| رجعت الشتويّة - عطوراتي لفصل الشتا والبرد |

 { عم بتشتّي الدنيا يا محلا الشتويّة  ~

يسعد مساكم أو صباحكم وين ماكنتوا 

هالبوست ببالي صارله فترة بس هالاسبوعين كنت تحت ضغط وسترس مب طبيعي 

قطاوتي مرضوا واحد ورا الثاني اول شي مرض الصغير وحسيته خلاص بيموت ماقام ياكل ولا يتحرك وانا من بيطري لبيطري لين الحمدلله البيطري الثاني عطوه ادوية ومضادات وبدا يطيب. 

وبعدها صرت بتريننغ - تدريب طول الاسبوع بعد الدوام من الساعة اربع لين سبع العصر فكنت اوصل البيت خلاص منتهية!

ويوم الخميس الصبح مرضت قطوتي الثانية وامس الجمعة ماتت :( وايد حزنت عليها وعورني قلبي وكل شوي اتذكرها واتضايق :((( حبيبتي بيسو الدفشة كل ما اتخيل انه خلاصم مابنشوفها تشاغب وتتحرش بالباقين او تراكض.

اليوم مسكت كاميرتي قلت أحاول أغير مزاجي الحزين.. فصورت عطوري الشتوية واشوة طلعت الصور حلوة…

احنا بهالجانب من العالم طبعاً يادووب نحس بالشتى -ـ- واذا يانا شتا يكون أغلب الوقت البرد المؤلم اللي يمرض

بس هذا مايمنع انه حتى بالمدة القصيرة اللي يكون الجو بارد نغير مود المكياج والعطور والملابس والألوان 

بوست اليوم عن اختياراتي لعطور الشتا 

عطور الشتا غالباً يغلب عليها الثقل والتركيز والفخامة

أنا من النوع اللي قليل ماتعجبني العطور المركزة والثقيلة.. ماحبها أحسها تصدع عشان جذي قليييل أشتري عطور عربية صرفة! 

بس في الشتا، أختار عطور أثقل من المعتاد، غالباً تكون من اختياراتي لعطور المناسبات لأن المناسبات حتى لو كانت صيفية بس دايما تكون بالليل فحلو العطر يكون فخم.

أول عطر.. جور دي ايرمز أبسولو

هالعطر عشششق شميته أول مرة بالمطار من حول سنة وشي وانا كنت رايحة أسطنبول، ماحطيت بالي حتى على شكل زجاجته وبعد ماوصلنا اسطنبول وحطينا اغراضنا بالغرفة رفعت يدي شميت ولا انصدم وضربت ببالي الريحة.. مميزة وتركز بالراس بدون ماتكون قوية وتصدع! تخيلوا تميت اشهر احاول اتذكر الاسم او الشكل هههههه كل اللي كنت ذاكرته ان الموظفة رشت لي عطرين نفس الشكل بس فرق التركيز وانه الفاتح بنفس الوقت ماعجبني.. بعد فترة بالصدفة شفت الصورة بالنت وتذكرته! وشريته بعد تقريباً سنة من شميته أول مرة وخذته من مطار فرنسا.

انا بصراحة ماعرف اوصف عطور هههههه كنت معتقدة انه العطر اساسه سبايس او خشبي .. دخلت موقع فراجرانتيكا وانصدمت انه فلورال! ماعدا نوتة وحدة خشبية بالقاعدة

المصمم جون كلود ايلينا يقول عن العطر: "أردت أن أعبر عن الانوثة بالازهار ولا شي غير الازهار."

نوتات العطر:

العلوية: زهور المشمش وفاكهة الجريب فروت

قلب النوتة: الغاردينيا، ياسمين السامباك، ازهار ثانية

القاعدة: نوتات خشبية وزهور الاوكموس

اللي ماتحب العطور الشرقية بس تحب الروايح المميزة واللي تركلا بالخ اتوقع بيعجبها العطر، اللي عندي النوع الابلسلو لون السائل برتقالي غامج، فيه منه فاتح ماعجبني واعتقد في منه اخضر فاتح غاردينيا ماشميته بس احسه بارد وصيفي!

العطر قوته اعتبرها متوسطة، في الصيف ممكن احطه في المسا اما بالشتا تقريباً يناسب كل وقت بس مو دايماً افضله بالصباح الباكر لأن اول ماينرش تكون ريحة الجريب فروت هي الغالبة رغم انها تخف بسرعة بس ممكن تكون ثقيلة لهالوقت من اليوم

 ثباته قووي وبعد ساعات للحين ينشم، واذا ارشه بعباتي حتى بعد يومين او ثلاث للحين اشم اثره بعباتي.

