السلام عليكم ورحمة الله وبركاته
يسعد مساكم أو صباحكم وين ماكنتوا.
١٠:٤٠ صباحاً
من الباخرة المتجهة إلى جزيرة سانتوريني من أثينا / اليونان
بجرب لأول مرة أكتب تقرير سفر، السنة اللي فاتت كنت ناوية بعد ما أرجع أكتب شي مشابه لأنها -تقريباً- كانت أول تجربة لي بترتيب سفرة متكاملة من الألف للياء، بس تميت أأجل وأأجل لين خلاص كل مابغيت أبدأ أكتب ماعرف شنو أكتب وأغلب المعلومات نسيتها! فالسنة قلت بكتب التقرير بشكل تدريجي، مختصر لكل يوم، وبشوف حسب كمية كتاباتي إذا أقسمه على كذا جزئية عشان يكون أخف وأسهل للقراءة، بما إنها تجربة جديدة فأتمنى تعطوني ملاحظاتكم شنو حبيتوا وشنو الي ناقص أو حتى شنو اللي ماله داعي، ممكن تكتبون لي كومنت هني أو حتى بوحدة من قنوات السوشيال ميديا، علشان أعرف مستقبلاً شلون أطور هالنوعية من التقارير.
أول شي ببدأ بالتخطيط للسفر، أنا أحب أخطط لكل شي ماحب أبداً أستخدم الخدمات الجاهزة مثل الرحلات المدفوعة أو السياحية، أنا أبداً التخطيط والبحث قبل بمدة شهور، حوالي ٤-٥ شهور على الأقل وأستقر على كل شي نهائياً بالتدريج لين آخر شهر قبل السفر
أول شي نحدد الدول اللي بنسافر لها، والوقت - في البداية مايكن التاريخ محدد بالضبط بس الشهر والمدة التقريبية ، علشان لما أسوي سيرج وأجمع معلومات أعرف أهم الأشياء اللي لازم أحطها بالبال:
- السياحة بهالوقت في الدولة (ماحب المواسم السياحية وأفضل أتجنبها قدر الامكان، بنفس الوقت أراعي اختار وقت يكون فيه الجو بالدولة اللي بروحها جميل ولطيف، لا حار بزيادة ولا بارد بزيادة لأن الاثنين يعيقون الحركة ويتعبون)
- الجو المتوقع (صيف/شتا/خريف/مطر) عشان تقدير كمية ونوعية الملابس
- المدن المناسبة للزيارة بهالوقت من السنة في الدولة المختارة
- متابعة أسعار التذاكر والسكن في هالوقت
بعد ما نستقر على الدول، إختيار المدن شوي ياخذ وقت أطول - بس دايماً أفضل مع تحديد الدول أثبت أول محطة وآخر محطة، لأن فيهم بتكون تذاكر السفر الرئيسية، الذهاب والآياب، غالباً نسافر لدولة ونرجع من دولة ثانية فحجزنا يكون تذاكر مفردة Multi Destination و One-Way نادراً مانحجز Round-Trip إلا للرحلات القصيرة الأقل من أسبوع، قروبنا اللي يسافر كلنا نشترك بحب استكشاف دولتين عالاقل بكل سفرة.
فـ الخطوة الأولى هي:
تحديد الدول - تحديد مدينة وتاريخ الوصول - تحديد مدينة وتاريخ المغادرة
مثل ما قلت التاريخ مايكون محدد بالضبط بس دايماً أكون حاطة ببالي أسبوع السفر وأسبوع الردة، السبب إنه تذاكر الطيران أحياناً يفرق سعرها حتى باليوم الواحد، فأنا خلال كم أسبوع جذي (أول ما ابتدي تخطيط) أراقب أسعار الطيران خلال هالأسبوعين وأشوف أفضل الرحلات المتوفرة سواء من خلال الوقت أو الترانزيت أو السعر.
أما الخطوات التالية من التخطيط والتجهيز، أغلبها إذ مو كلها عندي تقريباً إلكترونية… اللي متابعيني بسناب يعرفون وكذا مرة تكلمت عن اعتمادي الكبير على الابلكيشنز، أحب كل فترة أكتشف أبلكيشن جديد يسهل لي أمور الحياة اليومية.. الآيفون عندي مهم جداً وكل ديرة أزورها لازم أشتري رقم وأتأكد غنه عندي شاحن متنقل يكفيني شحن مرتين عالاقل.
فبالنسبة للسفر، هذي البرامج اللي أستخدمها وأعتمد عليها، مرتبة حسب وقت استخدامها ومراحل التخطيط للسفر:
KAYAK
لتذاكر الطيران أعتمد إعتماد كلي على شي واحد ماغيره
كاياك هو موقع وأبلكيشن للبحث عن تذاكر السفر، الفنادق والسيارات، أنا استخدمه بس للطيران.
فيه خيارات متعددة ومفيدة واستخدامه جداً سهل، ويفضل تسجيل الدخول فيه بحساب قوقل أو الفيس بوك عشان خاصية الحفظ بدل ما كل مرة أسوي سيرج يديد.
فكرة الموقع بسيطة: بعد مايتحدد مسار الرحلة (من/إلى) يتكفل هو إنه يعرض كل شركات الطيران اللي عندها هالرحلة بهالتاريخ، وبعدين بخيارات الفرز المتعددة أختار اللي يناسبني، مثال على الخيارات المفيدة الموجودة بالموقع: عدد الوقفات (الترانزيت)، نوعية الرحلة (نهارية/ليلية)، تحديد شركات طيران محددة تطلع بالبحث أو حذفها، وقت الرحلة (صباح/مساء/عصر) وبعد يعرض معلومات مفيدة عن الطيارة، الأسطول، رقم الرحلة،
الموقع يتعامل مع شركات الطيران مباشرة وبعد مع مواقع الحجوزات، فأحياناً تطلع عروض ماتطلع مباشرة بموقع الطيران، على قولته Secret Deal، أنا لما أشوف رحلة تعجبني أروح أجيكها مباشرة من موقع الطيران إذا كان السعر نفسه أحجزها من موقع الطيران إذا في فرق أحجزها عن طريق كاياك - الحجز من خلاله يا عن طريق الطيران نفسه او عن طريق احد المواقع الوسيطة بس كلها مضمونة.
جربت كذا مرة البحث بال Multi Destination إن رحلة الذهاب والرجعة وأحياناً حتى الطيران الداخلي كلهم بحجز واحد بس لا ماحبيت الطريقة لأنها شوي تقيد يعني تكون رحلات محددة لكل خط مربوطة مع بعض وماقدر اغير فيهم، فالطريقة الأفضل عندي إن أحجز كل خط بروحه كـ One Way.. مرنة أكثر إني أختار الأوقات والخواص اللي تناسبني، وبعد لو بغيت أغير التغيير أسهل لرحلة وحدة.
وفيه فكرة انه يسوي مجلد لكل رحلة، مثلاُ لما أبي أسافر إيطاليا وأسوي سيرج لرحلات طيران من البحرين لروما مثلاُ، وبعدين داخل ايطاليا اسوي سيرج لرحلات طيران داخلي بين كذا مدينة إيطالية وأحفظ الرحلات اللي اشوفها مناسبة من ناحية السعر والوقت، اوتوماتيك بيسوي مجلد يحفظ فيه كل الرحلات اللي حفظتها ومرتبة حسب التاريخ والسعر موجود.
ولو سويت سيرج بدولة ثانية وبشهر ثاني بعد بيرد يحفظهم أوتوماتيك بمجلد ثاني يسميه باسم الدولة، وأقدر يدوياً أنا اغير المجلد مثلاُ بغير الدولة بس أبيها تكون بمجلد الدولة الأولى، أحفظها.
ميزة ثانية بالموقع غير الحفظ إنه يعطي تنبيهات لتغير السعر سواء نزل أو إرتفع، ويرتب الرحلات بالتتابع بالتواريخ تحت سفرة وحدة أنا أسويها… وأحياناً يعطي نصيحة إن حسب المتوقع ترتفع الأسعار أو لا… استفيد من تنبيهات تغير السعر خصوصاً بالبداية قبل ما استقر على المدن أسوي سيرج متعدد.. فلما أشوف السعر محفوظ أقدر أختار المناسب لي واستقر عليه واقارن بين الوقت والترانزيت والسعر، بدل ما كل مرة اسوي سيرج جديد.
فاستخدم كاياك لكل اللي يتعلق بالتذاكر، أحياناً احجز منه إذا بغيت حجز متعدد واكثر من خط بس اذا رحلة وحدة أجيكها بموقع شركة الطيران إذا نفس السعر احجز من الطيران مباشرة اما اذا سيكرت ديل أحجزها من كاياك.
BOOKING
الأشهر من نار على علم للفنادق وسكن السفر بوكنغ طبعاً، لما أبداً أحط المدن والتواريخ المبدئية ببالي على طول أروح أسوي سيرج مبدئي ببوكنغ.. عشان أشوف شلون مستوى الأسعار والزحمة، عادةً أسوي سيرج بالتواريخ المبدئية اللي محددتها وأسوي سيرج بتاريخ قريبا وتاريخ بعيد، مثلا قبل/بعد أسبوع وبعد شهر.. عشان أعرف الاسعار في التواريخ المبدئية هل هي طبيعية ولا مرتفعة واذا مرتفعة معناه زحمة هالمدينة بهالوقت، الميزة الجميلة في بوكنغ هي الالغاء المجاني، الفري كانسليشن.. فأحياناً لما أشوف سكن أحسه صفقة من ناحية السعر والريفيوز والمكان.. وموجود فري كانسليشن على طول أحجز بدون تردد، عاد بعدين لو صار وتغيرت التواريخ أو المدن مافي مشاكل أبدل الحجز.
هذا بعد يعطيني فرصة إني أدور مساكن باختيارات متعددة على راحة قبل السفر بوقت وبعدها قريب السفر أختار المناسب من كل النواحي لكل المدن اللي استقرينا عليها.
