| سوالف عيد: المكياج وشنطة المكياج |

يسعد صباحكم أو مساكم وين ماكنتوا

وكل عام وانتوا بخير وعيدكم مبارك والله يعوده عليكم وعلينا يارب 

كان مفروض انزل هالبوست قبل ليلتين بس انشغلت! 

قلت أتكلم عن مكياج العيد والأشياء الضرورية تكون بالشنطة في العيد...

طبعا أغلبنا بالعيد مانكون بالبيت، من الصبح بين بيوت الأهل والمعايدات

أنا وحدة أول وثاني يوم العيد اطلع من البيت الصبح وأرجع بالليل... 

فشنطة المكياج لازم تكون فيها أشياء ومنتجات وأدوات عشان هالوقت الطويل. 

بس أول شي.. نتكلم عن مكياج العيد.. 

العيد مناسبة سعيدة واحتفال وفرصة للتمكيج والكشخة خصوصأ مع الثياب الجديدة والعباة وكل شي يديد.. 

بس.. العيد مو حفلة! ماله داعي التهويل بالمكياج والألوان الصارخة والغليتر والشيمر الزايد عن اللزوم 

لا تنسون إنه أغلب الوقت بالعيد الطلعات والتنقل تكون بين بيوت الأهل والأصحاب.. يعني مو قاعات أعراص اللي كلها إضاءة وثريات وتكييف وتحتاج مكياج كامل وصارخ...! 

خصوصاً إنه العيد السنة صادف في الصيف وجو حاار ورطب خصوصاً بالخليج الله يعيننا :( 

قبل المكياج، تأكدي إنج تستخدمين غسول مقشر للبشرة عشان تكون البشرة مصقولة وسطحها أملس، واستخدمي كريم مرطب وبرايمر ضروري جداً

ت
جنبي المنتجات الكريمية قدر الامكان عشان الجو الحار... إكتفي بالفاونديشن والكونسيلر وبيس العيون وكريمي الحواجب المضاد للماء والرطوبة كمنتجات كريمية وطبعاً الروج.

أما البلاشر، الآي شادو، الكونتور، الهايلايتر.. اعتمدي على الباودر مايسوى بهالحر والتنقل من مكان لمكان ومن السيارة تحطين لج طبقات كريمية

والألوان... 

مكياج العيد حلاته تكون غالبة عليه الألوان الترابية من الصبح، بالنسبة لمكياج العيون كذا لون مطفي من تدرجات البني، الرمادي، البطيخي، البيج وهالألوان القريبة من لون البشرة اللي تحليها بدون ماتكون شاذة وفاقعة.. ممكن لون واحد بيج شيمر أو بني.. في نص الجفن مثلاً

وممكن نبرز اللوك بآيلاينر مسحوب عرضه وسط.. أنا شخصياً احب اللآيلاينر في المناسبات هذي ما أستغني عنه..! والرموش تكون رموش متوسطة خفيفة.. ابتعدوا عن الرموووش البلاستيك أو الكثيفة أو الدبل من الصبح! الكحل ممكن تستخدمين البيج لداخل العين.. او أسود إذا عيونج واسعة ومو حلوة عليها الالوان الفاتحة.

أغلب البنات يحبون يلبسون عدسات بالعيد، في بنات ما شاء الله حتى الأزرق والأخضر يطلع طبيعي على عينها، وفي بنات (مثلي) بعض الألوان تطلع فاقعة.. أنا لما أحس العدسة فاتحة على أو فاقعة.. أحط داخل عيني كحل أسود وأغمق الشدو السموكي تحت عيني، يهدي لون العدسة.. 

أبداً لا تلبسين عدسة فاقعة مع كحل فاتح وبدون أي لون تحت عينج.. بيصير ويهج كله عيون! خصوصاً لو عيونج ماتطلع عليها العدسات طبيعية.

مكياج الويه أفضله يكون كونتور وبرونزر خفيف.. وبلاشر لونه محايد روز أو بلام أو مشمشي

الكونتووور يا الكنتووور.. الحين هبة الكونتور الكريمي! تتخيلون حاله بالحر شلون بيكون؟ الباودر عالاقل يخف ويمكن يلمع بس ماراح يسيح ويعدم الدنيا!  

الهايلايتر النهاري حلوو يكون يعطي قلوو خفيف بدون لمعة زايدة..

وبالأخير لا نسين التثبيت بلوس باودر شفافة أو ملونة بلون قريب للفاونديشن. 

الروج.. أفضل شي يكون بين درجات النود إلى الدرجات المتوسطة، ويكون مطفي أو كريمي بس مو قلوسي لمعته ماتناسب الصبح.. الارواج السايلة المطقية المنتشرة هالفترة اختيار مناسب.. الوانها حلوة ومطفية وثباتها حلو. 

الحين خلصنا مكياج العيد وبنطلع، 

شنو الأشياء اللي ناخذها بالشنطة عشان اللمسات والتعديلات؟ 

في نوعين من شنط المكياج..

الشنطة اللي بتحملينها في شنطة يدج عشان تعدلين أو ترتبين مكياج خلال اليوم، بعد الأكل، بعد السلامات.. إلخ.

الشنطة الثانية.. لو كنتي من النوع اللي مثلاً تبات ببيت أهلها أو تحتاج تمسح مكياجها وتحطه من جديد وانتي مو بالبيت. 

الشنطة اللي داخل شنطتج.. من رايي لازم تكون فيها هالأشياء ضرورية: 

• ورق إمتصاص الدهون أساسي وضروري، في منه انواع نوع يكون فلم شبه مطاطي، ونوع يكون كأنه ورق، النوعين يأدون نفس الغرض تربتين على المناطق الل يدهنت بخفة بدون فرك عشان تمتص الدهون واللمعة بدون ماتخرب المكياج.

تلاقينها بالصيدلية في كشكات المكياج، وفي بودي شوب متوفرة بعد.

• البرونزر والبلاشر والهايلايتر اللي استخدمتيه مع فرشة وجه وسط متعددة الاستخدامات.. ليش؟ لأن أكثر سلاماتنا تكون بالويه والخد هههههه.. فتوقعي بعد كمية السلامات تطالعين المنظرة ولا اختفى نص البرونزر والبلاشر والهايلايتر! فطبطبي بورق الدهون على خدج.. وانشري شوي برونز مرة ثانية، وبنفس الفرشة بطرفها بس اخذي بلاشر.. والهايلايتر ممكن باطراف الاصابع او لو كانت الفرشة مدببة تستخدمينها.. ماتبين تحملين ثلاث فرش وجه في شنطة يدج! وتقدرين تحطين الصبح الهايلايتر الخفيف وبالشنطة تاخذين الهايلايتر الاقوى عشان وقت ثاني من اليوم تزيدينه

• بودرة شفافة أو بلون خفيف مقارب للفاونديشن مضغوطة أو لوز ضرورية.. بعد ماتشيلين الدهون بالأوراق تحطينها على الخد والجبهة.. بنفس فرشة الوجه بس الجهة الثانية منها.

• طبعاً الروج اللي حطيتيه الصبح لازم تاخذينه بشنطتج، مع الأكل والوقت بينمسح أكيد.. وأنا أفضل دايماً أحمل معاي لون ثاني مخالف، لو كنت حاطة درجة نود بحمل معاي بنفسجي ولا فوشي مثلاً والعكس، علشان لو بغيت أغير اللوك تغيير لون الروج للون مغاير كفاية يغيره كامل. 

• الكحل اللي استخدمتيه داخل العين مفيد بعد تاخذينه لأنه ممكن يسيح أو يختفي، أما الماسكرا والكحل اللي خطيتيه فيه ما أحس له داعي. ولو كنتي حاطة الصبح كحل بيج.. مايضر تاخذينه وتاخذين زيادة كحل أسود أو بني.

• سبري مثبت – منعش للمكياج ضروري وأغلبهم ايون باحجام صغير مثل أربان ديكاي وفكس بلاس.

• علبة العدسات ومحلول صغير شي أساسي إذا كنتي تلبسين عدسات.

• معقم يد وكريم يد حجم صغير.. ممكن أستغني عن المعطر بس كريم اليد ما أقدر أستغني عنه لازم كل شوي أرطب يدي. 

