[ سلسلة السفر / إيطــاليــا: رومـا والريف الإيطالي: توسكــاني ]

السلاام عليكم...

يسعد مساكم أو صباحكم وين ماكنتوا..

بوست اليوم بسلسلة السفر عن الأيام اللي قضيناها في روما وتوسكاني - الريف الإيطالي.

إن شاء الله تكون سلسلة السفر مفيدة لكم، أول مرة أجرب أكتب بوستات مخصصة للسفر والبوستات طويلة والصور وايد.. بس بنفس الوقت أحس أي إختصار بالنص أو بالصور مابينقل التجربة بشكل كامل!

بكون ممتنة لو حطيتوا لي آرائكم وملاحظاتكم عشان آخذها بعين اللإعتبار بالسفرات الجاية، أي ملاحظة بتكون مهمة لي سواء المعلومات اللي ذكرتها، لغة الكتابة، التصوير، اقتراحاتي، سواء زيادة أو نقصان.

سلسلة السفر بالترتيب: 

١. [ المواقع والأبلكيشنات اللي استخدمها للتخطيط قبل وأثناء السفر ]
[ HERE | هنا ]

٢. [ اليونـــان: أثينــا وسانتورينــي ]
[ HERE | هنا ]

[ رومـــا ]

محطتنا الأولى في إيطاليا هي العاصمة روما

السكن: فندق Hotel Agora

الوصول: ٨ سبتمبر صباحاً

الخطوط: طيران فيولنغ Vueling الإسباني من سانتوريني – الرحلة ساعتين

التنقلات: مشي، الباص العمومي، أوبر، ماي تاكسي، القطار والميترو.

الأيام: يوم الوصول + ٣ أيام كاملة

المخطط والهدف من الزيارة: تمشي، تصوير، زيارة الأماكن التاريخية والأثرية، زيارة الفاتيكان، التسوق

مختصر رومــا:

-     مناسبة لمحبين التاريخ والتفاصيل والتصوير، أنا أحب التاريخ وأستمتع بالتفاصيل المعمارية وجداً حبيتها من كل النواحي وماشبعت منها! أشوفها شاملة التاريخ، المعمار، التصوير، السوق، والأماكن الحيوية، أحتاج أرد أزورها، ولكن اللي يحبون الأماكن الحيوية والسوق وما عندهم اهتمامات تاريخية وأثرية، ماراح تعجبهم.. أختي مثلاُ اعتبرتها مملة.

-     الوقت: أشوف تكفيها خمسة أيام للاستكشاف بشكل عام وزيارة الأماكن الرئيسية وعالأقل أسبوع للاستكشاف المفصل الاماكن الرئسية والأماكن المحلية والشوارع خصوصاً لو كانت زيارات الأماكن السيايحة  مع الدخول، دايماً الإنتظار للدخول ياخذ وقت طويل من اليوم مو نفس الزيارة من برا، املحلات أكثر تسكر بعد الـ٩، وتبقى بس المطاعم.

-     السكن: مثل ماقلت اخترت منطقة عند محطة القطار الرئيسية تيرمني لأنها أول زيارة لنا وبسبب كبر مساحة روما، لو بزورها مرة ثانية أتوقع بختار السكن قريب عتبات كاظم الساهر أو عند الفاتيكان أو ساحة بوبولو مثلاً، المناطق حيوية ولطيفة.

-     الأكل: الأكل متفاوت من ناحية السعر وحتى الجودة، أفضل دايماً أبحث عن مطاعم أصلية ماتكون من المطاعم المنتشرة في الساحات وبمساعدة تريب أدفايزر وفور سكوير، السبب إن مطاعم الساحات غالباً تكون مطاعم هدفها السياح وأطباقها عامة وعادية وغالية، مستغلين المكان.. حتى ماتكون أكل إيطال أصلي، مثلاً مطعم كباب وبيتزا :/ ؟؟ عكس المطاعم اللي تكون بأماكن مخشوشة ومعروفة للسكان.. ممكن المطعم صغير (وفي كبار ومشهورين) بس الأكل يكون متخصص ولذيييذ وأصلي.

-      المواصلات والتنقل: تذكرة المواصلات العامة مفيدة جداً، في بيوم وبيومين وبثلاثة وأعتقد أكثر، احنا أخذنا تذكرة الـ٤٨ ساعة بـ ١٢ يورو وآخر يوم اخذنا تذكرة يوم بـ ٧، للشخص، تذكرة المواصلات العامة هذي تنباع في أكشاك الجرايد احنا خذناها من الكشك اللي داخل محطة القطار، تعطي رحلات غير محدود لكل المواصلات العامة: الباصات و المترو، أكثر مواصلات عامة ارتحنا لها كانت الباص، لأن الوقفات موجودة بكل الشارع والتعرف عليها سهل، رغم إن الشارع أحياناً يكون طوبي فتصير الرحلة مزعجة، المترو مفيد بس عيبه دايماً بالآندر قراوند خصوصاً اللي كان جنبنا بمحطة تيرمني يحتاج مشي مسافة وكذا  درج عشان نوصل لاين المترو، برامج التكاسي تحت الطلب شغالة في روما مثل أوبر وماي تاكسي، ماي تاكسي أرخص من أوبر، التنقل بالمواصلات العامة سهل ويوصل لأغلب إذا مو كل الأماكن العامة بس بعد مايبين جمال روما وتفاصيلها الا بالتمشي في الشوارع وخصوصاً الدواعيس الصغيرة.

-     المحلات والتسوق: المحلات متفاوتة أسعارها من الوسط للغالية، طبعاً محلات الهاي إند والماركات أسعارها معروفة، الحلو إن التسوق بروما جميل خصوصاً من ناحية الملابس.. البوتيكات المحلية ثيابهم حلوة قصات وخامات وألوان وأسعارهم متفاوتة ومعقولة أغلبها.

-     اللغة والتواصل والشعب: كلهم يتكلمون إيطالي ولكن التواصل أسهل بوايد من ماتوقعت لأن الفكرة العامة إن الإيطاليين مايتكلمون غير الإيطالية، بينما الواقع إن اغلب الموظفين والناس بالأماكن العامة يفهمون إنجليزي، بعضهم لغتهم الانجليزية ممتازة وبعضهم يمشون الحال، وحتى اللي مايفهمون إنجليزي يحاولون يطقطقون، والايطالية فها كلمات انجليزية محرفة حالها حال الاسبانية والفرنسية يعني كلمة هني وهناك ومع لغة الاشارة، يمشي الوضع ههههه، أخلاق الايطاليين في روما بالنسبة لي كانوا لطيفين وحبوبين.

-     الأجواء العامة: الأجواء كانت معتدلة ومتقلبة بنفس الوقت، أكثر من يوم طاح علينا مطر وماحملت الكاميرا، بس بالأيام اللي الجو كان صافي كان معتدل وحلو مع نسمات هوا تميل للبرودة  فالليل، وتميل للحرارة قريب الظهر.

-     الأمان: متفاوت حسب المنطقة، المناطق المزحومة مثل ساحة نافونا، عند نافور تريفي، محطات الميترو والقطار، التعرض للسرقة فيها سهل ولازم الحرص على الاغراض.

روما يا روما! جزئيتها بتكون عبارة عن كتاب!

 مدينة التفاصيل الجميلة والتاريخ والمباني الساحرة والأبواب والأعمدة والمنحوتات وكل شي كل شي! أحب لما اروح مدينة وأشوف لها طابع خاص، خصوصاً لما هالطابع يكون طابع تاريخ للحين محتفظة فيه المدينة ويبين واضح بكل مكان.. أكثر المدن اللي حتى الآن أغرمت فيها من هالناحية: باريس، وروما وبروج في بلجيكا.

الشوارع والمباني في روما أغلبيتها للحين على طابع البناء الروماني والمعمار الفاشي، أحجار، رخام، أعمدة، منحوتات، أقواس، قبب.. كل شي جميل من أكبر لأصغر التفاصيل والألوان.. فعلاً عشقت شوارع هالمدينة خاطري بس أتمشى فيها وأتأمل جمال هالتفاصيل

الفندق من بوكنغ.كوم ودرجته ثلاث نجوم، أكثر مدينة أخذت فيها وقت وتحيررت وأنا أدور سكن كانت روما.. السبب إن مساحتها كبيرة جداً جداً، وهذي أول زيارة لنا، فكنت مترددة بالمناطق، شفت وايد فنادق chain  أربع نجوم وفوق وحتى شقق من Airbnb بس كلهم كانوا بمناطق برا المدينة وبرا المناطق الحيوية، وأغلب التوصيات تفضل الحجز بمنطقة قريبة لهالمناطق عشان اختصار الوقت والمواصلات، فماحبيت أجازف مثل باقي المناطق بسبب المساحة الكبيرة فأخيراً استقريت على هالفندق عشان موقعه... بالضبط مقابل محطة القطار الرئيسية: تيرمني.

قضينا في روما أربعة أيام كاملة شاملة يوم الوصول اللي كان الصبح المبكر، أخذنا قطار وبعدها تاكسي للفندق، الجيك إن كان الساعة ٣ بس الحمدلله حظنا كان زين والغرفة جهزت على الـ ١١ لأن فعلاً كنا تعبانين ونحتاج راحة خصوصاً الليلة اللي قبلها بسانتوريني من قعدنا الصبح مانمنا لأن نص الليل كنا بالمطار عشان الرحلة. 

[ روما - اليوم الأول ]

بعد ما نمنا واسترحنا وسوينا ريفرش، حزتها ماكان عندي نت :/ اعتمدت على القانون الأوروبي الجديد إن أي رقم من أي دولة يكون شغال بباقي الدول مع كل الخدمات حتى الانترنت تلقائي وبدون تكاليف إضافية – وهالكلام تأكدت منه من موظفة فودافون أثينا لما شريت الرقم بس بإيطاليا ماشتغل النت! رحت فرع فودافون اللي بمحطة القطار وقالي ماعنده فكرة عن الموضوع وكنت محتاجة جوازي عشان اشتري رقم ايطالي فأجلت الخطوة لليوم الثاني وقررنا نستكشف المنطقة اللي احنا فيها عشان الرجوع يصير سهل حتى بدون انترنت.

تمشينا بالشوارع المحيطة بمحطة القطار وأول شي أكلناه في روما كان فواكه طازجة من كشك على الشارع

بعدها شفنا شارع فيه مطاعم فاخترنا مطعم عشوائي، طلبنا بيتزا مارغريتا وبروكيتا وباستا مشروم وعصير برتقال.

تقييم المطعم لا بأس، مو سيئ ولكنه مو إيطالي أصلي أو بالأحرى مو طازج، عجينة البيتزا كانت مضبوطة كريسبي والصلصة زينة بس الجبن واضح إنه جبن موزاريلا  مو طازج – المارغريتا الإيطالية مشهورة بالطعم الطازج، الموزاريلا وورق الريحان وحتى الصلصة فيها طعم الطماط الطازج.

ونفس الشي الباستا كانت بصلصة جبنية بيضا خفيفة وبارميزان ومشروم، يعني ككل الأكل طعمه كان جيد إلى جيد جداً ولكنه مو تجربة إيطالية حقيقية، بس سد جوعنا والسعر كان جداً معقول بعد، وعطانا طاقة عشان نكمل الجولة

الجولة اللي اكتشفنا فيها.. تااايقر! فلاينغ تااايقر.. aka النمر الطائر، أول شي خل أعبر عن إستغرابي إن شلوون ماكتشفت تايقر من قبل ولا مرة سمعت عنه! للسنة الثالثة أسافر أوروبا، وماقريت عنه ولا سمعت عنه ولا مريت عليه ولا أحد وصاني أروحه :/ شلوون؟  من شفناه بالصدفة في هالشارع في روما ودخلناه لأن من برا أغرانا.. قمنا نشوفه بكل شارع وترك طول ما احنا بايطاليا (وكل مانشوف واحد دخلناه) وطلع محبوب عند وايد ناس من تعليقات  سناب.. انزين ليش محد قال لي عنه من قبل؟ يمكن  في فرنسا وبلجيكا واسبانيا اللعام كان فيه أشيا غير ☹ إلا أكيد!