غالباً الحجز المبدئي حتى لو كان فري كانسليشن يطلب معلومات الكردت كارد، ولازم يكون فيها مبلغ بسيط لأن أحياناً يسحبون مبلغ بسيط وأحياناً جزء من المبلغ وأحياناً المبلغ كله أي وقت من بعد الحجز للتأكد ان البطاقة شغالة، من تجاربي غالباً يسحبون مبلغ دولار واحد أو جزء بسيط من المبلغ الكلي وغالباً يكون بس هولد، وعادي لو تكنسل الحجز بأي وقت يرجع عادي مافيه مشكلة.
الحلو بعد في بوكنق إنه بعد الحجز المبدئي يصير فيه خيار التواصل مباشرة مع الفندق أو الشقة، ممكن لطلب تغيير وقت الجيك إن، أو الاستفسار عن المواصلات، أو عن بعض الخدمات مثل الاحتفاظ بالشنط قبل الجيك ان او قبل الجيك آوت، أو طلب مواصلات من وإلى المطار أو محطة القطار مثلاُ
الصور اللي في بوكنغ غالباً تكون صور ذكية ومأخوذة من زاوية صح.. بأوقات وايد تطلع الغرفة أحلى وأكبر من الحقيقة فالانتباه للتفاصيل مهم.. أول التفاصيل اللي اركز عليها عشان أعرف أقدر حجم الغرفة.. المسافة بين طرف السرير وبين الجدران المحيطة، أحياناً التصوير يكون بكاميرا احترافية بعدسة عريضة وزاوية تبين السرير كبيييير والغرفة ضخمة.. بس لما اشوف جوانب السرير ألاحظ إنه المساحة بين طرف السرير والجدار هي المساحة اللي تكفي طاولة الأبجورة بس! يعني معناته شنو؟ إن الغرفة ضيقة من جوانب السرير ويمكن حتى مافيها مساحة للشنط! مساحة الغرف بالمتر المربع تكون مذكورة.. بس بصراحة انا ما اعرف اقدر الحجم بالرقم هذا، يمكن لو مثلاً عرفت حجم غرفتي بالأمتار المربعة بقدر اقدر ببالي شكثر أكبر أو أصغر من حجرتي… ومهمج جداً جداً جداً الفراش/البيد شيت يكون أبيض، أي غرفة أشوف الفراش أحمر منقش اصفر ازرق اخضر على طول اشيل الفكرة أتخيل كله بقع ووصخ ومايبين :/ أما الابيض حتى لو كان فندق أو شقة بسيطة دليل على النظافة واي شي فيه بيبين.
شي ثاني، التقييمات والتعليقات اللي تنعرض في الصفحة الرئيسية للفندق/الشقة دايماً تكون الافضل والاعلى، بوكنغ يحط طل التقييمات الي يحطونها الزباين ولكن يختار للعرض مع صور الفندق التعليقات الافضل… فأتركهم وأروح أقرأ باقي التعليقات، أركز على التقييمات اسلبية أكثر شي، مو عشان أطلع عيوب واكنسل الحجز لا.. بس عشان أشوف شنو أسوأ الاحتمالات وهل ممكن تأثر على زيارتي وتزعجني أو ماتأثر علي؟
أمثلة على النقاط السلبية اللي أقراها وماتأثر على حكمي على المكان:
- الفندق مايقدم الفطور، ممكن الفطور يكون مهم عند البعض بس هالشي دااايماً يكون مذكور بنوع الحجز، بعض الاماكن تقدم خيار الحجز بفطور أو بدون فمايصير احد يحجز بدون مايهتم للتفاصيل وبعدين يقول مو موجود؟
- الفندق مافيه جيم/نادي رياضي/سبا: أوكي هالمرفقات ممكن تكون مهمة لأحد زاير منتج وبغرض الاسترخاء مثلاً، ولكن أنا غالباً الفندق عندي يكون عشان افتك من اغراضي وعشان أنام وأتسبح وأبدل، أصلاً ما أدور فندق فيه جيم لأن أعرف مابستخدمه.
أما النقاط السلبية اللي تهمني واللي أركز اذا تكررت تاثر على تثبيت أو الغاء الحجز:
- المنطقة أو الحي اللي فيه الفندق: غالباً احنا نطلع من الفندق الصبح/الضحى ومانرجع الا بالليل وقت متأخر مو قبل ١١، هالوقت بالدول الأجنبية والأوروبية خصوصاً يعتبر متأخر، واحنا غالباً نستخدم المواصلات العامة بالتحديد المترو/القطار/الباص فتواجد الفندق بمكن آمن ومأهول وفيه إضاءة حتى بوقت متأخر مهم جداً جداً… مثلاً بهالسفرة كنت حاجزة مبدئي فندق بأثينا والفندق كان فرق لفندق chain ودرجته أربع نجوم وكانت الحجرة وديكورها وكل شي تمام، بعدين وانا أقرأ التعليقات ولا اشوف تعليق عربي انه الفندق يتجمعون فيه (حشاشين!) أول شي قلت هالشخص يمكن يبالغ ومجرد شلة مراهقين… وانا اقرا باقي التعليقات شفت كذا تعليق بالانجليزي مقيمين الحي سلبي انه صاير بطرف المدينة والمنطقة معزولة ومريبة! نعم؟ لا شكراً!! على طول كنسلت الحجز بدون تردد.