• دراي شامبو.. الفكرة خذتها من أميرة وفكرت فيها فعلاً شي ضروري، بما إن أغلبنا نسشور شعرنا بالعيد، لو كنتي متحجبة مع شيل وحط الشيلة الشعر يطخ، وحتى لو ماكنتي متحجبة مع هالجو والرطوبة.. تطخ الجذور.. فالدراي شامبو بخة بختين على الجذور وتوزعينه بأصابعج يمتصح الدهون والرطوبة وينعش الشعر من جديد، متوفر بالصديليات نوعيته سبري مضغوط.. وفي أنواع ميني مناسبة للشنطة. 

• الأي شادو ما أحسه شي ضروري بشنطة اليد، إلا لو حبيتي تغمقين الشدو العصر مثلا.. تحطين عندج باليت ميني اللي فيه الوان ترابية.. مع فرشة كسرة العين، وتاخذين لون بني غامج مطفي.. وتزيدين الكسرة.. وتحت الحاجب تزيدين اللون البيج... وبجذي تكونين غيرتي اللوك. 

• العطر ضروري بالشنطة، خير وبركة لو عندج الحجم الصغير أو الغرشة اللي تتعبى عشان تتخفيفن الثقل بالشنطة.

• أشياء ثانية ضرورية: فرشاة حواجب علشان ترتيب حواجبج، مشط صغير، مبرد أظافر.. لا تستهينون فيه ترى بهالأوقات ضربات الأظافر واردة! فلو صادتج ضربة تنقذين الظفر بالمبرد بدل لا يتشربك بشعرج وملابسج ويتكسر ويخربهم. 

هذي شنطة اليد خلصنا منها، 

الشنطة الثانية.. تحطين فيها الأساسيات لو يتمسحين مكياجج وتغيرينه من جديد أو لو كنتي من الناس اللي يباتون برا البيت في العيد.

• قطن. 
• مزيل مكياج. 
• كريم مرطب. 
• برايمر. 
• فاونديشن. 
• فرشاة فاونديشن وبيوتي بلندر. 
• كونسيلرج المفضل مع فرشاته.
• الكونتور.. باااودر بااودر بااودر! لول طبعاً مع فرشاتج المفضلة للكونتور.
• لون بلاشر مخالف للي حطيتيه الصبح.
• مرطب شفايف.
• تحديد شفايف.. يفضل تاخذين معاج درجة نود ودرجة فاقعة/غامقة 
• لونين روج إضافيين زود عن اللي بشنطة اليد لو كنتي مثلي تتحيرين بالأرواج وكل شوي تبدلين.
• علبة آي شادو.. غالبة عليها اللوان الترابية مكس بين الشيمر والمطفي وممكن شوي ألوان تدخلين.. كحلي، بنفسجي، أخضر.
• كحلج اللي تخطين فيه.. إذا كريمي لا تنسين فرشته، او سائل 
• منتج الحواجب اللي تستخدمينه سواء قلم أو بودرة أو كريمي، مع أداته
• ماسكرتين.
• رموش لو حابة المغرب أو الليل تحطين رموش كقيفة ممكن.. بس لا تبالغين... مع صمغ طبعاً
• هايلايتر وسط إلى قوي مع فرشاة هايلايتر.
• مثبت مكياج بما إنج بتمسحين وبتحطين من جديد، تحتاجين تثبتين من جديد.
• منظف فرش إذا بتباتين أكثر من يوم برا البيت! يا حبذا لو يكون بعلبة رش عشان التنظيف السريع وتخلينهم يجفون خلال الليل وتردين تستخدمينهم الصبح.. خصوصا للفرش الشعر الصناعي اللي تستخدمينهم للمنتجات الكريمية
• وبعد لا تنسين منتجات عنايج الليلية، التونر، السيروم، كريم العين وكريم الوجه لو كنتي تباتين. 

وبس! بجذي تكونين فكرتي بكل شي وضبطتي امورج.  أتوقع مانسيت شي!

امبلى.. الشاحن المتنقل وواير الشحن لا تنسينه لول

كل عام وانتوا بخير مرة ثانية :*