ماعلينا العوض بالجايات، متجر تايقر هو متجر من الدنمارك جميل ومنوع ورخيص ولطيف.. فيه كلللل شي تقريباً! اكسسوارات بيت، قرطاسية، اكسسوارات مطبخ، أكواب، قطع ديكور، الكترونيات، علب، مظلات، شنط أكياس، بهارات، سناكس، يعني شلون أوصفه؟ شي يشبه  تايبو، ويشبه دايسو ممكن؟ من ناحية التنوع والأسعار الرخيصة.. ولا ننسى الألوان الجميلة والديزانات اللطيفة والرسومات المعبرة... في موضوع مشتريات السفرة بصور كل شي اشتريته منه وبتعرفون من الصور والأشيا قصدي... وأكيد بتحطونه بلستتكم للمحلات اللي لازم تتسوقون منها (ملاحظة: يحتاج عالأقل نص شنطة فاضية لأنه يحممممس)

المهم اخذنا فيه وقت طويل نوعاً ما، واشترينا بعض التناتيش مع خطة الرجعة بعدين (للحين ماعرفنا انه مشهور وفيه له أكثر من ١٠٠ فرع في إيطاليا بروحها.. الدولة الثانية من ناحية عدد الفروع بعد إسبانيا)

من واحد من الشوارع اللي مرينا فيها اشتريت جيلاتو (آيس كريم إيطاليا) ماتذكر للأسف اسم المحل بس كان لذييييذ خصوصاً اللي بالبندق خيالي، واللي تبيع كانت إيطالية لطيفة  ماتتكلم انجليزي بس تفاهمنا معاها بالاشارات

بعدها قمنا نتمشى ووصلنا لشوارع التسوق والماركات المتنوعة من الهاي إند مثل ماكس مارا والمحلات العادية مثل زارا، والمحلات الابطالية المحلية، الحلو في محلات ملابس إيطاليا إن قطعهم وموديلاتهم وايد حلوة والكوالتي ممتاز، أما الأسعار متفاوتة من المتوسط للغالي. 

قضينا باقي الوقت في التمشي العشوائي وتأمل التفاصيل الجميلة في المباني، وبعدها رجعنا الفندق.. أحب لما أزور منطقة جديدة ويكون عندنا فيها أيام كافية ونخلي يوم واحد بس للتجول العشوائي بين الشوارع مشي.. حلو التعرف على الاوجه المختلفة للمدن وخصوصاً الأحياء الصغيرة والزوايا اللي مو الكل ينتبه لها، مو بس التركيز على النقاط السياحية المعروفة.

[ روما - اليوم الثاني ]

ابتديناه بفطور متأخر في الكوفي شوب المقابل للفندق، يقدم قهوة illy ومخبوزات طازجة متنوعة وبعض السندويشات، حبيت الدونت والكرواسون والقهوة ممتازة كانت لذيييذة جداً حبيتها مضبوطة، طول السفرة أطلب كابتشينو مع إني أفضل اللاتيه، بس لسبب ما غير معروف (ويقهر!) إنهم يقدمون اللاتيه في كوب زجاجي شفاف :/ أكره أشرب قهوة في كاس شفاف!-

قررنا اليوم هذا ناخذ الباص المفتوح السياحي بو طابقين اللي يدور بالمدينة ويوقف عند المعالم الرئيسية، كل مرة نسافر أمي يصير خاطرها تركب واحد من هالباصات الـ Hop In hop Off وهالمرة حققنا أمنيتها، هالباصات عادة تكون مملوكة لشركات سياحية مختلفة ومنتشرة بأغلب المدن العالمية، الفكرة إن بتذكرة وحدة لكل شخص تسمح بركوب باض هذي الشركة عدد غير محدود طول اليوم (خلال الساعات اللي تغطيها التذكرة) الباص يوقف عند كل معلم رئيسي، واللي يحب يشوف هالمعلم ينزل ويستكشفه من قريب وياخذ فيه الوقت اللي يبيه، وبعدها من نفس محطة الوقوف يمر باص تابع لنفس الشركة. وينأخذ للمحطة الثانية وهكذا، والباصات شكلهم كيوت ملونين بألوان فاقعة وطابقين وبعضهم بسطح مفتوح.. نفس ياصات الكرتون هههه، رحلتنا كانت من 3 العصر لين ١١ في الليل والتذكر حوالي ١٥ أو ١٨ يورو، والوقفات  أعتقد ٨ وقفات وعند محطة القطار اللي احنا ساكنين عندها في وقفة.

بس قبل الباص للغدا تعنينا ورحنا لمطعم مشهور بالأجبان.. أكلت خبز اللي يشبه البيتزا بالموزرايلا الطازجة وأختي خذت بالبوراتا والبيستو... صج صج كان لذييييذ!! اسمه روسكيولي Roscioli

وبعدها رجعنا ركبنا الباص، مانزلنا إحنا بكل الأماكن، نزلنا عند المسرح الروماني (الكولوسيوم)، نافورة تريفي (نافورة الحظ)، وسيرك ماكسيموس أما باقي المعالم شفناها من الطريق مع إني كان خاطري أنزل عند ساحة فينيسا وحتى بساحة الفاتيكان اللي للأسف مامدانا نرجع نزورها وماشفتها ☹، فكرة الباص حلوة للي حاب يتعرف على معالم المدينة ككل ومو عارف شنو يحط وشنو يشيل باللستة، أو مايعرف المسافة اللي تاخذها بين كل وقفة ووقفة وطريقة المواصلات المناسبة، بس أنا حسيت ١٨ يورو ماتسوى خصوصاً إنها بس للباص ماتشمل لا سعر ولا تخفيض على تذاكر دخول الأماكن، الباص العمومي عنده محطات قريبة لأغلب الأماكن وسعره رخيص خصوصاً بشراء تذكرة المواصلات العامة المفتوحة لعدة أيام.. مثلاً تذكرة اليومين بس بـ ١٢ يورو واحنا كانت عندنا ولو استخدمناها بدل هالباص كانت بتوفر علينا الـ٤٤ يورو اللي دفعناها لثلاث تذاكر، صح انها تشمل شرح صوتي عن اغلب الاماكن بس ماستخدمناه (افضل اقضي الوقت بالتصوير انا والاستكشاف بدل ما اقعد اسمع تسجيل وانا قاعدة داخل الباص وأنا أشوف المعلم عن بعد!) بس مثل ماقلت كانت أول مرة لنا بروما ومو عارفين المعالم القريبة من بعضها والوقت وطريقة الوصول المناسبة لكل واحد، وبعد أمي كان خاطرها فحققنا أمنيتها تستاهل.

[ الكولوسيوم / المسرح الروماني ]

من أهم معالم روما حتى للي مو مهتمين بالتاريخ لازم عالاقل عارفين شكله، المدرج/المسرح الروماني تم بناءه بين سنة ٧٠-٧٢ بعد الميلاد في حكم الامبراطور الروماني فلافيو فسبازيان وانتهوا من البناء منه سنة ٨٠ بعد الميلاد ومبنى بالكامل من الأحجار والخرسانة، كان يستخدم للمعارك المختلفة أيامها مثل المصارعة، المعارك بين السجناء، الحيوانات، للإعدام (!) وبعد كان يستخدم للتمثيل وإعادة المعارك الشهيرة والأعمال الدرامية. مع مرور السنين انهجر وفي فترة من الفترات ولمدة طويلة كان يستخدم كمخزن لمواد البناء، لين تحول لأهم معلم في روما - رغم إن الباقي منه حالياً أقل من الثلث من البناء الأصلي.

المبنى من برا بيضاوي وكله نوافذ مقوسة من برا.. هيبة ريحته تااريخ، وطبعاً المكان مزحوم، مادخلناه اكتفينا فيه من برا، السبب انه كعادة الأماكن السياحية، صف طووويل، وبعد شفته صوؤ من داخل ماعجبني وايد… يعني جماله وسحره أساساً بتصميمه من برا أحلى بوايد من داخل، وأنا بشكل عام مادري ليش هالأماكن الأثرية والتاريخية دايماً أهتم بتفاصيل البناء الخارجية أكثر من الداخلية، وبعد لأن المباني التاريخية من برا حتى لو كانت زحمة، بس المساحة اللي حولها مفتوحة والناس يكونون منتشرين، بعكس داخل المكان يكون محدود ووالناس متجمعين أكثر، حتى مايكون في مجال للتصوير :/

أخذت دورة كاملة حول الكولوسيوم: لاحظوا جماله من زواياه وارتفاعاته المختلفة هو مع القوس اللي جنبه.

هذا اليوم صادف ٩/٩/٢٠١٧.. تاريخ جميل بسببه شفنا هناك ٣ عرايس على أوقات متفرقة.. 

أول عروس ما شاء الله عليها رايقة زافينهم بسيارة مكشوفة كلاسيك وفستانها فيه ذيل ولابسة هيلز لوبوتان، ورايحة متسلقة السور الصغير وراكبة التلة الصغيرة! والمعرس ماسك ذيل الفستان.. والمصور معاهم، ويتسلقون هههه

أما العروس الثانية والله إني حبيتها عفوية وتونس شافتنا أنا واختي رافعين الكاميرا والتلفون ووقفوا لنا المعاريس وربعهم كلهم مع المصور للصورة… 

أما العروس الثالثة ناعمة ورقيقة ورسمية شفناها قبل لا نمشي.

بعده وقفنا عند سيرك ماسكيموس وشفناه من بعيد...

[ نافورة تريفي / نافورة الحظ ]

وصلناها مع غروب الشمس، مايحتاج أقول إن الزحمة ألللللف، مع إن النافورة نفسها كبيرة مو صغيرة، بس بسبب ارتباطها بالحظ والعالم كله يتمنى الحظ ههههه… مايحتاج أتكلم عن جمال النحت! نافورة تريفي من تصميم المعماري نيكولا سالفي وكملها بعده بييترو براسي، إرتفاعها حوالي ٢٦ متر وعرضها حوالي ٤٩ متر، ومبنية تحت قصر قديم مو مفتوح للزوار، هالنافورة في إعتقاد مرتبط بها إنها تحقق الأمنيات، بدأ هالاعتقاد من السنين القديمة قبل الميلاد لما كانت النافورة تجمع لطالبين الأمنيات المختلفة، الانسات اللي يتمنين الزواج، الزوجة اللي تتمنى أطفال، تصميم النافورة كله دليل على التقدم الهندسي في الحضارة الرومانية، تمثال الشخصية الأسطورية نبتون في الوسط على عربة تنجر بحصانين بحر وحوله الثلاث عذراوات اللي خلدتهم الأساطر الرومانية رمز للخصوبة والنقاء والجمال، أما البركة اللي ينزل فيها الماي بغزارة فهي تمثل المحيطات المائية في الكرة الأرضية، والدائرة البيضاوية تمثل الفصول الأربعة بتقلباتها المختلفة.

والأسطورة تقول إن طلب الأمنيات يكون برمي ٣ قطع نقدية معدنية، الظهر مقابل النافورة، كل قطعة تنرمي باليد اليمين من فوق الكتف اليسار في النافورة وحسب الأسطورة، القطعة الأولى تضمن العودة لروما وبالتحديد لنافورة تريفي.. لشكرها لتحقيق الأمنية، القطعة الثانية تضمن الوقوع في الحب (وبعض الأساطير تقول إنها تضمن حب إيطالي..!) والقطعة الثالثة تضمن الزواج (ونفس الإسطورة تقول من الإيطالي)، العملات اللي تنرمي في النافورة تتجمع من بلدية روما وتستخدم للهوملس والمشردين في روما.

عام ٢٠١٣، ماركة فيندي الإيطالية تكفلت بمشروع صيانة النافورة اللي إنتهت منه سنة ٢٠١٥ بتكلفة ٢.٢ مليون يورو ويعتبر أكبر صيانة في تاريخ تريفي حتى الآن، كل المبني والمنحوتات تنظفت بشكل كامل، الحروف اللاتينية تبدلت بجديدة، وحتى أنابيب وتوصيلات الماي والقاع.

رغم الزحمة الشديدة، اللي تخلي النافورة مكان للسرقة بسهولة، الأفضل تكونون حاملين أقل القليل.. بس معلم مهمة زيارته وأجوائه حلووة سواء للتصوير أو بس النظر أو تجربة الحظ.. مايضر يعني! ورجعنا لها صبح اليوم الثالث عشان نشوفها بضوء النهار قبل لا ننطلق لباقي البرامج

ومن أسباب شهرة النافورة بعد ظهورها بعدة أفلام: La Dolce Vita أشهرها، فلم كلاسيكي إيطالي من سنة ١٩٦٠  و Three Coins in The Fountain فلم رومانسي كوميدي من سنة ١٩٥٣، هالفلمين على اللستة ولازم أشوفهم قريب خصوصاً بعد مازرتها وحبيتها.

[ ساحة بيربريني ونافورة تريتون ]

هذي مو من المعالم الكبيرة المشهورة، بس مرينا عليها لما طلعنا من عند تريفي وتمشينا بالشوارع المحيطة ومحطة الباص كانت قريبة لهالساحة، هالساحة في وسط شارع تقاطعات عام وفيها نافورة تريتون الصغيرة (بالنسبة لتريفي) وحدة من النافورات العديدة من أعمال النحات الإيطالي بيرنيني،

 هالنافورة من القرن السابع عشر، من عمل النحات بيرنيني (جيان لورينزو بيرنيني) في ساحة بربريني، تمثل إله البحار تربتون اللي كان معروف بضخامة بنيته الجسدية والعضلية، وتحتها اربعة دلافين، النافورة مو من المعالم الرئيسية بس تستاهل التقرب منها والتمعن بتفاصيلها جم دقيقة خصوصاً إنها قريبة من تريفي.

وختمنا اليوم بعشا متأخر في مطعم قريب لساحة نوفانا، بيتزتهم كان شي لذيييييذ!!! المزاريلا والريحان فرش يمييي.. المطعم صغير جداً بس الويتر (أظن اسمه كان دافيد) كان حده لطيف وعلى طول عرف اننا نبي نطلب اشياء بدون كحول وبدون خنزير فساعدنا في الاختيار، وطلبنا سلطة الموزاريلا الفريش وفرايز مع جبن.. جداً حبينا هالمطعم

[ روما - اليوم الثالث ]

اليوم الثالث كان يوم مشي حر واستكشاف.. وتكسير ريول هههه… مرينا على أهم الساحات والشوارع الرئيسية في روما الجميلة.. طبعاً أنا أكثر وحدة استانست وفرحت بهالتمشي.. التفاصيل يا التفاصيل في روما! سحر سحر، وطبعاً الأبواب! أستمتع بأشكال أبوابهم المختلفة.. الألوان والمقابض والصبغة وقدمها وزوايا الباب

[ السبانش ستيبس ]

أول منطقة عامة رحناها  السبانش ستيبس وساحة إسبانيا

الساحة اللي تحت، ساحة إسبانيا (Piazza de Espan) ، هالساحة مقابلة للسفارة الإسبانية في روما وفي وسطها نافورة باراسيا، النافورة من أعمال النحات الإيطالي بييترو بيرنيني، ولد جيان لورينزو بيرنيني (اللي نحت نافورة تريتون اللي أمس)

أما العتبات نفسها فهي عبارة عن أدراج من ١٣٥ عتبة تم افتتاحهم عام ١٧٢٥ في عهد البابا بينيديكت الثالث عشر، عشان تكون وسيلة وصل بين سفارة إسبانيا تحت وكنيسة تيرينيتا مونتي اللي صايرة فوق.

هالأدراج والنافورة هم المكان اللي صور فيه كاظم الساهر أغنية [ قولي أحبك ] سبب إضافي عشان أوقع بحب المكان اللي هو أساساً جميل… مع إنه مزحوووم يعني كان عبارة عن مئات من الناس وشوية درجات هههههه.. بس والله جميل، هالأدراج من تصميم أليساندرو سبيتشي و فرانسيسكو دي سانكتيس

 هاليوم كان يوم ممطر والكل حامل مظلاته، المظلات الملونة بالزحمة عطت منظر حلوو

تصميمها عبارة عن أدراج عريضة ومن الجانبين بلكونات ودرايش وأبواب مزينة بالأصايص المختلفة والورود، وكل مارتفعت بانت روما من فوق، خصوصاً من أبعد نقطة عند الأدراج اللي تنتهي عن باب الكنيسة الصغيرة.. المنظر من هناك بانورامي جميل مع أسطح روما والقبب، كان حظي حلو وكنت هناك قريب الغروب.. للتصوير،

هالأدراج والخطوات الإسبانية مشهورة بالعالم لعدة أسباب خصوصاً عالمياً، طلعت في فلم رومان هوليدي للرائعة الجميلة أودري هيبورن، وبعد انذكروا وتصوروا بعدة أغاني أجنبية على مر السنين، ومن الأحداث المهمة اللي صارت فيها سنة ٢٠٠٩ إحياء الذكرى العشرين لسقوط حائط برلين بأجزاء منسوخة من الحائط اللي سقط سنة ١٩٨٩.

بالإضافة للخطوات والنافورات والمباني التاريخية، الشارع اللي قدام الستيبس شارع تسوق وكله بوتيكات ماركات ومحلات مختلفة منهم: تيفاني، كارتييه، ديور، قوتشي، دولتشي & غبانا، بولغاري، شانيل، سيفورا، وغيرهم… يعني يصلح للي يحبون التسوق وللي يحبون التصوير والتفاصيل

[ ساحة بوبولو ]

بعد السبانش ستيبس كملنا مشي لساحة بوبولو، ساحة ثانية من الساحات المشهورة في روما، هالساحة من أكبر الساحات المفتوحة في روما وكان لها دور كبير في القرن الثالث الميلادي، هالساحة كانت أول نقطة للزائرين سواء اللي بيدخلون روما تكون أول شي يشوفونه أو للي بيطلعون من روما، تكون آخر شي يشوفونه من روما، هالساحة من تصميم غوسيبي فالادير بين ١٨١١-١٨٢٢

في وسط الساحة والمعلم اللي يلفت الانتباه من بعيد، المسلة الفرعونية، هالمسلة أحضرها الإمبراطور أغوستس عام ١٠ قبل الميلاد لذكرى احتلال الامبراطورية الرومانية لمصر القديمة، المسلة تم بنائها عام ١٣٠٠ قبل الميلاد وموقعها كان في مدينة أون، مدينة أون (هيلوبوليس بالاغريقية) كانت مركز عبادة الشمس في مصر القديمة، هالمسلة تم نقلها من سيرك ماسكيموس إلى وسط ساحة بوبولو سنة ١٥٨٩ في عهد البابا سيكستوس الخامس.

في أحد الجهات المقابلة للمسلة، نافورة ديلا ديا، اللي تمثل نافورة عندها آلهة روما (ديا روما)  وسط منحوتين يرمزون لأنهار تايبر وأنيني، وهالنافورة تصير بالجانب المرتفع من ساحة ببوبولو ووراها ترتفع حدائق بينكيو، تماثيل هالآلهة ضخمــــة!.

ومن المعالم الثانية في الساحة، الكنيستين التوأم، كنيسة سانتا ماريا ديل ميراكولي وكنيسة سانتا ماريا مونتيسانتو، هالكنيستين انبنوا في نص القرن السابع عشر ميلادي، من بعيد يبينون متطابقين بس من قريب تفاصيل كل وحدة تختلف عن الثانية.. المضحك اني دورت بصوري وكل الصور مصورة بس وحدة منهم :/ الثانية يمينها

بعدها قررنا نكمل اليوم بتسوق قبل العشا، رحنا مجمع وحدة من البنات قالت لي عنه وكان برا مركز روم، احتجنا ناخذ اكثر من باص عشان نوصل له.. والمضحك لما وصلنا له اكتشفنا انه يسكر بعد ربع ساعة هههههه مقلب غبي! بس دخلنا ستارديفاريوس واشتريت جينز وقبعة شتوية جميلين واصباغ أظافر، والرجعة كانت بنفس الطول بعد :/ وختام هذا اليوم، اتجهنا لمطعم أوبيكا OBICA المشهور بالاجبان الطازجة وخصوصا البوراتا، هالمطعم مشهور جداً وله اكثر من فرع في ايطاليا وحتى فروع خارجية منها أمريكا، هاليوم كان مطر ودخلنا بدواعيس عشان نوصل له والحمدلله كان للحين مفتوح، جربنا البوراتا (جبنة طازجة تنصنع من الموزايلا والكريمة، تصير من برا مثل المطاطية ومن داخل كريمية مثل القشطة) والموزاريلا الطارجة.. وبيتزا مارغريتا بالموزاريلا الطارجة والطماط والريحان، بما ان المطعم ايطالي أصلي وتخصصه أجبان.. مايحتاج أقول إن البيتزا كانت فوق المضبوطة! ومعاها شربنا عصير برتقال.. على فكرة عصير البرتقال في ايطاليا لذيييذ دايماً يعصرونه فريش ويكون مايل للحموضة. هالمطعم شفنا اسم بكذا مدينة بعدين بس للأسف ولا مرة امدانا ناكل فيه مرة ثانية. 

[ روما - اليوم الرابع ]

نص اليوم هذا كان لزيارة متاحف الفاتيكان

الفاتيكان مقر الكنيسة الكاثوليكية هي أصغر دولة في العالم وموقعها شمال غرب مدينة روما ويفصل بينها وبين باقي المدينة أسوار ضخمة، كانت جزء من دولة إيطاليا حتى سنة ١٩٢٩ لما صارت سيادتها منفصلة ويديرها بابا الفاتيكان - القائد الروحي لأكثر من مليار مسيحي كاثوليكي حول العالم، المساحة الكلية للفاتيكان .٤٤ كلم مربع )حوالي ٤٤٠ متر مربع بس) وعدد سكانها حوالي ١٠٠٠ بس - كلهم من العاملين في الفاتيكان.

مدينة الفاتيكان مو كلها مفتوحة للزيارات، الأماكن المفتوحة هي متاحف الفاتيكان، السيستن جابل، ساحة الفاتيكان، كاتدرائية القديس بطرس ومؤخرا سمحوا للزيارة لحدائق الفاتيكان بشروط وأوقات خاصة، للأسف ماقدرنا نزور غير المتاحف والسيستين جابل، جداً كان خاطري أشوف الساحة وأدخل الكاتدرائية وأركب الأدراج اللي تبين منها الساحة بشكلها الدائري وروما من فوق، بس بعد ماطلعنا أخذنا لفة غلط وطلعنا برا فعشان نرد ندخل للساحة والكنيسة والادراج المشهورة كان لازم نوقف في الصف الطووويل مرة ثانية، حزتها امي كانت تعبانة من المشي وانا الانترنت انقطع في تلفوني فمشينا :( بس هذا عذر.. عشان لما تتحقق زيارتي لروما مرة ثانية بسبب العملة اللي رميتها في نافورة تريفي..) أزور باقي الاماكن في الفاتيكان! وغيرهم.

متاحف الفاتيكان، تحتوي على أكثر عدد على الإطلاق من الأعمال الفنية الأصلية في العالم باختلاف أنواعها، لوحات، منحوتات، مجسمات، وغيرها وغيرها، تم تجميعها للباباوات اللي مروا على الفاتيكان مع مرور السنوات، الفاتيكان يمتلك أكثر من ٧٠,٠٠٠ قطعة فنية، والمعروض منها في متاحف الفاتيكان حوالي ٢٠,٠٠٠ فقط! تم إنشاء متحف الفاتيكان من قبل البابا جوليوس الثاني في بدايات القرن السادس عشر، من أهم معروضات الفاتيكان الأعمال الفنية من عصر النهضة (الفترة الثقافية مابين القرن الرابع العشر والسابع عشر الميلادي) 

من أهمها أعمال مايكل آنجلو وخصوصا سقف السيستين جابل ومنحوتة فيرجن ماري (مريم العذراء) 

وأعمال رافاييل وخصوصاً غرف رفاييل

المتاحف عبارة عن ٥٤ ساحة عرض متداخلة مع بعضها البعض وبنهايتها السيستين جابل،  (كنيسة سيستينا)

بداية متحف الفاتيكان كانت بشراء منحوتة لاكون وأبناءه الرخامية من أكثر من ٥٠٠ سنة - هالمنحوتة تم اكتشافها تاريخ ١٤ يناير ١٥٠٦ في حقل عنب بجانب كنيسة سانتا ماريا ماغيور، وأمر بشراءها وقتها بابا الفاتيكان جوليوس الثاني بعد ماتم فحصها عن طريق مايكل آنجلو وجوليانو دي سانغالو اللي كانوا بذاك الوقت يشتغلون في الفاتيكان،

بسبب العدد الهاااائل والممرات المتداخلة والمتشعبة لمتاحف الفاتيكان، من الأفضل وضع قائمة بأهم المعالم اللي لازم تنشاف، ومكانها بالضبط

من أهم المعالم في الفاتيكان:

-          منحوتة مريم العذراء

-          أول منحوتة اشتراها الفاتيكان

-          غرف رافاييل.. بكل تفاصيل جدرانها واسقفها

-          السيستين حابل وسقفها اللي رسمها مايكل آنجلو شخصيا.

-          الأسقف! الجمال والتفاصيل في الأسقف أجمل من اللوحات اللي على الجدار.

-          منحوتات الآلهة الرومانية والإغريقية المختلفة

-          السلم الحلزوني الشهير...

استكشاف متاحف الفاتيكان يحتاج مشي ولياقة عالية! على الألأقل بيحتاج ساعتين ونص هذا لو ماشين بسرعة، غير الزحمة، حذاء راضي مريح مهم جداً.

بعد ماطلعنا من الفاتيكان مثل ماقلت ماقدرنا نروح الكنيسة ولا الساحة (للأسف ☹) رجعنا الفندق ومنها طلعنا أنا وأختي نتغدى وأمي اختارت إنها  ترتاح بعد المشي في الفاتيكان.

رحنا ساحة نافونا، أحد الساحات المفتوحة الشهيرة في روما، وطبعا ماتخلا من النافورات... علامة الجودة في روما، هالساحة مشهورة بتجمع الفنانين المختلفين من رسامين وموسيقيين بالخصوص، تغدينا في مطعم قعدته ومكانه روعة، مباشرة مطل على النافورة، مطعم بيرنيني، على اسم النحات: وسعادتنا كانت كبيرة لما عرفنا إن  الجزء الأكبر من أطباقهم ينطبخ بدون كحوليات.. لأن االمطعم عائلي ووايد عائلات يزورونه مع أطفالهم.

