[ الشوبنغ أون لاين من الألف للياء - Shopping Online from A-Z ]

السلام عليكم ورحمة الله وبركاته 



موضوع اليوم من أكثر المواضيع اللي تنطلب مني واحصل استفسارات عنه

التسوق اون لاين 

الشوبنغ اون لاين وايد سهل وممتع، والخيارات وايد متعددة

بس اهم شي الاساسيات تكون موجودة


الاساسيات: 
  • وسيلة الدفع
  • عنوان شحن
  • حساب بايبال
  • حساب ايبيتس
  • تحويل العملة

آول شي: وسيلة الدفع
بطاقة ائتمان شي ضروري سواء كانت فيزا او ماستر كارد او اميركان اكسبرس


البطاقة الائتمانية نوعين

النوع الاول: 
يا تكون العادية اللي فيها لمت / حد ائتماني محدد مع كشف حساب شهري للدفع
وهذي متوفرة بكل البنوك وكل بنك له شروطه

النوع الثاني:
 بطاقة ائتمانية مسبقة الدفع تستخدم في الانترنت بس
قبل كل عملية يتم ايداع المبلغ المطلوب فيها، مايصير تستخدم اذا مافيها رصيد

النوع الثاني صاروا وايد بنوك يوفرونه خصوصا مع انتشار الشوبنغ اونلاين، غالبا شروطها ورسومها اسهل من النوع العادي. 

بعد اصدار واستلام البطاقة

هذي المعلومات المهمة من البطاقة اللي راح تستخدم في كل عملية شراء من النت:

  • رقم البطاقة 16 رقم مطبوعين على الوجه الامامي
  • الاسم الاول والاسم الاخير مثل ماهم مطبوعين على وجه البطاقة
  • تاريخ انتهاء البطاقة ويكون مطبوع على وجه البطاقة بالشهر والسنة
  • رمز الحماية للبطاقة رقم ثلاثي او رباعي مطبوع على الوجه الخلفي للبطاقة
  • عنوان البطاقة نفسه اللي تسجل بالبنك


·         ثاني شي:  عنوان للشحن والاستلام

العناوين نوعين

النوع الاول : يكون عنوان محلي٫ عنوان السكن ولازم يكون كامل
المنزل - الطريق - الشارع - الحي - المنطقة - المجمع - القطعة… الخ على حسب الدولة
احنا عناوينا بالبحرين: رقم المنزل/المبنى - الشارع او الطريق - المجمع والمنطقة


وايد مواقع صارت تقدم خدمة الشحن المباشر لباب البيت 
بس خصوصا اللي تبي تشتري سوالف مكياج وعناية وكريمات، آفضل يكون موجود صندوق خارجي من بداية المشوار علشان لو اي وقت موقع مايشحن مباشرة يكون الصندوق موجود.

النوع الثاني: عنوان دولي وهذا يستخدم في المواقع اللي ماتشحن مباشرة
ومتوفر من وايد شركات 
اللي انا جربتهم
Aramex Shop & Ship, MyUS, WorldShip 

كبداية انصح بتجربة شركة ارامكس وصندوقهم شوب اند شيب


الاسباب والمميزات:

- اولا الاشتراك يندفع مرة وحدة لمدی الحياة بدون تجديد وبدون رسوم سنوية

- ثاني شي سعر اشتراكهم رمزي، السعر العادي 45 دولار امريكي يعني حوالي 17 دينار بحريني / ريال عماني - 170 درهم اماراتي / ريال سعودي او قطري، 13 كويتي
والحين دشيت موقعهم وشفت عندهم خوش عرض الاشتراك صار بس بعشرة دولارات امريكية- 

- ثالث شي وهذا اكثر شي من رايي يميزهم عن الشركات الثانية، يعطون مع كل اشتراك صناديق بهالدول ومجموعهم 13: آمريكا - بريطانيا - الصين - تركيا - الامارات - الهند - جنوب افريقيا - المانيا - ايطاليا - اسبانيا - فرنسا و سنغافورة 
الدول وايد ويمكن تحسون نصهم بدون فايدة بس مثل ماقلت الاشتراك مرة وحدة والدفع مرة وحدة لكل هالصناديق،تبقی عندكم لاي وقت خصوصا انه الحين التجارة الالكترونية يزيد انتشاها فشي حلو انه عندنا امكانية نشتري من اغلب انحاء العالم. 

- رابع شي يستخدمون الوزن الفعلي فقط لان بعض الشركات تقارن بين الوزن الفعلي والحجمي وتاخذ الاكثر يعني لما يكون شي حجمه كبير حتی لو خفيف يقيسون ابعاده ويطلع وزنه الحجمي كبير، ارامكس فقط ياخذون الوزن الفعلي

- الشحن سريع نوعا ما (من اسبوع الی عشر ايام) واسعار الشحن لا باس بها


من عيوبهم:

- ماعندهم خدمة التجميع اي بوكس يوصل يشحنونه على طول، الا اذا وصل اكثر من صندوق مكتبهم مع بعض في احتمال انهم يدمجونهم بوزن واحد، العيب انه احيانا الطلب عشر قطع من الموقع يشحنون منهم تسع بكرتون واحد ويشحنون قطعة بروحها! يندفع لها شحن بروحه 

- الوزن احيانا يقهر لانهم يحسبونه بكل باوند يساوي تقريبا نص كيلو اذا الشي وزنه غرامات معدودة ينحسب نص كيلو واذا شي وزنه مثلا 550 غرام ينحسب كيلو وهكذا.. للعلم هذا القانون متبع بكل شركات الشحن

- ماعندهم خيار لاختيار سرعة الشحن مع زيادة القيمة ماعندهم الا سرعة وحدة ،علی الحظ اذا مب زحمة عادي يوصل البوكس بثلاث ايام وايام الزحمة والمواسم عادي يتعطل الی اسبوعين واكثر. 

ارامكس التسجيل عندهم عن طريق الموقع علی طول من الصفحة الرئيسية



الشركة الثانية اللي تقدم عنوان أمريكي وانا معتمدة عليها بأغلب مشترياتي هي شركة MyUs 
ماي يو إس شركة فكرتها الأساسية مثل أرامكس، ولكن صندوقها موجود بس في أمريكا

وعندها مميزات اضافية
- التجميع مجان لمدة شهر كامل وبعدين الشحن الجماعي 

- شحنهم سريع يتعاملون مع فيدكس ودي اتش ال ويو بي اس.. ومن تجاربي معاهم احسن شي فيدكس، شحنهم أغلى من ارامكس لأنه سريع بينما أرامكس يعتبر اقتصادي، وبعد افضل فيدكس لاندي اتش ال كذا مرة جمركوني على اشياء شخصية ،كل مرة بعذر مختلف! اما يو بي اس ماجربتها اسعادها غالية مبالغ فيها.

- عندهم خدمة الشراء.. اذا الموقع مايقبل فيزا أمريكية ممكن هم يقومون بالعملية مع أخذ رسوم 

-بعد من مميزاتهم انهم يشحنون السوئل والعطور مع أخذ رسوم اضافية، بس ما انصح ان الشحنة تكون كلها عطور وسوئل لانها راح تتمشكل بالجمارك وتزيد احتمالية الكسر والتلف.

- وممكن تقليل الاشياء اللي تزيد الوزن مثل كراتين الاحذية او التغليفات اللي تزيد الحجم

- يوفرون امكانية الشحن لعنوان ثاني وبدولة ثانية 

من عيوبهم:
- يتعاملون بالوزن الحجمي إذا كان أكبر من الوزن الفعلي، يعني يقيسون حجم البوكس الطول والارتفاع والعمق ويحسبون الوزن عن طريقه.. اذا الشي كبير وخفيف  راح تدفعون له شحن مرتفع.

