[ رايي بآيفون إكس + أساسيات تعديل الصور، تنزيل خطوط بالآيفون وإضافة العبارات على الصور ]

السلااام عليكم ورحمة الله وبركاته

يسعد صباحكم أو مساكم وين ماكنتوا.

صارلي أسبوعين تقريباً من شريت آيفون إكس / ١٠ (أنا عاجبني اسمه إكس ما أسميه ١٠ 😁 الإكس أساساً هو الرقم الروماني لـ ١٠)

من يوم ماشريته وانا استخدمه لكل شي بالتصوير، حتى الصور اللي كنت أحتاج لها كاميرا صرت أغلب الوقت أستخدم كاميرا الآيفون؛ والأسئلة بسناب هالفترة كلها عن التصوير... فقلت أكتب عن رايي فيه وملاحظاتي ببوست كامل عشان بسهولة يكون موجود لأي أحد

طبعاً أنا مو اخصائية تكنلوجيا، ماراح اتكلم بالارقام ولا الرام ولا البكسل ولا ميغاهرتز البطارية أو (هالأشياء اللي انا نفسي اقراها وماعرف بالضبط شنو تعني بس اعرف انها شي واو 😂)

رايي وملاحظاتي عنه بتكون من ناحية الاستخدام الخارجي المعتاد. ببدأ بالأشياء الجميلة فيه وبعدها الملاحظات وآخر شي المختصر.

الشاشة:

أول شي مميز في الإكس مثل ما الكل يعرف هو التكنلوجيا الجديدة اللي خلته يكون عبارة عن شاشة كامل، بدون زر الهوم وبدون حدود، ماعدا القطعة الصغيرة اللي فيها الكاميرا الامامية والميكرفون.
شاشة القفل (وايد شكلها جميل تطلع الصورة كلها)

الشاشة الكاملة للحين ما اندعمت من كل البرامج بس عدد الابلكيشنات اللي تدعمها قاعد يزيد... الفرق واضح وجميل للاجهزة اللي تدعم الشاشة الكاملة عن اللي للحين ماتدعمها وتكون الشاشة مقطوعة من فوق وتحت بمستطيل صغير ويصير كأنه ايفون ٨ من ناحية الطول او ٨ بلس من ناحية العرض.

في الأبلكيشنات اللي تدعم الشاشة الكاملة يصير توزيع الاشياء والمحتوى بالشاشة مرتب وايد

شوفوا بعض الأمثلة من الأبلكيشنات اللي تدعم الشاشة الكاملة شلون طالعة حلوووة ومريحة للعين في الشاشة الكاملة:

بنترست، تويتر، إنستغرام (كل شي مدعوم بالشاشة الكاملة ماعدا الستوري لحين مقطوع)

هذا فرق واضح لشكل الشاشة بين ابلكيشنين متشابهين واحد يدعم الشاشة الكاملة وواحد لحين بمستطيل فوق وتحت، كتاب الكتروني في ابلكيشن iBooks بالشاشة الكاملة وفي أبلكيشن Kindle بالشاشة المقطوعة... واضحة المساحة الناقصة وبدون استغلال وشلون القراءة أسهل للعين بدعم الشاشة الكاملة

الشي الثاني ألوان الشاشة... شي خرااافي!! خصوصاً ألوان الصور تطلع مادري شلون ساحرة جذي على قيد الحياة😍💜 خصوصاً الصور اللي مصورة باضاءة حلوة!، قبل لما كنت اصور صورة بالكاميرا واعدلها وانزلها بانستقرام، تكون حلوة بس احس الوانها ابهت وبعض التفاصيل تخترب خصوصاً عند نص التوقيع يقل وضوحه وايد! اما بالإكس مغرمة بألوان الصور في انستقرام ووضوح التفاصيل حتى نص التوقيع وااضح وحاد، بروفايلات السفر او المصورين / البلوقرز اللي يصورون باضاءة طبيعية او اضاءة تصوير طالعة تجنن... تغذية بصرية

الكاميرا:

أجمل أجمل شي بالجهاز 😍💜💜💜 كاميرات الآيفون معروفين من زمان تصويرهم ممتاز خصوصاً بالاضاءة النهارية.

من آيفون ٧ بلس أبل ضافت خاصية البورتريه في الكاميرا، شنو هي خاصية البورتريه؟ هي الصور اللي تشوفونها تكون الخلفية ضبابية ومتداخلة ببعضها والشي الرئيسي بالصورة يكون الفوكس مركز عليه وتفاصيله كلها واضحة، هذا بلغة التصوير اسمه (عزل) بالكاميرات الاحترافية يتصور بأي عدسة فيها رقم صغير عند حرف الf وكل ماصغر الرقم زادت ضبابية الخلفية والعزل. في الايفون كانت تصير ببعض البرامج يدوياً

أنا ماستخدمت ٧ بلس، بس في الآيفون إكس انغرررررمت بنتايج هالخاصية، انا من قبل واحب العزل خصوصاً لما بصور منتج لريفيو او اكل او قهوة بالكانون دايماً احط فتحة العدسة على اصغر رقم عشان الاقي عزل ممتاز، فوجود هالميزة جاهزة في كاميرا آيفوني اللي استخدمه يومياً؟ ياسلام يا سلام!

الخاصية تحتاج شوي تعويد من ناحية المسافة، زاوية التصوير والفوكس، ومافيها تغيير يدوي لأي شي مثلاً درجة العزل او شي بعيد او مو واضح؟ لا م تحريك الاشياء وتجربة التصوير لين تكون النتيجة مناسبة والزوم مو شغال فيها بعد بس هي أساساً مقربة أكثر بوايد من التصوير العادي، الشي لازم المسافة بينه وبين الآيفون أقل من مترين ونص (يعطي تنبيه اذا وايد بعيد او وايد قريب)، مثال على الفرق بين الكاميرا العادية والبورتريه، البورتريه الصورة دايماً تكون أقرب من الكاميرا العادية

عقب التعود عليها تعطي نتايج جميلة واحترافية بضغطة زر... هذي بعض الصور اللي صورتها خلال هالاسبوعين، بعضهم بالبورتريه وبعضهم بالكاميرا العادية

الكولاج اليسار الصورة بدون أي إدت واليمين الإدت الأساسي اللي أستخدمه لأغلب الصو:

وهالصور تجربة الكاميرا بالليل بإدت بسيط للألوان والميلان، هالصور سيفت الإدت مباشرة نسيت أترك الأصليات للمقارنة:

صورة بالفلاش، تطور وايد الفلاش في الأجهزة الأخيرة، الألوان صارت طبيعية والتوزيع صح مو مثل قبل الألوان تصير غريبة أو الفلاش ضارب ومضيع ثلاث أرباع معالم الصورة!

تجربة البانوراما:

في البورتريه الأفضل تصورون أكثر من صورة وتتأكدون من النتيجة، احياناً العنصر الرئيسي ينعزل وتفاصيل الخلفية هي الي تكون واضحة… مثل هالصورتين، مع إن بالشاشة لما صورت كانت الخلفية هي المعزولة

اول مرة اجرب الميزة مثل ماقلت ماعندي ٧ بلس ماعرف مستواها فيه بس اعرف انها قوية بالايفون ٨ بلس خصوصاً ان كل برامج الصور داعمة شاشته العادية

الكاميرا العادية بعد فيها عزل بس عادي مو مركز مثل وضعية البورتريه بس له جماله خصوصاً اذا المنظر بعيد.

تصوير الفيديو البطيئ - السلوموشن بعد رائع… بس شرط لازم تكون الإضاءة قوية يا إما طبيعية إضاءة الشمس أو إضاءة صناعية نوع ممتاز، ولا بتطلع الاضاءة في الفيديو ترقش، بسبب إن هالاضاءات فيها حركة بس لأنها سريعة العيون ماتحس فيها، التصوير البطيء يوضها فتصير في الفيديو كأنه ليت بيبدا يحترق :/ مزعجة

وبعد بتصوير الفيديو (العادي مو السلو موشن) لاحظت إنه الصوت يكون واضح والازعاج بالخلفية تلقائي شبه يختفي، مثال قبل لما أصور سناب بالسيارة تتحرك والدرايش مفتوحة، صوت الهوا يطلع واضح ومزعج فوق صوت الاغنية، أما الحين هالشي وااايد أقل.. لاحظت كم مرة والهوا قوي اتوقع الفيديو بيكون كله ازعاج بس لا الاغنية تكون واضحة للحين كأنه صوت الهوا انعزل وتخفض صوته

حجم الجهاز، الفيس آي دي، زر الهوم، البطارية، والسكرين شوت

تغيير ثاني كبير بالأكس ان آبل لغت البصمة مع الهوم وصار مكانها بصمة الوجه الفيس آي دي مع وجود خيار فتح القفل بالرقم السري.

هالميزة من انعلن لها لقت هجوم كثر مالقت ترحيب... شلون اذا شيرت؟ شكثر فعالة؟ شلون ارفع الجهاز بكل مكان بس عشان افتحه؟ شلون عن المنقبات؟ اذا انفتح بصورة؟

كلها مخاوف مالها داعي، من ناحية رفع الايفون بكل مكان، اساساً زوايا بصمة الوجه تترتب حسب رغبة الشخص، تصير من تحت وتصير من فوق وتصير سيدة، انا مثلاً لما ضبطتها حطيت الايفون تحت اصير اطالعه جني منزلة راسي فالحين ينفتح جذي مايحتاي ارفعه، احيان قليلة الفيس اي دي يعلق مايشتغل الا بسحب الشاشة بس عادي ماياخذ خمس ثواني، أما الصور فماتخدع الكاميرا ولا الاقنعة المختلفة، في وحدة جربتها على عيالها توأم متطابقين ١٠٠٪ وانفتح الجهاز عالاثنين (اسمهم توأم متطابق!) أما في حالة النقاب بالاماكن العامة او لأي سبب يمنع استخدامها موجود الخيار الثاني الرقم السري.

حجم الآيفون الكلي أكبر بشوي من حجم ال٦-٦إس-٧-٨، بس الشاشة أكبر من البلس من ناحية الطول، في اليد بداية استخدامه يعطي شعور الصغر للي متعودين على البلس، لكن من ناحية الشاشة بالعكس تعطي شعور الكبر، إذا آبل نزلوا منه إكس بلس بيكون شي عظيم!

بدل زر الهوم صار في خط أسود بالجزء السفلي من الشاشة اخذ مكان الهوم المدور، سحبه على فوق بسرعة يفتح الشاشة الرئيسية، سحبه لفوق مع التعليق يفتح كل البرامج والضغط المطول على البرنامج يحط علامة ⛔️ لتسكير البرامج، للريستارت الزر الجانبي مع واحد من ازرار التحكم بالصوت، لما تطلع شاشة الطوارئ وشاشة التسكير يتسكر منها ومع ضغط الزرين مرة ثانية لين يفتح، السكرين شوت (تصوير الشاشة-الكابتجر) بالزر الجانبي اليمين مع زر رفع الصوت أما شاشة الكونترول فهي تطلع من سحب الشاشة من فوق لتحت من عند الساعة، وشاشة النوتفكيشن والتنبيهات تطلع من سحب نص الشاشة من فوق لتحت.

هذي الاستخدامات تحتاج تعود وتعتمد على الشخص وشكثر يتأقلم مع التغيير، انا مثلاً اتعود بسرعة فعلى طول اخذت على الوضع وصرت امسك ال٧ قدام ويهي وانتظره يفتح والمس نهاية الشاشة بدل الهوم😂

البطارية قوية، يبقى شغال حول ١٩-٢٢ ساعة بعد الشحن الكامل، حوالي ٧ منهم استخدام - يعني تقريباً يكمل يوم كامل لين ارد اشحنه، ماعدا اذا يوم صورت فيه وايد يقل الشحن اسرع، عموماً أداء البطارية ماحسه شي ثابت ينأخذ عليه للتقييم،

الأجهزة الجديدة الطبيعي تكون بطارياتها قوية ومع الاستخدام خلال سنة جذي يبدأ الأداء يقل.

الملاحظات

أكثر شي لاحظته إنه الشحن حسيته بطيء ينشحن، مادري هل لأن البطارية سعتها كبيرة وانا على طول استخدمه حتى وهو يشحن؟ الايفون إكس و٨ و٨بلس يدعمون الشحن السريع الشحن اللاسلكي بسبب كونهم مصنوعين من زجاج، بس الشحن السريع مو شغال مع أي محول حتى لو كان هو يدعم الشحن السريع، يحتاج محول آبل أو أي شركة مدعومة من آبل بواط، وكيبل يو إس بي سي :| يعني شغلة عويصة وتحتاج شراء زيادة!

أنا خذيت شاحن واي فاي من آنكر بس سرعته عادية كلش مو سريع مع إنه يدعم الشحن السريع، هو يشتغل بكيبل يو إس بي، فأتوقع لازم أشتري محول آبل، كيب يو إس بي سي - إلى يو إس بي عادي… وأشغل شاحن آنكر الوايرلس بالكيبل السي ومحول آبل عشان يصير شحنه سريع… باختصار وين اذنك يا جحا! حالياً أفضل أشحنه بشاحن آنكر المتنقل وكيبل آنكر اللايتنغ، أسرع من شحن الجدار وعالاقل قدر أستخدم الايفون واتحرك فيه بدون ما أفصله من الشحن كل شوي.

شي ثاني، الايفون إكس فيه ميزة بألوان الشاشة اسمها ترو تون TRUE TONE تكون مع اعدادات السطوع، هذي لما تكون مشغلة مفروض انها تخلي الشاشة تتأقلم مع الاضاءات المختلفة، ويتغير دفئ الشاشة حسب الاضاءة الخارجية عشان تكون مطابقة للطبيعة بكل الاوقات، هذا المفروض شغلة الترو تون.. أنا ماحبيتها مرتين اشغلها واحاول اتأقلم عليها وماحبها وارد أسكرها… أحسها تخلي الالوان دافية ومصوفرة بزيادة كأني فاتحة الوضع الليلي :/ مادري هل لأن انا أحب التون المزورق بالصور (البرودة) حتى في إدت صوري من جذي مو متقبلة الترو تون.

شي ثالث، الآي أو أس ١١ يعلق أحياناً، أنا ماصادفني بس أختي شارية آيفونها معاي وأحياناً يعلق، نوتفكيشن مثلاً يتم معلق على الشاشة ومايختفي، الشاشة تعلق كم دقيقة تتجمد… هذي كلها اشياء تتصلح بالسوفتوير ابديت وماتعني خلل بالجهاز كهاردوير، بس مملة… آبل في الفترة الأخيرة كثرانة الأعطال في السوفتوير أبديت.. ينزل أبديت ويطلع فيه كمن خلل وينزلون وراه كذا أبديت فرعي يالله تتصلح على الأعطال

سناب شات:

في مؤتمر الإعلان عن آيفون إكس كان في جزئية خاصة عن سناب بالتحديد وفلترات الواقع المعزز وغيرها، فالمتوقع كان ان الايفون اكس من ينزل بيكون سناب جات جاهز للشاشة الكاملة، بس الواقع لا! غير ان الشاشة مقطوعة بالمستطيلات، غير ان التصوير سيء لحد الآن... مايتقارن بالكاميرا الاصلية ابداً! لما تنفتح الكاميرا تكون بالشاشة الكاملة بس من تتصور الصورة تنضغط الصورة بالمستطيلات، والفوكس ينعدم تصير كأنها انهزت فجأة :/ وحتى في تشغيل الستوري بعد تكون مقطوعة من فوق وتحت.. والقطع ماخذ جزء كبيير من الصورة... أكثر حتى من الجزء المقطوع وقت التصوير

قبل كان تصوير سناب من ناحية الزاوية والتفاصيل في اخر الابديتات خصوصاً جميييل، اما بالاكس للحين بانتظار يدعم الوان الشاشة الجميلة وحجمها! الصور تطلع حلوة في حالة ان المكان اضاءته طبيعية وشمس وواضحة، حالياً كل تصويري بالكاميرا الاصلية بوضعية البورتريه وانزلهم في سناب، لين يتفرغون وينزلون أبديت يكون داعم بشكل كامل للآيفون إكس.

طريقة تنزيل الصور من الألبوم بدون فريم أبيض:

(هي شوي طويلة ويمكن تحسونها معقدة لكن بس تتعودون عليها خلاص تسوونها تلقائي!)

١. أصور الصورة بكاميرا الآيفون سواء بورتريه أو عادية

٢. أحطها بستوري إنستغرام (عشان تنقطع بحجم الشاشة الكاملة) وأحفظها من ستوري انستقرام للاستيديو

٣. أضيف أي ادت ابيه عليها، او التوقيع

٤. أنقل الصورة من الكاميرا رول لألبوم سناب شات

٥. من داخل إعدادات سناب شات:

Memories >> Import from Camera Roll

اختيار الصور اللي توها نقلناها لألبوم سناب شات

٦. وأخيراً من كاميرا السناب اختيار تنزيل صور من الاستيديو My Eyes Only او ميموريز واختيار الصور للتنزيل، لا تختارون من Camera Roll بيطلعون بالفريم الابيض، لازم من ماي ايز اونلي، معناته من فولدر سناب شات

هالطريقة تنزل الصور كاملة وبدون فريم ابيض، تنضاف عليها الستيكرات بس ماتنضاف عليها فلاتر المناطق.

انستقرام نفس الشي الستوري لحين ماتدعم الشاشة الكاملة نفس ماقلت، بس وضوح الصور فيها فرق كبيييير! انا حتى لما انزلهم بستوري سناب وانستقرام احس بعد انستقرام اوضح خصوصاً عند التوقيع يكون حاد! وتويتر الصور فيه وضوح كااامل بكل التفاصيل الدقيقة

هالصورة نفس اللقطة ونفس الاضاءة، شوفوا الفرق تصوير الكاميرا وتصوير سناب شات. الالوان ابهت بوااايد والفوكس اضعف، يسار بورتريه ويمين سناب

تعديل الصور:

أكثر برنامج أعتمد عليه للتعديل من سنين هو سنابسيد SNAPSEED اضيف منه نص التوقيع، اعدل ميلان الصورة اذا فيها شي مايل، واعدل ألوان وحدة الصور اذا بغيت ازيد او اخفف شي… كل التعديلات أسويها من هالقائمة، كل صورة يختلف تعديلها حسب احتياجها… الصور اللي فوق مقارنة قبل وبعد التعديل كلهم الادت في سنابسيد

١: تعديل TUNE IMAGE للألوان

٢. ROTATE للميلان

٣. DETAILS لزيادة حدة الصورة، يفضل استخدامه بحذر وبأرقام منخفضة إلى وسط لأنه يخرب الصورة أحياناً يخلي الخطوط بارزة بزيادة

٤. TEXT لإضافة نص على الصور، أستخدمه أكثر شي لجملة التوقيع

اللي يعجبني في سنابسيد وأشوفه مميز عن غيره، حفظ التعديلات والادت كفلتر جاهز، بعد ماخلص الادت وأحس ممكن استفيد منه في صور ثانية، أروح من قائمة LOOKS آخر شي يمين في علامة + تحفظ الادت بكل خطواتها، وكل خطوة تعديل تتغير من VIEW EDITS من الزاوية فوق، أنا حافظة نص التوقيع والكوبي رايت كلك في سنابسيد، عشان جذي دايماً السطر يكون في نفس المكان ونفس الحجم والشفافية بكل صورة.

لو بس يضيفون خاصية إضافة الصور والطبقات بيكون متكامل ولا بحتاج غيره! أنا استخدم PICSART لما أكون أستخدم توقيع جاهز بالفوتوشوب وابي أضيفه كصورة.

وللحفظ في سنابسيد ٣ خيارات، SAVE / SAVE A COPY / EXPORT

SAVE تحفظ التغييرات على الصورة الأصلية، وأي وقت تنفتح الصور بسنابسيد تكون التغيرات موجودة في الزاوية فوق يمين وكل ادت يتغير عادي

SAVE A COPY تحفظ نسخة ثانية من الصورة وتترك الأصلية، ونفس الشي أي وقت بسناب سيد يتغير الإدت

EXPORT تحفظ الصورة بنسخة نهائية بالتغييرات والادت، مايتغير فيهم شي

أما اذا بكتب عبارات وأضيف نصوص وابي اتحكم بالخطوط استخدم ابلكيشن فونتو PHONTO انزل فيه خطوط من النت اسوي سيرج تحميل خطوط مجانية او Download Free Fonts، اذا كان لنك التحميل شغال على طول بيطلع لنك أفتحه في فونتو وبينضاف الخط لقائمة الخطوط داخل الابلكيشن My Fonts

مواقع تنزيل خطوط عربية:
www.arfonts.net/
https://arbfonts.com/
https://www.ar-fonts.com/
https://fontface.me
https://soft.sptechs.com

وأتابع قناة مبدعين الفوتوشوب في تويتر، كل فترة ينزلون خطوط مجانية رائعة وجديدة
www.twitter.com/Mobdi3iPs

مواقع تنزيل خطوط إنجليزية:
https://www.1001freefonts.com/
https://www.urbanfonts.com/free-fonts.htm
www.fontspace.com/popular/fonts

وأستخدم بنترست بعد للخطوط المميزة خصوصاً الهاندرايتنغ والكاليغرافي
الخطوط تنتقل من آيفون للثاني يدوياً عن طريق الآيتونز.

أما لو بغيت اضيف صورة، مثلاً عبارة جاهزة استخدم ابلكيشن PicsArt من خيار Add Photo اضيفها (لازم خلفيتها بيضا او سودا) ومن BLEND اغير وضعيتها لMULTIPLY اذا كانت خلفية الصورة بيضا سودا او اذا كانت الخلفية بيضا، غير هاللونين ماراح تختفي الخلفية

العبارات أنزلهم من بنترست أو تمبلر. غالباً من صفحات الاشعار والعبارات ساعات تكون مخطوطات يدوية وساعات بالكمبيوتر، أنا أضيفهم على الصور وأتحكم بالشفافية والمود بدون ما امسح الحقوق اذا كانت موجودة، لأن صع الوصول لصاحب النص غالباً تكون منشورة بين بودر مختلفين او ملاقية ريبوستات وايد لما أكون شايفتها أنا.

،دايماً الناس عبالهم أنا كاتبتهم ببرنامج ويسألوني عن اسم الخط، بس الواقع أغلبهم جاهزين… أحياناً يخطر ببالي بيت شعر أو مقطع من أغنية فأتعنى أكتبه وأربته شوي في فونتو،

طريقة اضافة ودمج الصور بعد تستخدم لاضافة التوقيع او اللوغو اللي غالباً يكون جاهز بخلفية شفافة فتشتغل معاه كل الاوضاع مو بس الثلاثة اللي للخلفيات البيضا والسودا

الميزة في هالابلكيشنات انهم مايأثرون على وضوح الصورة الأصلية فماحاتي الكوالتي ينقص حتى لو درت عليهم كلهم

توني هالاسبوع نزلت Dark Room | Afterlight 2 شفت مصورة تصويرها يهبل بالآيفون ٨ بلس وتستخدمهم فقلت أجربهم.