للمقبلات طلبنا شوربة طماط، وسلطة المطعم الخاصة، وللأطباق الرئيسية سي فود ريزوتو وللسويت تيراميسو وقهوة... كل شي بهالمطعم كان لذيييذ، مع إنه سعره غالي بس عشان مكانه ولذة الأطباق (والحجم راهي) والخيارات المتعددة بدون كحول، يسوى وبشدة.. السلطة الخاصة كانت بصلصة البستو الطازجة والجرجير.. شي لذيييذ.. أما السي فود ريزوز بصراحة ألذ سي فود ريزوتو كلته حتى الآن! (أنا خبيرة ريزوتو) وحتى الشوربة والتيراميسو.. والخدمة جداً لطيفة..

تمشينا بعدها في الساحة عند الفنانين والرسامين...  والنافورات طبعاً

وبعدها مرينا مرة ثانية عند عتبات كاظم الساهر.. عشان أعيد التصوير بالكاميرا، من حظي الحلو اليوم وصلنا عند الغروب وكان منظر العتبات من فوق ومنظر رروما من فوق مع الغيوم المحمرة لوحة فنية رائعة.

وهذي كانت وداعية روما... مدينة الجمال والتفاصيل والتاريخ وكل شي جميل.

موقع الفندق كان ممتاز جداً من ناحية المواصلات والوصول لكل المناطق المهمة في روما، لأن محطة القطار هي نفسها محطة الباصات الرئيسية وفي الأندر قراوند محطة مترو،، والتكاسي متوفرة وحتى المشي للمحيط وباقي المناطق سهل، أما مستوى الفندق نفسه فكان أقل من عادي، الفندق نفسه في بناية وبعض الطوابق مأجرة للفندق، فيه لفت بس جداً صغير يشيل شخص واحد وشنطتين في المرة الوحدة، واخترب آخر يوم بعد! بالنسبة للغرفة فمستواها  جيد جداً، أحسن بوايد من المبنى ككل والمدخل، الديكور بسيطة بس مرتب ونظيف، الأسرة جداً مريحة والشراشف بيضا وجديدة ونظيفة، والحمام كان ديكوره مودرن ونظيف جداً... أقدر أقول إن مستواه ممتاز، النقطة السلبية الوحيدة إنه اوضح إن الغرفة مخصصة لشخصين وانضاف لها سرير ثالث (في بوكنغ الحجز كان لغرفة مخصصة لشخصين، مو مختارة خيار اضافة سرير على غرفة لشخصين) فالنتيجة كانت إن الغرفة صارت مرعوصة وصغيرة، ومع شنطنا صار يادوب في مكان للتنقل هههه، أما الفطور يوصل للغرفة ماعجبنا انا واختي وعلى آخر يوم عرفنا إن نقدر ماناخذه وبداله نحصل كوبونات للكوفي شوب المقابل لقهوة أو عصير وشي من المخبوزات، هذا الخيار كان ممتاز لو اكتشفناه من البداية لأن الكوفي شوب قهوتهم لذيذة ومخبوزاتهم طازجة. 

صور وتفاصيل من رومـــا: 

[ توســكــانــي ]

محطتنا الثانية كانت في توسكاني / الريف الإيطالي

السكن: غرفة في فلة للإجازات 

الوصول: ١٢ سبتمبر عصراً 

الخطوط: رحلتين قطار، الأول 3 ساعات و 17 دقيقة من روما إلى فيغلين فالدارنو، تبديل إلى قطار محلي للوصول إلى محطة سانت إليرو خلال ربع ساعة، الوصول إلى البيت بسيارة صاحبة الفيلا الخاصة، حوالي 20 دقيقة من محطة القطار إلى البيت قريب الجبل، على مرتين لأن سيارتها صغيرة ماكفت شنطنا

التنقلات: مش حول المزرعة، سيارة محطة القطار يوم المغادرة، نفس الشي على مرتين

الأيام: يوم  الوصول + يوم كامل.

المخطط والهدف من الزيارة: إسترخاء وتصوير.

• مناسبة للاسترخاااء والتغذية البصرية وشم الهوا النظيف وطبعاً التصوير.
• الوقت: على حسب المزاج والوقت اللي يكفي للاسترخاء، ووجود السيارة، لو عندنا سيارة عادي نقعد حتى ٣ أو ٤ أيام لأن بنزور الأماكن المحيطة حتى السوق.. فيها آوتلت قريب.
• السكن: الفيلا كانت كبيررة وشرحة، الغرفة نظيفة وحتى الحمام وانتوا بكرامة مستواه مستوى فنادق
• الأكل: ريوق كان طازج ومتنوع ولذيذ، والعشى اللي اكلناه مرة وحدة كان بعد لذيذ وسعره معقول.
•  المواصلات والتنقل: مثل ماقلت بدون سيارة مافي مجال للتنقل غير المشي في الانحاء.
• المحلات والتسوق: المزرعة بمنطقة معزولة ومافيها أي محلات توصل بالمشي. 
• اللغة والتواصل والشعب: مع ان لغة مونيكا الانجليزية ضعيفة جداً بس الظاهر لغة الامهات عالمية بكل مكان  هي وأمي صنعوا لهم لغة تواصل خاصة ههههه مع الاشارة والحركات.
• الأجواء العامة: الأجواء كانت جميلة، من الصبح وفي الليل تميل للبرودة وباقي اليوم الجو معتدل وصافي، اليوم اللي طلعان كانت مبتدي يطيح مطر خفيف. 
• الأمان: جداً منطقة أمنة ومسالمة.

الريف الإيطالي! خضار على مرمى النظار، أشجال، جبال، سهول، ورود، أكواخ، مزارع، حقول.. تذكروا مسلسلات الرسوم القديمة هايدي، لوسي، فتاة المراعي؟ الريف الإيطالي توسكاني/توسكانا بعتبر من الأجمل في العالم... لما شفت صوره وانا أجهز للسفرة قلت لازم لازم نزوره لو يوم بس! المعضلة كانت إن أغلب المناطق تحتاج تنقل بالسيارة لأنها معزولة عن المواصلات العامة، يا تكون بوادي أو فوق جبل، محطات القطار غالباً تكون بعيدة وبرا المنطقة السكنية، المناطق لا تعد ولا تحصى وكل وحدة تقول الزود عندي من ناحية الجمال الخيالي والخضار، بحثت وبحثت لما حصلت هذا المكان في بوكنغ.كوم، فيلا فرنسيسكا، لأن فيها محطة قطار قريبة وصاحبة المكان (مونيكا) تقدم خدمة التوصيل من وإلى المحطة بـ ٥ يورو للرحلة الوحدة، 

المكان هو فيلا فرانسيسكا، إحنا حجزنا عبارة عن غرفة لـ ٣ أشخاص ومعاها حمام كامل منفصل (مع الشاور وكل شي) شامل وجبة الفطور، وباقي مرافق البيت مشتركة، صاحبة المنزل مونيكا نفسها هي ساكنة بالبيت وتتولى مهمة الضيافة والوجبات، الفطور ضمن الحجز وممكن طلب وجبة عشاء بسعرها، والبيت فيه أكثر من غرفة للايجار بنفس الطريقة، المرافق الباقية عامة، اليوم الاني من وجودنا تلاقينا مع زوجين ألمان على العشا والريوق، وقريب طلعتنا شفنا بعد اثنين كبار.