- محطات المواصلات العامة والمسافة بينها وبين السكن، إذا المترو موجود غالباً يكون خيارنا الأول، غيره يكون الباص العمومي وأحياناً أوبر أو التكاسي المحلي اذا ابداً مافي مواصلات عامة او الخط يسكر منوقت، فمهم انه المحطة تكون قريبة او ماتزيد عن ربع ساعة مشي.. طبعاً مع عنصر الامان الي ذكرته فوق عشان اضمن انه حتى لو راجعين متأخر الشارع يكون طبيعي وامان وفيه ناس… هالنقطة أنتبه لها خصوصاً بالمدن الكبيرة والرئيسية، أحياناً تكون أقرب محطة مترو على بعد كيلو أو حتى ثلاثة والفندق ممكن يكون ٤ أو ٥ ستار بس يكون بمنطقة صناعية مثلاً او نائية! أما اذا كانت منطقة صغيرونة فغالباً كل شي يكون قريب من بعضه وامان خصوصاً لما يكون فيها وايد سكان محليين تكون سكنية ومريحة (فريج بالعامية)
في معلومات بوكنغ تكون موجودة المسافات بالكيلومتر والدقايق، بس مو دايماً تكون دقيقة فهالنقاط اعرفها من التقييمات أحسن من معلومات بوكنغ.
وطبعاً فيه ميزة الفلتر المفيدة اللي تختصر وقت، اختيار عدد الاشخاص، عدد الغرف، الدرجة، رينج الاسعار لليلة، اختيار منطقة محددة، مرافق محددة (واي فاي، الغاء مجاني، رينج التقييمات) هذي كلها تساعد في حصر الاماكن بدل البحث بعشوائية… مثلاً لما اختار غرفة وحدة لثلاث أشخاص، واي فاي، الغاء مجاني، التقييم ٧ وفوق، وبعدها اختار عرض من الاقل سعراً… هني بسهولة أعرف ان كل الموجود تقييمه على الاقل جيد جداً وفوق ومايحتاج اتعنى وادور واي فاي والغاء لأن كل الموجودين فيهم)، ميزة ثانية في بوكنغ إنها تعطي خريطة لكل مدينة ينحجز فيها حجز مبدئي، بصراحة ما استخدام خرايط بوكنغ بس يمكن الميزة تفيد احد.
أما بالنسبة للعيوب، هو مو عيوب عيوب، بس كنوع من التسويق بوكنغ أحياناً يعطي ايحاء ان السكن في المدينة الفلانية محجوز بنسبة ٨٠٪ مثلاُ، وبالصفحات الثلاث الاولى من السيرج مايطلع الا فنادق غالية وعلى اساس الباقي غرفة وغرفتين، هالحركة لاحظتها غالباً تصير لما ادور عن سكن بمدينة محددة بدون ما احجز وبعدها ارجع بعد كم يوم ادور بنفس المدينة وبنفس التواريخ.. يعني كأنه يوصل لي رسالة إن الاسعار قاعدة ترتفع والحجز قاعد يزيد عن لما سويت سيرج اول مرة فلازم تحجزين الحين ههههه بس لا لا مو علي.. بعد يومين ثلاثة اسوي سيرج أشوف رجعت النتايج العادية، أو أطبق حركة الفلتر
أهم الأشياء اللي أركز تكون موجودة بالسكن اللي أحجزه:
- المفارش بيضا
- واي فاي
- احتفاظ بالشنط، عشان لو وصلنا قبل الجيك ان او بغينا نرجع بعد الجيك اوت
- حجم الغرفة مناسب وفيه مساحة عالاقل للشنط وللمرور
- قريبة من وسيلة مواصلات عامة
- بحي آمن ومنطقة مأهولة ومسالمة
AIRBNB
الموقع/الأبلكيشن الجديد للسكن في السفر، هذا الموقع عبارة عن تجمع لأشخاص.. يعرضون مساكنهم للتأجير يعني التعامل بعكس بوكنغ يكون مباشرة مع مالك المكان، والسكن يكون شخصي… في ناس مايرحبون بالفكرة أو مايتقبلونها، خصوصاص من ناحية خدمات يفضلون مستوى الخدمة الفندقية يعني مفارش وروم سيرفس ورسبشن وهذي الأشياء، بس بالمقابل السكن من خلال إير بي إن بي له بعد مميزات حلوة… أولها إن التعامل يكون مع شخص محلي من البلد نفسه والتعامل شخصي، غالباً اللي يعرضون مساكنهم للايجار بعد معاه يكون عندهم استعداد يعطون نصايح عن اهم الاماكن اللي تنزار بالاضافة للاشياء اللي لازم تتجنب ونصايح للاسواق الحلوة وغيره، أنا أفضل خبرة ووجهة نظر الأشخاص المحليين أكثر من وجهة النظر السياحية، ليش لأن لما آخذ بكلام شخص من السكان المحليين في ديرة أنا زايرتها هذا الشي بيخليني أتعرف على هالديرة بشكل شخصي ومحلي وأشوف المكان على طبيعته الحقيقية.. بينما لو بعتمد على وجهة النظر السياحية اللي غالباً بتكون تجارية، بشوف الأماكان الي كل الناس تشوفها.. حلوة بس عادية مافيها زود.