التصوير على إنه ميزة كبييييرة بالجهاز، بس بالنهاية الآيفون ماراح يصور بروحه، على قولة المثل - الخيل من خيّالها، الجهاز رائع جداً لأي شخص عنده نظرة وموهبة التصوير من قبل، أحد عارف الزوايا والاضاءة والترتيب، أما اذا أحد ماله اهمام بالتصوير أو يصور صور عابرة مجرد رفع الجهاز وكليك بدون تضبيط زاوية ولا ميلان… ماراح تطلع الصور بيرفكت بالسحر.

أهم شي أنا عندي بالتصوير الميلان… أركز قدر الإمكان على العنصر الرئيسي وأغلب الخطوط بالصورة تكون مستقيمة، وأحاسب أترك مساحات زايدة بحدود الصورة، مثلاً لما بصور كوب.. أطلع شوي من أطراف الكاميرا يمين ويسار وتحت الكوب، حتى لو أشياء ما أبيها تكون بالصورة. ليش؟ لأن لما بعدل الميلان في واحد من الأبلكيشنات راح تنقطع أجزاء من حدود الصورة، فلما أكود مصورة الصورة وبالضبط على العنصر اللي أبيه، واحتجت أعدل ميلانها راح تنقطع أشياء مهمة من الصورة وتخربها! من وين أرجعهم بعدين؟ فيكون عندي زايد أشيله أحسن من ناقص يخرب لي صورة حلوة!

الزبدة،

الآيفون إكس تحفة فنية من ناحية التصوير والشاشة، بس هل هذي أسباب كافية لشراءه؟ الآفون سعره حول ٥٠٠ دينار بحريني - ٥٠٠٠ درهم/ريال يعني مو جهاز رخيص

- للي يستخدمون الآيفون والكاميرات الاحترافية للتصوير بشكل كبير (كتصوير حقيقي مو عشوائي) - كاميرا الآيفون إكس رائعة.

- إذا أحد أساساً ناوي يبدل جهازه ويدور جهاز، اللآيفون إكس خيار ممتاز.

أما، للي عندهم آيفون ٧ بلس؟ الجهاز فوق الممتاز وفيه أغلب المميزات في الكاميرا خصوصاً، وتوه كمل سنة من نزل.. فأنا اشوف اللي عندهم ٧ بلس ماله داعي يستعيلون على الإكس للحين إمكانيات ال٧بلس قوية ورائعة، وتكفيه إنتظار سنة، غالباً والمتوقع إن آبل بتكمل على تكنلوجيا الآكس في الموديلات الجديدة وتطورها، طبعاً ماراح تنزل أقل منها، أما الآيفونات الصغيرة مو البلس أساساً مميزاتها الكاميرا والبطارية والحجم أقل من البلس، فالفرق بيكون واضح وشاسع يستاهل الانتقال للإكس، وحتى من ال٦إس بلس أو ٦ بلس (أنا كان جهازي الشخصي الاخير ٦ بلس) بيكون فرق كبير ويستاهل التغيير بعد، كون ال٦ بلس أول جهاز نزل بالشاشة الكبيرة فالمميزات اللي فيه أغلبها بالمستوى الأساسي، منه للآيفون إكس بيكون فرق وتطور كبير جداً (تطورات ٣ سنوات تقريباً، من ٦بلس إلى ٦إس بلس إلى ٧بلس، ال٨ بلس نزل بنفس الفترة مع الإكس فمايعتبر تطوير منه كثر مايعتبر زيادة)

هممممم أتوقع بس هذا كل شي؟