
شحن مباشر: متوفر
نوع المنتجات: مكياج
البلاك فرايدي / السايبر موندي: تخفيضات متنوعة حتى 80%
الموقع/الماركة: هاوس أوف لاشز | www.houseoflashes.com
شحن مباشر: متوفر
نوع المنتجات: رموش
البلاك فرايدي / السايبر موندي: 30% على كامل الطلب باستخدام كود BLKFRIDAY من 22 إلى 24 نوفمبر 2017
الموقع/الماركة: بي إتش كوزمكتكس | www.bhcosmetics.com
شحن مباشر: متوفر
نوع المنتجات: مكياج
البلاك فرايدي / السايبر موندي: خصم حتى ٦٠٪ ينتهي نص الليل يوم الجمعة (بتوقيت الخليج بيكون السبت الظهر تقريباً)
الموقع/الماركة: أوفرا كوزمتكس | www.makeupgeek.com
شحن مباشر: متوفر
نوع المنتجات: مكياج
البلاك فرايدي / السايبر موندي: خصم 30% على كامل الموقع من اليوم حتى ٢٧ نوفمبر السايبر موندي
الموقع/الماركة: ميك آب جيك | www.makeupgeek.com
شحن مباشر: متوفر
نوع المنتجات: مكياج
البلاك فرايدي / السايبر موندي: خصم 30% على كامل الموقع من اليوم حتى ٢٧ نوفمبر السايبر موندي
الموقع/الماركة: بيوتي باي | www.beautybay.com
شحن مباشر:
نوع المنتجات: مكياج ومنتجات تجميلي
البلاك فرايدي / السايبر موندي: خصم حتى 30% على كامل الموقع
الموقع/الماركة: فايلت فوس | https://shopvioletvoss.com/
شحن مباشر: متوفر
نوع المنتجات: مكياج
البلاك فرايدي / السايبر موندي: خصم 35% على كامل الموقع مع كود BLACKFRIDAY35 + باليت هايلاتر ثلاثي مجاني مع الطلبات فوق ٢٥$
الموقع/الماركة: بنفت | https://www.benefitcosmetics.com/
شحن مباشر: غير متوفر يحتاج صندوق أمريكي
نوع المنتجات: مكياج
البلاك فرايدي / السايبر موندي: خصم 25% للطلبات فوق 50$ باستخدام كود BENEBINGE
الموقع/الماركة: كاميرا ريدي | https://camerareadycosmetics.com
شحن مباشر: متوفر
نوع المنتجات: مكياج ومنتجات تجميل
البلاك فرايدي / السايبر موندي: خصم 20% على كامل الموقع باستخدام كود BLKFRI20 ينتهي تايخ ٢٤ نوفمبر ٢٠١٧
الموقع/الماركة: كيلز | https://kiehls.com
شحن مباشر: غير متوفر يحتاج صندوق أمريكي
نوع المنتجات: عناية بالبشرة والشعر والجسم
البلاك فرايدي / السايبر موندي: خصم $20 على الطلبات فوق $65 باستخدام كود JINGLE ينتهي 30 نوفمبر
الموقع/الماركة: كيكو | https://www.kikocosmetics.com
شحن مباشر: غير متوفر يحتاج صندوق أمريكي
نوع المنتجات: مكياج ومنتجات تجميلية
البلاك فرايدي / السايبر موندي: ٣ قطع و٣ مجان ينتهي تاريخ ٢٦ نوفمبر
الموقع/الماركة: كوستال سنتس | https://coastalscents.com
شحن مباشر: متوفر
نوع المنتجات: مكياج
البلاك فرايدي / السايبر موندي: خصم 50-80% على كامل الموقع ينتهي تاريخ ٢٧ نوفمبر ٢٠١٧
الموقع/الماركة: إيست باي | www.eastbay.com
شحن مباشر: متوفر
نوع المنتجات: منتجات وملابس رياضية متنوعة
البلاك فرايدي / السايبر موندي: خصم 20% على الطلبات فوق $90
الموقع/الماركة: قاب | www.gap.com
شحن مباشر: غير متوفر – يتطلب صندوق أمريكي
نوع المنتجات: ملابس متنوعة
البلاك فرايدي / السايبر موندي:
الموقع/الماركة: أربان آوت فيترز | www.urbanoutfitters.com
شحن مباشر: غير متوفر – يتطلب صندوق أمريكي
نوع المنتجات: ملابس متنوعة
البلاك فرايدي / السايبر موندي: قطعة والثانية نص السعر، ينتهي 26 نوفمبر
الموقع/الماركة: فوت لوكر | www.footlocker.com
شحن مباشر: غير متوفر – يتطلب صندوق أمريكي
نوع المنتجات: منتجات وملابس رياضية متنوعة
البلاك فرايدي / السايبر موندي: تخفيض 20% على الطلبات فوق 99$ من 22 إلى 25 نوفمبر 2017 باستخدام كود FRI-DAY20 | تخفيض 25% على الطلبات فوق $99 من 26 إلى 28 نوفمبر 2017 باستخدام كود CY-BER25
لستة المواقع اللي بدت بتخفيض الـ 40% وبعضه يوصل إلى 70% الموسمي، هالتخفيض يكون بالتزامن مع البلاك فرايدي وبداية موسم الهوليدي، تقريباً يستمر لنهاية الستوك بس كل ماكان التسوق قبل كل ماكان الكولكشن المعروض أكبر، الكميات اللي تخلص تنشال من التخفيض، المنتجات المشمولة بالتخفيض تكون بقسم السيل، أغلبها يا مواقع ديبارتمنت ستور أو موقع الماركة نفسها...
| نوردستروم ~ Nordstrom |
| نيمن ماركس ~ Neiman Marcus |
| نت آ بورتر ~ Net A Porter |
| ساكس ففث أفنيو ~ Saks Fifth Avenue |
| ميسيز ~ Macy’s |
| بلومنغ ديلز ~ Bloomingdales |
| بيرغدورف غودمان ~ Bergdorf Goodman |
| بارنيز ~ Barneys |
| توري بورش ~ Tory Burch |
وبس هذا كان ختام موضوع البلاك فرايدي لهالسنة... تمنياتي لكم بتسوق مثمر، وعاقل ههههههه
ألاقيكم على خير
xoxo
![[ BLOGLOIN' ]](https://blogger.googleusercontent.com/img/b/R29vZ2xl/AVvXsEiY2hCQPo30fwI8jVJI4mfwxSM-C78H5PA512Sh-m3Dtro5Pij8UOtU2b03VEzeKiumw84JrJt2BFeuvaJy8aMeUMKMY1jlu_op3sAAG0HVwk-c-BJPUqt5BcnXoavPvj1VmkRx-vbvNqU/s1600/BlogLovin.JPG)
%2B(1).jpg)
No comments