الفيلا معزولة ومافي قريب منها أي سوبرماركت ولا مطعم، خبرتنا من قبل فاشترينا بعض الفواكه والسناك من السوبرماركت في محطة القطار قبل طلعتنا من روما، ولأن ماعندنا سيارة فهاليوم ونص قررنا نقضيهم بس للاسترخاء والتغذية البصرية وتجربة الحياة الريفية، 

احنا وصلنا محطة القطار العصر قريب الخمس ومونيكا كانت تنتظرنا، بس لأن عددنا ٣ وعندنا ٣ شنط كبار وشنطتين صغار وهي سيارتها صغيرة، فنقلتنا على دفعتين، الطريق ياخذ ثلث ساعة فلما وصلنا الفيلا وبعد ماحطينا اغراضنا كان آخر ساعة تقريباً من النهار – الشمس تغرب  بعد السبع ونص قريب الثمان، فبعد ماحطينا اغراضنا وعرفتنا مونيكا على البيت أخذنا فرة سريعة في الحديقة عند اشجار الليمون، الفيلا صايرة مرتفعة وحولها من جانب جبال وبواحد من الجوانب غابة، والمنطقة املحيطة عبارة عن مزارع محلية وأشجار وطرق ريفية وحقول العنب والتوت والبري وأشياء ثانية، وشجرات الليمون.. باختصار لوووووحة من الطبيعة!! الفيو من الفيلا يجنن خصوصاً من الجانب الجبلي... المنظر خيااالي لأن يبين فيه البيوت الأبعد اللي صايرة بالجانب المنخفص وبعد يبين الجانب الأعلى من الجبل، أما الجانب الاني هو غابة وانا شوية فيني فوبيا من منظر الأشجار المتداخلة والغابات ههههه خصوصاً إنها صايرة على سفح مايل..فطالعتها من بعيد لبعيد.

[ توسكاني - اليوم الثاني ]

قعدنا ولا الريوق جاهز.. غرفة الوجبات في الطابق الأول والغرفة فيها درايش من الثلاث جهات، جهة على الجبل وجهة على الغابة وجهة على ساحة المنزل الخلفية، والريوق ريفي لطيف، خبز، زبدة، بيض مسلوق، أجبان، مربى، قهوة، عصاير،

بعد مافطرنا أنا وأمي طلعنا نتمشى حول البيت وأنا بكاميرتي طبعاً، طلعت من المزرعة تمشيت حولها.. والصور تحكي عن الجمال! 

وشفت هالشجرة كلها ثمار زرقا ماعرف شنو بالبداية توقعتها بلوبيري طلعت لا، مع  السيرج أعتقد إنها توت الأساي، هالشجرة موجودة على جوانب الطريق العام مو تابعة للمزارع، فتليقفت وأكلت منها ههههه مع إن مفروض ما أجازف لأن ممكن تكون سامة! بس الحمدلله مو سامة وماصادني شي هههه.. 

وشجيرات العنب... وحدة من المزارع على الطررريق كانت مليانة عناقيد عنب أزرق وللحين ما انقطفوا.. سبحان الله شوفوا الجمال....!

وبعد في أشجار زيتون بس وقتها كان الزيتون للحين مو ناضج، 

وهذي باقي المناظر اللي كانت محيطة بنا بكل مكان.. الجو يومها كان صافي ومعتدل والغيوم بيضا تجنن، راااااحة نفسية، مثل ماقلت بسناب هذا اهدأ يوم مر وبيمر علي بسنة ٢٠١٧ ههههه هوا نظيف وهدوء وماغير صوت العصافير.. من كثر الهدوء حتى صوت الفراشات والنحل ينسمع، وعلى الطاري.. عيب المكان الوحيد اللي ماحسبنا له حساب القرص.. يا إن جلدي صار وجبة شهية للبعوض!! وانا واقفة أصور أطالع ولا البعوض متكين علي يمصون من دمي :/ كان مفروض نفكر فيها وناخذ معانا مرهم للقرص.

هاليوم قررنا نطلب من مونيكا عشا، مونيكا لطيفة وتجنن، الفيلا أساساً وارثتها من جدتها وحالياً هي ساكنة فيها بروحها، زوجها يشتغل في دبي وعيالها يدرسون في فلورنس، تقريباً عمرها بالستينات، سوت لنا العشى باستا بصلصة البيستو ولأمي سلطة، لأن باقي الخيارات كلها يا إما فيها خنزير ماناكله أو كحول.. باستتها كانت لذيييذة والله مع انها بيستو بس. وحتى السلطة عجبت أمي، واليوم الثالث ماقصرت مع إنه عادةَ يوم الجيك آوت مايكون محسوب معاه الريوق بس لا هي سوت لنا الريوق وقالت لنا لازم تتريقون أول وبعدها أوصلكم القطار. 

لأن احنا ما كان ماعندنا مواصلات خاصة (نتخوف من فكرة السياقة في أوروبا للحين)، فماطلعنا مكان بهاليوم ونص وتركناهم للاسترخاء وراحة البال والتمشي في حدود المكان، أتخيل لو مستأجرين سيارة نسوقها كان بيكون شي خيالي بنقدر نشوف وايد اشياء تجنن ومن قريب! منطقة وأجواء فعلاً تستحق التجربة... وأكيد بعيدها مرة ثانية وبسيارة هالمرة عشان تكون التجربة متكاملة.

وهذي كانت الأيام اللي قضيناها في روما والريف الايطالي، أعتذر عن عدد الصور الكبييير والتفاصيل بس ماقدرت أختصر أكثر من جذي حسيت بلغي وايد من تفاصيل وجمال روما! أكثر جزئية استمتعت بها من السلسلة هي جزئية روما رغم إنها الأكبر والأطول، 

ألاقيكم على خير مع بوستات باقي مدن إيطاليا.
إلى اللقاء.