التعامل بالموقع سهل، في السيرج مشابهة لبوكنغ التاريخ وعدد الاشخاص والمنطقة وتطلع الاماكن المعروضة للسكن ومتوفرة بهذا التاريخ، خيارات الفلتر مهمة بهذا الموقع.. لأن أغلب المساكن تكون شخصية فبأحيان كثيرة تكون المعروضة مساكن مشتركة، أحياناً الغرفة نفسها مشتركة، وأحياناً تكون غرفة خاصة بس باقي المرافق مشتركة… فضروري اختيار Entire Place من الفلتر عشان تطلع الاماكن المعروضة للايجار بشكل كامل.
الحلو في إير بي إني بي المرونة وسهولة التواصل المباشر مع صاحب الكان المعروض حتى قبل الحجز من خيار Contact Host صاير بمثابة محادثة جات، الاتفاق على تقديم وقت الجيك إن مثلاُ، او على المواصلات والتوصيل من وإلى المطار أو القطار، الاستفسار عن المحطات القريبة والمسافات، وبعد المعلومات كلها عن المكان تكون مكتوبة، والريفيوز تكون فيها آراء الناس، قوانين المكان، أي أسعار أو تكاليف إضافية، أنا أفضل في إير بي إن بي أركز عن الأماكان اللي فيها تقييمات كثيرة، وأقل شي أطالع التقييمات اللي أربع نجوم وفوق (من خمسة)
شي ثاني، الدفع في إير بي إن بي مباشر بوقت الحجز مباشرة، البعض يوفر خدمة الالغاء المجاني لحد وقت محدد قبل تاريخ الحجز, بس لازم الدفع يكون بوقت الحجز المبدئي.
السعر في إير بي إن بي شوي فيه تفاصيل أكثر من بوكنغ:
- الدفع لازم يكون بكريدت كارد وقت الحجز المبدئي، مايصير كاش وقت السكن.
- يكون على حسب الليلة وحسب عدد الاشخاص، غالباً في وصف المكان يكون محطوط كم عدد الاشخاص الأقصى لهذا المكان، بعضهم مايقبل زيادة عدد الأشخاص عن ٢ مثلاُ، وبعضهم يحدد السعر على اساس شخصين والسعر الاضافي لكل شخص زيادة لليلة الوحدة يكون مذكور.
- بعض الأماكن يكون في مبلغ ثابت محدد للتنظيف ينضاف إلى المبلغ الكلي للإيجار.
- وبعضهم يطلبون Security Deposit إضافي على المبلغ الكلي، يكون بمثابة مبلغ تأمين ينسحب من البطاقة وينحط هولد لين بعد الجيك آوت إذا صاحب المكان أكد إنه مافي ضرر صار بالمكان يرجع للبطاقة، شخصياً ماقط جربت دايماً أغض النظر عن الاماكن اللي فيها هالمبلغ أحس ماله داعي دام في غيرهم بدون.
فكرة الموقع جديدة علينا وممكن تكون شوي مخيفة أو مريبة، بس الموقع مضمون وموثوق وشي رسمي مو أي كلام، ومن تجربتي كذا مرة حبيت التعامل مع أشخاص محليين حسيت زيارتي للمنطقة أحلى، مع العلم إن في بوكنغ بعد موجودة أماكن سكن من السكان مباشرة بس قلييلة جداً عكس إير بي إن بي اللي الأكثرية فيه أماكن شخصية وقليلة الأماكان التجارية، حتى المشاهير الأجانب يستخدمونه ويأجرون ويستأرون منه، ومؤخراً لما صار إعصار إيرما في أمريكا سوو حملة رائعة إن طلبوا من الناس اللي يقدرون يفتحون منازلهم لايواء المتضررين من الاعصار يسجلون في إير بي إن بي عشان المتضررين يقدرون يروحون لهم.. مجاناً.
الشي اللي أركز عليه في إير بي إن بي (غير إن المكان يكون كامل) قربه من المواصلات العامة ومركز المدينة، لأن أغلبهم مثل ماقلت سكان.. فلما أكون زايرة مدينة كبيرة مثلاُ أحاسب إن ما اختار مكان ويكون بعيد عن المركز والمواصلات! كبداية أفضل استخدامه في المناطق الصغيرة اللي التنقل فيها بالمشي أكثر شي.
أوه، وبعد فيه حجوازات لأنشطة ورحلات وأشياء جذي بس للحين ماجربته لشي غير السكن.
GOOGLE MAPS
الصديق الصدوق طبعاً قوقل مابس! في السفر باختصار أستخدمه عشان يدليني أي مكان، والحين بعد صار فيه حتى المواصلات العامة مثل الميترو والقطارات قبل كنت أنزل أبلكيشن المترو لأي دولة أكون فيها، طبعاً استخدمه عشان أدلي الأماكن بس أحط اسم المكان على طول يطلع لي بعده عن النقطة اللي أنا فيها ويعطيني الخيارات مشي، سيارة، ميترو، وحتى يعطي قيمة تقريبية لشركات التاكسي المشهورة مثل أوبر أو ماي تاكسي.
يوم اللي النت في السفر مايكون شغال عندي أحس روحي ضايعة بدون قوقل مابس وبدون البرامج الباقية :/ عشان جذي لااازم لازم بكل سفرة أول شي أسويه اشتري شريحة انترنت، لأن فعلاً بدون انترنت او الاعتماد بس على الواي فاي يقلل الفرص ويخلي استكشاف البلد جداً محدود.
TRIPADVISOR
دليلي الأول لاستكشاف المطاعم والاماكن اللي تستاهل التجربة، فكرته إن كل منطقة يحط فيها المطاعم، الأنشطة والأماكن، السكن، الرحلات السيايحة وغيرهم، أحبه لأنه يعتمد عل تقييمات الناس ومشاركاتهم وصورهم يعني مو بس قوائم ثابتة، ويسمح بإضافة صور… أحياناً حتى السكن من بوكنغ أدخل اسمه هني وأشوف تصوير الناس الشخصي له.
في السفر أكثر شي استخدمه للمطاعم لأنه وايد مرتب، مرتب المطاعم حسب وايد أشياء يخلي الاختيار سهل،
- حسب المسافة
- حسب الوجبة (قهوة وشاي، فطور، غدا، عشا، حلويات)
- حسب نوعية الأكل (إيطالي، ياباني، ستيك، سوشي، بيتزا، سي فود، صيني وغيرهم)
- حسب السعر (التقييم يكون حسب آراء الناس ويرمز له باليورو أو الدولار، يبدأ من $-$$$$)
- حسب مستوى الأكل (فاين دايننغ -درجة أولى-، أكل بتكلفة منخفضة، مع شيف محلي)
تحت كل نوع فيه لستة مطاعم مقيمة والتقييم من ٥ ويطلع كم عدد التقييمات ويصير قراءة كل التقييمات وصور مصورينها الناس، وبعد موجودة المعلومات الكاملة عن المطعم، عنوانه الكامل، الموقع، الإيميل، التلفون، أقرب محطة ميترو/قطار/ أوقات العمل، وإذا يحتاج حجز تريب أدفايزر رابطينه بأبلكيشن فورك للحجز مباشرة من التلفون.
غالباً أعتمد على التقييم وعلى صور الناس أكثر شي في إختيار المطاعم، اللي يعجبني فيه من تجاربي المتعددة إنه أغلب المطاعم اللي حايزة على تقييمات عالية من الناس تكون مطاعم مخشوشة وبشوارع صغيرة، مو بالشوارع والساحات الرئيسية، دايماً أفضل المطاعم الصغيرة والمخشوشة لأن أحسها تكو نأصلية ومحلية.. الأكل اللي ينأكل فيها طعمه أصلي من الدولة اللي هو فيها، غير لما المطاعم تكون كبيرة وبالساحات الرئيسية أحسها لأنها موجهة للسياح فطريقة الأكل والطبخ تكون عامة عشان ترضي جميع الأذواق، بس العيب إنه أحياناً في المطاعم الصغيرة اللغة تكون حاجز لأن مو كله ميفهمون إنجليزي، فصعب توصيل المعلومة خصوصاً لما نبي نسأل عن شي خالي من الكحول ولحم الخنزير، بس هني وهناك ولغة الاشارة تمشي الحال.. ولو إنه من الافضل تعلم هالكلمات البسيطة بلغة الدولة مثلاً كحول، خنزير، أكل نباتي، أسهل لنا ولهم.
FOURSQUARE
برنامج ثاني لتقييم الأكل في الدول المختلفة، تقريباً نفس الفكرة يقسم حسب أشياء مخلفة وفيه خاصية التقييم والصور، وبعد فيه خاصية الجيك ان تسجيل الحضوة سواء للمطاعم والأماكن… هالخاصية تعجبني عشان اتذكر اسامي الاماكن اللي رحتها لو حبيت بعدين اسوي ريفيو، أحيانا الراي يكون معاكس لتريب أدفايزر الل يهناك محصل ٤.٥ من خمسة مثلاً هني يكون ٤ من ١٠.. وأحياناً يكونون متفقين… دايماً لما أشوف مطعم تقييمه عالي بالاثنين أتحمس له أحس إنه واو دام أرضى فئات متنوعة من الناس!
هالبرنامج بعد يسوي لكل شخص بروفايل وتنعرض فيه ريفيواته ويصير الناس يسوون له فولو، أتذكر من زمان كنت استخدمه بالبحرين لخاصية الجيك ان بالاماكن وعندي كم ريفيو مطاعم فيه… شكلي بمر على المطاعم اللي سويتهم جيك ان واتذكرهم واحط ريفيواتتي هناك عشان مرجع للي وللغير.