العطر متوفر بالاسواق المحلية بمحلات العطور الكبيرة سعره حوالي ستين دينار بحريني - ستمية ريال لل٨٥ ملل، وللعلم في منه ريفيل لان الزجاجة تنفتح بس الريفيل فته بفرنسا وماشفته بالبحرين. 

العطر الثاني بربري بودي - نسخته الاولى البارفوم (مو الانتنس)

هالعطر مرتبط ببالي بذكريات سعيدة! استخدمته أول مرة من قبل حوالي ثلاث أو أربع سنوات.. وعشقته وبعدها رعي يابوا لي هدية النسخة اللمتد ادشن الروز قولد، وكل مرة بشتري عطور اشاور نفسي ارد اشتريه بس أأجله، قبل فترة نزل طقم هدية بسعر مايتفوت بسايت هوت لوك فطلبته بدون تردد - الطقم فيه العطر الحجم الكبير وبودي لوشن وعطر ميني كيووت 

نوتات العطر:

العلوية: نبتة الشيح، الخوخ وزهرة الفريسيا

قلب النوتة: زهرة السوسن، الورد، خشب الصندل

القاعدة: خشب الكشمير، المسك، العنبر، الفانيلا 

أحس المسك هو اللي عاطي العطر الشعور المريح والبارد

هذا العطر ليلي وحلو للمناسبات، ويناسب الشتا بالنهار بعد.. الحل وفيه انه فخم وبفس الوقت احسه باارد ومريح

ثباته قوي يبقى طول اليوم

متوفر بالاسواق المحلية بكل محلات العطور بس والله ماعرف سعره أتوقه قريبا الاربعين - اربعمية ريال 

عطري الثالث، عود & روز من لوكسيتان 

هالعطر كان هدية من لوكسيتان مع باكج المنتجات اللي اهدوني اياه برمضان 

انا مستغربة اني حابة هالعطر تبون الصج هههههه.. لأن ريحة الورد - المحمدي نسميه بالبحريني واعتقد بباقي الدول تسمونه بلدي؟ المهم عرفتوه صح؟ ريحته وااضحة بالعطر وانا ماحب ريحة هالورد بالعطر، احب اشم الوردة نفسها بس اذاكانت بعطر احس جنه ماي ورد هههههه.. بس عالم العطور عالم ساحر.. يخلطون اشياء ماتخطر على بال ونحب حتى الشي اللي مانفضله

فهالعطر واحد منهم، اول ما اشمه على طول تنتشر ريحة الورد بس بعدها تنمزج بباقي الاشياء فالناتج يكون حلووو وبارد، اما بعد ماتبرد تكون ريحة الورد خفيفة، العود موجود بالعطر بس لمحة مب المركز

العطر مو من العطور المعتادة عليها بس تغيير حلوو، حبيته بالمناسبات وكثرت استخدامه بعد مابدا الجو يبرد حتى بالنهار احطه. 

نوتات العطر:

العلوية: ورد الباتشولي والبيرغموت

قلب النوتة: الورد وخشب الأرز

القاعدة: ورق الباتشولي، عود، فانيلا 

متوفر بالاسواق المحلية في محلات لوكسيتان حصري بمحلات الشرق الاوسط سعره قريب الاربعين دينار - اربعمية ريال

ثبته وسط بعدين يبتدي يخف عشان جذي احسه نهاري اكثر ويناسب صباحي بالشتا

وأخيراً مسك الختام وأفخمهم…

عود القصر من روبيرتو كافالي 

عطور عود كافالاي من العطور اللي تكون غالبة عليها الشرقية واضحة اللي تجذبني واعشقها! 

اللعام استخدمت البرونزي تايغر عود وقبل كم شهر شميت هذاعود القصر في سيفوةا وينيت عليه وكنت انتظر يبرد الجو بفارغ الصبر عشان اشتريه!

فخم فخم فخم ورااائع اللي يحبون العطور الشرقية والعود لازم يكون عندهم! واللي يحبون العطور المميزة اللي ريحتها تفر المخ

من قوته تكفي بختين بالكثير ثلاث.. يناسب اكثر شي على العبايات وملابس الشتا.. يجنن

نوتات العطر:

 الأرزْ، العود، زهرة اللابدانوم (ماعرفتها بالعربي) والفانيلا 

ثبات العطر جداً جداً قوي ويبقى لأيام، وريحته اشوف انها تناسب الجنسين رغم ان مكتوب عليه نسائي.. مناسب لهدية حتى

متوفر بمحلات العطور الكبيرة سعره حوالي ستين دينار - ستمية ريال. 

وهذي كانت اختياراتي لعطوري هالشتوية. 

شاركوني ارائكم واختياراتكم

إن شاء الله يكون عجبكم بوست اليوم 

أشوفكم على خير

تابعوني بقنواتي المختلفة: