ريفيو كولكشن ماك Heavenly Creature

صباح الخير من البحرين

شخباركم بنات؟

بوستي اليوم عن كولكشن ماك Heavenly Creature  اللي نزل من أسبوعين تقريباً أونلاين وبأمريكا وبعض الدول، أنا من البحرين والكولكشنات عادة تتأخر لين ماتنزل عندنا (شهر وأكثر)، فدايما أعتمد على الأونلاين شوبنغ ولكولكشنات ماك دايما من  www.Nordstrom.com

سويت الأوردر أول يوم نزل الكولكشن بالسايت، واستخدمت خدمة أراميكس شوب آند شيب www.shopandship.com  لشحن الاوردر، أمس استلمت البوكس أخذ بالضبط 14يوم وهو واصلني من أمريكا للبحرين من التاريخ اللي سويت فيه الطلب. (سويت الاوردر في الليل واستلمت البوكس الصبح)

الكولكشن يتكون من 9 آي شدو، 4 بلاشر، 3 بودرات وجه كلهم معدنيين، بالاضافة لـ 5 أرواج نوعيتهم لستر، 5 غلوسات وكم منتج للبشرة وفرشتين

أنا أخذت 3 بودرات وبلاشرين وروج واحد هذي أسمائهم:

-          Light Year MSF

-          Star Wonder MSF

-          Center of the Universe MSF

-          Super Nova MB

-          Ring of Saturn MB

-          Venus Lipstick

صور للمجموعة

بفلاش:

والحين دور السواتشز.. للحين ماجربت على ويهي مع ميكب بس مجرد جربت على يدي

للأسف صور السواتشز مو ممتازة لأن الوقت كان ليل حزة التصوير.. وأحسن إضاءة مناسبة للتصوير هي الاضاءة الطبيعية او اضاءة الشمس

ببتدي ببودرات الاضاءة 

انا اخذت 3 وطوفت الرابعة اللي هي أغمج لون

للسواتشز لكل وحدة استخدمت طرف صبعي – للسواتش الثقيل على الجهة اليمين، وللسواتش المدموج استخدمت فرشاة سيجما F35  "فرشاتي المفضلة للهايلايت" – الجهة اليمين

الأولىLight Year  وهذي حبيتها أكثر شي من المجموعة كلها

وصفها من ماك "وردي مشمي مع شيمر ذهبي"

لونها مشمشي فاتح يميل للوردي ملتفة بشكل حلو بدرجة أغمج من الوردي ومع لون ذهبي برونزي شيمري.. لما تندمج تعطي لون وردي هادي مع إنعكاسات ذهبية، أظن إنها بتكون حلوة للاستعمال أي وقت، وبعد تتخفف وتتثقل حسب الطبقات الي تنحط

صورة السواتش:

الثانية بتكون Star Wonder MSF

وصفها من ماك "وردي أرجواني مع ألوان صدفية متعددة"

هذي لونها وردي فاتح متوسط.. مدموجة بدرجة حلوة من الارجواني البنفسجي مع شيمر زيتي ذهبي وفيها الوان ثانية خفيفة.. هذي باعتقادة ممكن تستخدم بشكل خفيف كاضاءة.. وبتكون حلوة كبلاشر اذا تثقلت 

صورة السواتش:

الثالثة بتكون Center of the Universe MSF

وصفها من ماك "لون مرجاني مع شيمر ذهبي" 

من النظرة الأولى.. فكرت إن هذي بتكون أنسب في الاستخدام كبلاشر أكثر منها كإضاءة.. الإضاءات عادةً يكون لونها فاتح وهادئ.. وهذي لونها قوي وغامج.. أشوف لون مرجاني.. مدموج بلون كرزي.. ماروني؟ مع شيمر ذهبي.. أحس بتكون وايد حلوة كبلاشر مرجاني أو برتقالي.. وكاضاءة لازم تستعمل بطبقة خفيفة

صورة السواتش:

والحين دور البلاشرات المعدنية

انا خذت 2 وطوفت 2

للسواتشز لكل واحد استخدمت طرف صبعي – للسواتش الثقيل على الجهة اليمين، وللسواتش المدموج استخدمت فرشاة ماك 109  "وحدة من فرشي المفضلة للبلاشر" – الجهة اليمين

أول واحد Super Nova

وصفه من ماك "مزيج قرمزي مع ذهبي محروق"

كنت متوقعته يكون فوشي نيون! هههه بس طلع فوشي حلوو ومب فاقع، ممزوج بلون ذهبي محروق.. لما يندمج بيكون لونه فوشي حلوو مع إنعاكاسات ذهبية، لازم ينحط بيد خفيفة وتزيد الطبقات حسب الحاجة.. لأن لونه قوي ممكن اذا انحط بكثرة بيكون صعب التعامل معاه ودمجه

صورة السواتش: 

الثاني بلاشر Ring of Saturn

وصفه من ماك "مزيج من اللون الطيني والذهبي"

الوصف مايناسب اللون.. لأني ماشفت فيه ذهبي بالمرة.. يمكن انعاساكات بعد الدمج بس لونه بالعلبة طيني – ماروني مع مزيج من البيتش الفاتح.. انا صاير الفاتح هو الغالب عليه.. مع الدمج يعطي لون هادئ بانعاكاسات ذهبية خفيفة.. واتوقع مع التثقيل والتركيز بالفرشاة على اللون الاغمج بيكون اللون اوضح.

صورة السواتش:

وبس هذا كان ريفيو المفضل للي خذيته من الكولكشن.. إن شاء الله يكون عجبكم ^_^

ماحطيت سواتش للروج.. نسيت ><

أسعار المنتجات:

-          البودرة $28

-          البلاشر $23.50

-          الروج $14.50

* دفعت زيادة عليهم ضرائب وقيمة الشحن من أمريكا للبحرين

* لوني في ماك NC25