TRAINEU
هذا البرنامج لمسارات وتذاكر القطارات الأوروبية كاملة.. ممتاز أحسن من كل مرة تنزيل أبلكيشن خاص لدولة محددة أو شركة محددة.. هذا جداااااً سهل… يحتاج تاريخ ومدينة وعدد أشخاص وكريدت كارد (ويصير بايبال بعد) سيرج عادي مثل سيرج تذاكر الطيران، تاريخ المغادرة وتاريخ الرجوع لو الحجز لرحلة مرجعة، والمدينة والوقت، وتطلع كل القطارات اللي عندها هالمسار ومرتبة حسب الوقت ويصير حسب السعر… جداً جداً فادنا في السفرة الأخيرة في لاتنقل بين المدن! وكل التذاكر حجزتها بالبايبال ووصلتني التذاكر على ايميلي، لما نركب القطار أفتح ملف الـ PDF مع الجواز حزة اللي موظف القطار يشوف التذاكر وخلاص ما أحتاج أطبعهم ولا شي، الموظف لازم يشوف التذكر من البي دي اف، الابلكيشن نفسه يعطي كل معلومات الحجز وتذكير، وحتى لو المحطة علنت عن رقم البلات فورم… خصوصا للرحلات اللي تطلع من إقليم لإقليم ثاني يطلع تنبيه في الأبلكيشن برقم البلات فورم.. هالنقطة مهمة جداً خصوصاً في المحطات الكبيرة اللي فيها عدد كبير من البلاتفورم، وبعد فيه خاصية إضافة الحجوزات للمحفظة في الآيفون لسهولة الرجوع لها.
السيرج يصير لشخص واحد ويصير في الأبلكيشن نفسه اضافة اسامي كل المسافرين (مثل الاسم في الهوية المستخدمة للسفر)، وحزة السيرج على طول يعطي السعر الكامل للكل والحجز يصير واحد وباسم الكل.
غير الحجز يعطي المعلومات الهمة والاساسية عن الرحلة أو عن الشركة هذي، لأن كل شركة تفرق.. وقت الترانزيت بين القطار الأول والقطار الثاني، آخر وقت يسمح فيه بركوب القطار، وامكانية وشروط التبديل وسعر التبديل.. مثلاً استفدت بهالسفرة لما حجزت الرحلات الداخلية للمدن اللي بنفس الاقليم لما عرفت انه التذكرت صالحة لاي قطار ماشي نفس الرحلة خلال ٤ ساعات من وقت التذكرة الاصلية يعني لو حاجزة ٨:٣٠ وفاتني القطار والقطار اللي بعده ٩ مساره نفس مسار رحلتي اللي راحت أقدر استخدم تذكرتي فيه بدون ما أحتاج إني أشتري تذكرة جديدة.
UBER / MyTAXI
أبلكيشنز التاكسي تحت الطلب طبعاً أشهر من نار على علم خصوصاً أوبر لأنه يستخدم بالخليج، الفكرة طلب تاكسي من الأبلكيشن وتحديد المنطقة والأبلكيشن بيعطي مبلغ تقريبي… والدفع يا أما كاش أو بالكردت كارد، حسب الدولة… أوبر وماي تاكسي نفس الفكرة بالضبط، الفرق اللي لاحظته إن هالمرة بإيطاليا أوبر كان أغلى بوايد من ماي تاكسي ماعرف ليش، بس عموماً بشكل عام الاثنين دايماً يكونون أرخص من التكاسي المحلية وبعد اضمن… لأن السعر المبدئي ينعطى من البداية وبعدين طول الرحلة يبين الطبلغ (أوبر خصوصاً) فهذا يخلي النصب أقل.. وايد تكاسي محلية تنصب على السواح خصوصاً اللي يقول العداد خربان أو يزيده أو يبديه بمبلغ مرتفع، وبعد الحلو فيهم امكانية تقييم السايق... حتى هالمرة أوبر كان فيه فلترات سناب شات تنحط بالكود مؤقتا مع استخدام الرحلة! هههه
هالمرة باليونان استخدمنا أوبر، وفي إيطاليا استخدمنا ماي تاكسي في المدن اللي فيها، بعض المدن ماكان فيها فاضطرينا نستخدم ابلكيشن التاكسي الايطالي أو نطلبهم بالتلفون، معلومات عن التكاسي بأغلب مدن إيطالياً إن لهم أماكن وقفات محددة غلاباً تكون قريبة للساحات العامة، أو إنهم يكونون تحت الطلب بالأبلكيشن أو التلفون، أما بالشارع مايوقفون حتى لو ممحد فيهم إذا ماكانوا قريبين لنقطة أساساً يوقفون فيها، ولما التاكسي بيناخذ من نقطة وقوف التاكسي الشغلة نظام، لازم ينأخذ التاكسي بالترتيب الزبون ياخذ أول تاكسي واقف وبعد مايتحرك التاكسي الثاني ياخذ مكانه والزبون التالي ياخذ هالتاكسي وهكذا، وبعد لاحظت إن التكاسي المحلية أغلبها تاخذ يورو واحد إضافي على كل شنطة تنحط بالسيارة. وبشكل عام مايطلبون تيبس والباقي من الخردة يرجع، بس الزبون ممكن هو بنفسه يعطيه تيب (إكرامية) خصوصاً لو كان في شنط واحد والسايق ساعد، بس مو إلزامية.
مثل على الشاشة لطلب المشوار، وشلون ينعرض السعر التقريبي والوقت والمسافة
PINTEREST
https://www.pinterest.com/sanooya/
أبلكيشني الصديق الصدوق.. هو مو مخصص للسفر بس بنترست يجمع أفكار بكل المواضيع، أنا أحب بعد ما أخلص برنامج السفر كله أسوي سيرج عن المنطقة اللي بروحها أشوف يمكن في أماكن طوفتها
+ أحبه للصور أشوف أفكار لزوايا أصور فيها للأماكن اللي بروحها، وبعد معلومات عامة عن الدول غالباً تكون مصممة بصورة وحدة والمعلومات سهلة وواضحة، أهم الكلمات، البقشيش، أهم الأكلات، أهم المناطق، العملات، عندي كم بورد مخصصين للسفر أحفظ فيهم بين فترة والثانية أشياء أحسها بتفيدني، بحط لكم اللنكات لهم
وهذي بورداتي مع اللنكات المباشرة لهم:
هذي أغلب الأبلكيشنز اللي اعتمد عليها بالسفرة وتخلي سفرنا مريييح ومنظم ونتعرف ونروح أماكن كثر مانقدر ونتنقل بحرية بدون مانخاف نضيع أو نتوه.
برنامج الرحلة هذي السنة كان:
أثينا - سانتوريني (باخرة) - روما (طيران) - توسكاني الريف الإيطالي (قطار) - فلورنس (قطار) - ليك كومو (قطارين) - ميلان (قطار) - فينيسيا (قطارين)
نظامنا في الرحلات نحب نتنقل بالمواصلات العامة (المترو/القطار/الباص) وبعض الأحيان تاكسي إذا كان الخيار الأفضل (السرعة والقيمة)، والسكن مانحرص دايماً إنه يكون ٥ ستارز بس أهم شي المكان يكون لطيف من ناحية المنطقة، وفيه لفت.. ولازم البيد شيت يكون أبيض - من ناحية الفطور بعد مو لازم يكون جزء من الحجز لأن غالب الوقت ناخذ من الكافيهات الجريبة، أحب أجرب القهوات المختلفة في الدولة اللي بزورها.
أنا أحب زيارة المتاحف والأماكن الأثرية والتاريخية بس أمي وأختي مو وايد يميلون لهالأشياء، فدايماً في السفر نحاول نرضي كل الأطراف، بعض الأيام للزيارات، بعضها للتمشي والاستكشاف الذاتي (أحب التمشي في الشوارع خصوصاً الشوارع الداخلية والغير معروفة! دايماً يكون لها طابع ثاني خاص وحميم غير عن الساحات الرئيسية) مع الكافيهات الجانبية، وبعد نرح نزور الساحات الرئيسية (الزحمة وتجمعات السياح والعالم!) هالخليط يخلي النتيجة التعرف على المنطقة من كذا جهة.. وبعد فرصة لتصوير أكبر عدد من الصور المختلفة الجميل.
والأكل، وايد ناس ماخذين فكرة إن الدول الغربية (الأوروبية خصوصاً) المطاعم غالية، بس في الواقع المطاعم عندنا في الخليج مو رخيصة، خصوصاً الكافيهات المتخصصة ومطاعم الفنادق، فالمطاعم في أوروبا بنفس المستوى فاللي متعودين على أكل المطاعم بالديرة ماراح يحسون بذاك الفرٌ، ومع هذا بعد بكل الدول اللي زرتها الكل تنوع وموجود بكل المستويات، خصوصاً مع ال[لكيشنز اللي حطيتهم فوق احنا في السفر غالباً ناكل وجبة وحدة رئيسية باليوم وباقي اليوم تناتيش وسناكس وسويتس، فمو مشكلة كبيرة تكلفة الأكل.
التسوق، إذا الديرة فيها آوتلت نخصص لها يوم كامل، زيارة المجمعات قليل نسويها في السفر إلا لو متعنين لمحل محدد مو موجود إلا بمجمع (بريمارك ببعض الدول مثلاُ) وباقي التسوق في المحلات اللي بالشارع لأن أغلب الدول الأوروبية يكون فيها شوارع خاصة كلها محلات تسوق من غير املجمعات، دول مثل إيطاليا، إسبانيا، تركيا.. محلاتها فيها بضايع حلوووة سواء من ناحية تصاميم أو كوالتي.. تجنن وأسعارها متفاونة، غير طبعاً تسوق التذكارات اللي غالباً تكون منتشرة بالمناطق ومتشابهة بس الأسعار متفاوتة فالأفضل المقارنة مو الشراء على طول من أول مكان خصوصاً إذا كان بمكان أو ساحة عامة وسياحية، يبالغون بألعسار والأشياء مو مميزة مثل المحلات الصغيرة المخشوشة في الممرات الصغيرة الأبعد.
الرحلة طويلة بس جداً استمتعنا فيه وغطينا مناظق مختلفة بطبيعتها وتجاربها، صعبة للتنقل هذا كله مع أطفال بس احنا كنا ٣ والحمدلله الامور مشت تمام ماعدا اخر تنقلين تعذبنا مع الشنط زادت ههههه
البوستات القادمة راح أغطي برنامجنا بكل منطقنا بالتفصيل وبعدها مختصر كل منطقة وإن شاء الله يعجبكم وتستفيدون وأقدر أوصل المعلومة صح، أول تجربة لي بتقارير السفر.
ألاقيكم على خير.
![[ BLOGLOIN' ]](http://4.bp.blogspot.com/-Jf-STPrmUcU/VcrpOV3yT3I/AAAAAAAAHPk/eio0410HZyM/s1600/BlogLovin.JPG)
%2B(1).jpg)
No comments