- ياخذون رسوم اضافية على كل خدمة زيادة، التغليف الاضافي، التصوير، تعليمات التغليف، ستيكر قابل للكسر او اي تعليمات خاصة

أنا مشتركة معاهم بحساب بريميم (60 دولار أمريكي سنوياً) عن طريق منتدى التجارة اللإلكترونية، اذا اشتركتو من خلال الموقع تحصلون عرض وتخفيض 25% على الشحنات واشتراك مجاني لأول سنة

هني التفاصيل: 

في شركات ثانية يقدمون خدمات مشابهة بس ماعندي معاهم تجربة فعلية ولكن بذكرهم بالاسم:
World Ship – Borderlinx – ViaBox –SpeedMetro – Boxhop 

كل الشركات تعطي عنوان شحن بصيغة مشابهة، وطريقة تعبئة البيانات جداً سهلة 

في المواقع الأمريكية المطلوب من العنوان:
الاسم - السطر الأول من العنوان – السطر الثاني من العنوان – المدينة – الولاية – الرمز البريدي – رقم التلفون 

هذي المعلومات تنعطى من شركات الشحن، وغالباً تكون نفس الترتيب يعني اللي نحصله من شركة الشحن هو نفسه ندخله بالموقع بنفس الترتيب بالضبط، السطر الثاني غالباً يكون هو رقم الصندوق بشركة الشحن. 
العنوان طبعاً بيكون موجود بموقع شركة الشحن، في ماي يو اس موجود على طول ببداية الصفحة وارامكس موجود من خلال My Addresses
لازم قبل أي عملية شراء خصوصا اذا كانت أول عملية تتاكدون ان العنوان صح 100%.. يفضل تسوون كوبي بيست عشان مايكون في غلط ويضيع الكرتون.
هذا مثال لكيفية تعبئة عنوان آرامكس وماي يو اس في موقع نوردستروم، لاحظوا الالوان بموقع شركات الشحن وترتيب اماكنها بموقع الشوبنغ، باغلب المواقع الامريكية خانات العنوان مشابهة



أما بعد أول عملية، راح يتسجل في الموقع فما تحتاجون كل مرة تدخلونه.

نصيحتي بالنسبة للعناوين الأجنبية: للمبتدئين بالشوبنغ أون لاين، أنصح بالشتراك في ارامكس لأنه برسوم مرة وحدة، ويشحن على طول بدون انتظار وسهل مافيه تعقيدات ومايحتاج تعليمات خاصة، ماي يو اس وشركات التجميع انصح فيهم للناس اللي يطلبون اكثر من 5 طلبات بالشهر الواحد. اما للشحنات المفردة بيطلع وايد أغلى

ناس وايد يسآلوني 

شكثر الشحن يكلف تقريبا؟؟ شكثر بدفع شحن لو طلبت هالقطعة؟ 

للسف مافي طريقة تعرفي الشحن قبل الطلب الا اذا كان الموقع يشحن مباشرة حزتها بيكون طالع الشحن جم
اما بالنسبة لصناديق الشحن الشحن حسب الوزن مثل ماقلت قبل يحسبونه بالباوند اللي يعادل نص كيلو تقريبا وكل شركة تختلف عن الثانية جم تحسب الشحن، كل ماكان الشحن اسرع كل ماكان اغلى
،الوزن مو بس وزن علبة المكياج! الوزن يشمل التغليفات، الكرتون، الفلين واشياء ثانية 
احيانا ممكن تقدر مثلا لو طالبة 4 حمر وببلاشرين وبودرة وجم محدد.. كلهم علبهم صغيرة فاغلب الظن بينشحنون ببوكس واحد صغير! فالشحن بيكون 90٪ باوند واحد او يصير باوندين
اما لو كان الطلب فيه باليتات شدو كبيرة مثل فايس او باليتات شاملة، او اطقم كاملة
هالشي اكيد بيزيد ال،زن لان حجمهم كبير وتغليف العلب ثقيل ويحتاجون حماية اكثز. 
ارامكس وماي يو اس عندهم حاسبة للوزن اذا كان وزن الكرتون معروف، ينعرف بس اي تغير بالوزن احتمال يغير القيمة 

بصفحة ارامكس الرئيسية موجود Rate Calculator 

اختيار الدولة واختيار وزن الكرتون بالباوند ويطلع السعر


·         الضرائب في أمريكا:
في أمريكا، الشحن يتغير حسب الموقع وقيمة الطلب واحيانا يكون مجاني اذا تعدى مبلغ محدد، وبالاضافة للشحن في ضرائب اسمها سيلز تاكس، تختلف حسب الولاية.
هذي خريطة تبين ولايات أمريكا والتاكس فيها:



كل ولاية لها رمز من حرفين٫ والرمز موجود في العنوان.. مثلا عنوان ارامكس في نيويورك رمزها NY وعنوان ماي يو اس في ولاية فلوريدا FL

التاكس غير قابل للاسترجاع بأغلب المواقع، ماعدا امازون عندهم سستم خاص لترجيع التاكس اذا الاغراض انشحنو خلال وحدة من شركات الشحن لخارج آمريكا. 
الطريقة لاسترجاع التاكس من آمازون: 

https://www.amazon.com/gp/taxExemption

اذا كان الغرض تم شراءه مباشرة من آمازون Sold & Shipped by Amazon / Fulfilled by Amazon

،في حالة ان الفاتورة موجود فيها tax

تصورون صورة التتبع من شركة الشحن آرامكس مثلا (بشرط يكون طالع فيها ان البضاعة واصلة من ارمازون، وواضح في التتبع ان الكرتون طلع من امريكا) 

ترسلون الصورة لامازون بايميل ويكون عنوانه Tax Exempt متبوع برقم الطلب على هذا الايميل:

auto-exempt@amazon.com 
مع ملء هالبيانات بملف وورد وارسالها كملف اتاجمنت بنفس الايميل

الطريقة والترجمة منقولة من الآخ **chocolate** من منتدى التجارة الالكترونية يعطيه العافية 



اللي باللون الأسود والأزرق هو المطلوب نسخه أما اللي باللون الأحمر فقط شرح لكل خطوة واللي باللون الأزرق يتم تعديله على حسب البيانات الخاصة بك لكل شحنة واللي بالأصفر يتم تعديلها حسب الشركة الناقلة لسلعتك من آمازون إلى آرامكس لأنها قد تكون UPS or USPS أو غيرها من شركات الشحن المتوفرة






1-ATTN: tax exempt
2- Shipment Number: ×××××××××× outside USA by aramex ship to Saudi Arabia
2-رقم طلبك في Aramex متبوعاً بالجملة السابقة والمقصود بها أن السلعة تم شحنها إلى خارج الولايات المتحدة وتحديداً إلى السعودية
3- Item Title: 6x Jose Eber Curling Iron, Black, 19mm
3-اسم السلعة من Amazon (يتم نسخها كما هي موجودة في صفحة حسابك في Amazon)
4- Order Number Amazon×××-×××××××-×××××××
4-رقم طلبك في Amazon الخاص بالسلعة
5-ايميلك المسجّل في Amazon
6- Ship from Amazon aramex address by ups track number: ××××××××××××××××××
6-تكتب الجملة السابقة (الشحن من Amazon إلى Aramex بواسطةUPSثم تضيف رقم طلبك في Amazon الخاص بالسلعة
7- Aramex tracking number: ××××××××××
7-رقم طلبك في Aramex
8- Bill of lading:

8-بوليصة الشحن ويتم أخذها من موقع Shop and Ship بطلبك المسجل لديهم ونقوم بتصويرها عن طريق زر Prt sc





·   ثالث شي أساسي: بالاضافة إلى البطاقة الائتمانية والعنوان الخارجي: حساب باي بال مربوط بالبطاقة اللي راح تستخدم في الدفع
باي بال هو يعتبر بمثابة البنك الالكتروني، مضمون وآمن ويحمي حقوق المشترين خصوصا في المواقع الجديدة او الغير موثوقة.. دام عندها خدمة البايبال يعني أمان ولو صار اي شي او اي عملية نصب الفلوس ترد اذا تمت الشكوى خلال 45 يوم، وبقانون البايبال الجديد مددوا المدة الى ست شهور.

الاشتراك في البايبال وربط وتفعيل البطاقة بسيط.. بس اهم شي رقم الهاتف المربوط بالبطاقة يكون متوفر حزة الربط عشان لما يوصل المسج اللي فيه كود التفعيل.

·         طريقة التسجيل: 
Sign Up


اختيار Individual  ومعلومات الدولة واللغة


والحين املاء كل البيانات ولازم تكون معلومات صحيحة وحقيقية مو معلومات مزيفة.. 
المعلومات بالترتيب من الاعلى للاسفل: 
البريد الالكتروني – الباسوورد – اعادة الباسوورد – الاسم الاول – الاسم الاوسط – الاسم الاخير (العائلة) – تاريخ الميلاد – الجنسية – العنوان السطر الأول – العنوان السطر الثاني (اختياري) – المدينة – المحافظة – الرمز البريدي – رقم الهاتف – رقم بطاقة الإئتمان – تاريخ انتهاء البطاقة – رقم حماية البطاقة الثلاثي او الرباعي الموجود بظهر البطاقة





العنوان هني لازم يكون مثل العنوان اللي عند البنك المصدر لبطاقة الائتمان 
الرمز البريدي اذا ما كان متوفر بداله خمس اصفار، المحافظة والمدينة ممكن يكونون نفس بعض، رقم الهاتف لازم يكون نفسه اللي عند البنك المصدر لبطاقة الائتمان مع الصفرين ورقم فتح خط الدولة . 
بعدها راح تطلع شاشة ندخل الرمز السري مثل ماهو مكتوب



بعد ماخلص التسجيل وتعبئة المعلومات، بقى خطوة تفعيل البطاقة المربوطة بالبايبال 
نروح الصفحة الرئيسية، بيكون فيها معلومات مبسطة عن الحساب.. نضغط هني للتفعيل 


وبعدين نختار الخيار الثاني لربط اكاونت البايبال بالبطاقة الائتمانية مباشرة



ندخل معلومات البطاقة والبيلنغ آدرس لازم يكون العنوان مثل ماهو عند البنك بالضبط


راح توصل رسالة نصية على رقم التلفون المربوط بالبنك وفيها رمز التفعيل للبايبال، مع سحب 4 دولار تقريباً من البطاقة للتفعيل.. يعني لازم يكون في البطاقة مبلغ بسيط مايصير تكون مصفرة، مبلغ التفعيل يرجع بعدين
بعدها راح يطلع هالمسج، تأكيد للمعلومات اذا كل شي صح Continue 


بيوصل مسج على التلفون فيه الكود بهالطريقة



نرجع للصفحة الرئيسية وعلى اليمين نضغط هالاوبشن 



ندخل الكود اللي وصل بالمسج 


وبتطلع لنا هالمسج انه الاكاونت تفعل



الحين خلصنا من البايبال وتفعليه، بس انا افضل من الحين تضيفون كل العناوين عشان يكونون محفوظين فيه 
من هني


العنوان الرئيسي اللي هو العنوان المحلي وعنوان البطاقة بيكون موجود
من Add Address  نضيف العناوين الأجنبية واحد واحد.. كوبي بيست من الشركة 


رابع شي: هو مو أساسي بس مفيد جداً للي يتسوقون أونلاين لأنه يجمع نقاط ويرجع نسبة من المشتريات كل 3 شهور بالبايبال، موقع ايبيتس لإسترجاع نسبة على المشتريات:

هذا لنك التسجيل له:
وسبق وشرحته بشكل كامل: 

خامس شي: تحويل العملة
كل موقع العملة فيه بتكون على حسب عملة البلد، غالباً دولار للمواقع الامريكية وللبريطانية باوند وللاوروبية يورو
في قليل من المواقع عندهم محول عملات خاص فيهم،

بس للي ماعندهم.. أسهل موقع موقع:
بمجرد اختيار عملة الموقع والعملة المحلية، ادخال المبلغ راح يتحول المبلغ بالضبط
بس طبعا اللي بينسحب بالبطاقة بيكون أكثر بشووي.. عشان رسوم البنك ورسوم البطاقة، ولأن سعر الصرف يتغير.

بعد توفر هالخمس أشياء اللي شرحتهم فوق بالتفصيل.. 
البطاقة الائتمانية + العنوان المحلي والاجنبي + حساب بايبال مفعل + حساب ايبيتس + تحويل العملات

****** 

الحين هالمعلومات اللي فوق ادري انها وايد ودسمة! بس تطبيقها سهل وأول مايتوفر كل شي.. 

الحين يبتدي الشوبنغ أون لاين الفعلي وبكل سهولة 
اول شي في عند البعض مفاهيم غلط ان في اشياء وايد ماتنشحن، أكثر شي أنسئل عنه شلون تشحنين مكياج وسوائل وعطور وهو ممنوع؟ 
شحن المكياج مو ممنوع، شحن السوائل والعطور بعد مو ممنوع ولكنه مسموح بحدود وقوانين 
المكياج كل أنواعه تنشحن، أغلبه عن طريق العناوين الاجنبية وبعضه ينشحن مباشرة 
السوائل تنشحن بس تندفع لها رسوم اضافية ومثل ماقلت ما انصح البوكس يكون كله سوائل
ترى حتى بعض الاكل تقدرون تشحنونه عادي ههههه بس على مسؤوليتكم 
في أشياء ممنوعة جمركياً حسب قوانين الدولة، وفي أشياء ممنوعة انها تنشحن دولياً.. مثل الأسلحة والاعضاء البشرية والحيوانات وبعض الأدوية، الالعاب اللي على شكل اسلحة ومواد خطرة، السجائر ومنتجات التدخين، تذاكر القمار واليانصيب، الرادارات.... الخ
هذا اللنك فيه الاشياء الممنوعة من الشحن بارامكس حسب كل دولة: 



·         شحن المكياج:
والحين راح ابتدي بمواقع شحن المكياج لأنها الأكثر طلب واللي انا أكثر شي مدمنة عليها

المكياج نوعين
النوع الأول: هو الهاي اند او الماركات العالية/الأصلية.. مثل ديور، شانيل، غيرلان، ماك، دولتشي آند قابانا وغيرهم هالماركات لازم تنشرى من مواقع موثوقة لأن تقليدها متوفر وايد بالمواقع الصينية وحتى ببعض المواقع الأمريكية، هالماركات سعرها يكون من متوسط مايل للمرتفع، علبها فاخرة غالباً وتتميز باشكالها المميزة
النوع الثاني دراجستور أو الصيدلية، مثل ماركات مايبلين، ريميل، ان واي اكس، ريفلون وغيرهم هالمكياج من الماركات المتوسطة وأسعاره تتدرج من رخيصة الى متوسطة، العلب عادية أغلب الاوقات بس هذا مايعني انه المنتجات مو زينة بالعكس في وايد من مكياج الدرجستور متميز، ويتحصل بسهولة نسبياً بدون خوف من التقليد 
حسب خبرتي، راح احط لكم هالمواقع اللي تعاملت معاها أكثر من مرة وأعتمد عليها 
أغلب المواقع تطلب صندوق أجنبي للشحن، وانا افضل هالخيار، ما انصح بالشحن المباشر للمكياج لأنه غالباً يوصل على البريد العادي وياخذ وقت فاحتمال كبير يتأثر المكياج، الشحن المباشر ارخص بس الشحن عن طريق صندوق اضمن عندي لانه اسرع

·         للماركات الهاي إند:
  
·         www.Nordstrom.com 
هالموقع اقدر أقول عنه الحب! كل ماركات الهاي إند أحصلها فيه وعلى راسهم ماك... وغيرها ديور، غيرلان، شانيل، نارس، شارلوت تيلبري دولتشي آند قابانا، كيهل، أنستازيا، أربان ديكاي، إستي لودر، كلينك، لانكوم.. وغيرها وغير عندهم اشياء ثانية غير المكياج اصلية ومضمونة
الموقع يشحن مباشر، بس للمكياج والعناية لازم صندوق أمريكي.. تغليفهم ممتاز ويوصلون الاغراض للصندوق خلال ثلاث او أربعة أيام عمل. وغير هذا موجود في ايبيتس ونسبة الاسترجاع 3% واوقات وايد تكون دبل 6% واحياناً توصل 10% في بعض المواسم، الكستمر سيرفس عندهم ممتاز ومتساعدين ويردون على طول سواء بالايميل او الشات او تويتر، انا كذا مرة وصلني منهم اشياء مكسورة وخيروني انهم يردون لي الفلوس او يرسلون لي بديل. غير المكياج والعناية عندهم ماركات الشنط والشوزات والاكسسوارات والثياب وكلها ماركات اصلية ومضمونة.  احيانا يشحنون الاغراض بأكثر من بوكس فعادي تدفعين شحن لكرتون فيه بس غرض واحد!

الحب الثاني، بس لو لا انهم يتعصلقون بالطلبات! سيفورا الطلب منهم على الحظ وايد أوقات يرفضون البطاقات اللي مو مصدرة من أمريكا! وايحانا تجيهم فترة يقبلون وفترة يرفضون :/ بس الموقع عجيب ويستاهل يكون الثاني عندي، متخصص لكل منتجات الجمال من مكياج الى عناية الى كريمات.. عندهم ماركات حصرية لهم وعروض حصرية لهم واطقم ماتتحصل الا عندهم، شحنهم سريع يوصل الصندوق خلال يومين إلى 3، عندهم برنامج نقاط خاص فيهم عن كل دولار ينصرف تنحسب نقطة، وكل مازادت النقاط ارتفعتي بالمستوى
 (3 مستويات وكل مستوى له مميزاته) وعندهم هدايا تتبدل بالنقاط، أغلب الهدايا تكون بـ 100 نقطة أو 250 نقطة والكبار 500 نقطة، النقاط تتجمع وماتنتهي.. وبعد الموقع موجود في ايبيتس وأغلب الاوقات تكون نسبة الاسترجاع 8%  

هالموقع فيه كذا ماركة من الهاي إند للمكياج والعناية مثل أربان ديكاي، تو فيسد، أنستازيا، آي تي كوزمتكس.. أغلب ماركاتهم من الماركات الهاي اند بس اللي اسعارها اقل شوي من الماركات التوب مثل ديور وشانيل وتوم فورد.. يعني بالنص
الحلو فيه انهم عندهم برنامج خاص فيهم يجمع 5% من كل عملية مشتريات، وبعدين كل 3 شهور تنعطى كرصيد للاستخدام خلال شهر واحد قبل ماتخلص، يقبلون البطاقات الاجنبية بسهولة بس يحتاجون صندوق أمريكي. موجود بايبيتس ونسبة الاسترجاع عندهم 5% وساعات تصير10%.
عيبهم إنه أحيانا التغليف مالهم سيء! مايصلح للمنتجات اللي تتكسر بسرعة لأنها صارت لناس وتتكسر
خدمة الزباين عندهم مو لهناك.. يردون بس متأخر وساعات يردون الفلوس وساعات لا. واحيانا يشحنون الاغراض بأكثر من بوكس فعادي تدفعين شحن لكرتون فيه بس غرض واحد!

·    ثاني شي ماركات الدرجستور او الماركات المتوسطة، هذول توفرهم اسهل واسرع خصوصا ان تقليدهم قليل.

·         www.drugstore.com
اول موقع درجستور من اشهر المواقع للماركات المتوسطة، وفيه اشيا وايد غير المكياج، الموقع تابع لبيوتي فتمشي عليه نفس نظام النقاط والبوينتات اللي تتجمع كل 3 شهور ينطبق عليه نفس كلام موقع بيوتي
عندهم برنامج خاص فيهم يجمع 5% من كل عملية مشتريات، وبعدين كل 3 شهور تنعطى كرصيد للاستخدام خلال شهر واحد قبل ماتخلص، يقبلون البطاقات الاجنبية بسهولة بس يحتاجون صندوق أمريكي. موجود بايبيتس ونسبة الاسترجاع عندهم 5% وساعات تصير10%.
عيبهم إنه أحيانا التغليف مالهم سيء! مايصلح للمنتجات اللي تتكسر بسرعة لأنها صارت لناس وتتكسر
خدمة الزباين عندهم مو لهناك.. يردون بس متأخر وساعات يردون الفلوس وساعات لا. واحيانا يشحنون الاغراض بأكثر من بوكس فعادي تدفعين شحن لكرتون فيه بس غرض واحد!

·         www.CherryCulture.com
موقع فيه بس مكياج، كلها ماركات متوسطة، عندهم شحن دولي والدفع عن طريق الكردت كارد مباشرة. ،عندهم برنامج نقاط خاص فيهم وكل فترة يسوون عروضات حلوة.

·        شحن العطور:

العطور في لهم طريقتين، يا إنه ينشحنون بصناديق الشحن وتنحسب عليهم رسوم زيادة 
شركة ما ي يو إس ياخذون رسوم ثابتة على شحن العطور تعادل $10.500 دولار لكل شحنة فيها عطور ومواد قابلة للاشتعال

مثلا لو الكرتون فيه ثياب ومكياج وعطر واحد، بيندفع زيادة $10.500 دولار 

ولو كان الكرتون فيه 5 عطور، الرسوم الاضافية بعد بتكون $10.500 دولار

أما أرامكس شوب آند شيب يشحنون العطور والمواد القابلة للاشتعال، وبعد ياخذون 10$ دولار رسوم 

بس عندهم شروط مقعدة أكثر 

في حالة استخدام صندوق الشحن، ممكن التعامل مع اي موقع موثوق فيه عطورات مثل سيفورا ونوردستروم


والطريقة الثانية، شحن العطور مباشرة من المواقع المتخصصة بالعطور اللي تقبل الشحن المباشر، هالمواقع تتكفل بشحن العطور لباب البيت بس رسوم شحنها تكون مرتفعة نوعاً ما 

وأهم شي التأكد إنه الموقع يقدم عطورات أصلية لأن تعرفون انه العطور في وايد منها تقليد!

اما طريقة التاكد من العطور اصلية او لا أحسن شي بعد ماتحصلون موقع وتعرفون العطور

تقرون ريفيوز وتجارب الناس اللي مجربينه 

اذا كان الموقع مشهور ممكن تحصلون له ريفيوز في المواقع العربية

او تبحثون بالانجليزي وتترجمون بقوقل 


هذي بعض المواقع الموثوقة والمعروفة اللي تشحن مباشرة





طبعا قبل اختيار العطور لا تنسون تجربونه اول وتنتظرونه يبرد وتتأكون انه يناسبكم قبل ماتطلبونه

لا تعتمدون على الشكل الخارجي او اراء الناس بدون تجربة شخصية لأن العطور اذواق. 

ملاحظة: شروط ورسوم شحن العطور تنطبق على مواد التجميل القابلة للاشتعال مثل اصباغ الاظافر، رش الشعر. أي شي رش ومضغوط 


غير المكياج والعطور، في اكثر موقعين مشهورين هم آمازون وايباي،
 هالموقعين تجمع لعدة متاجر وتجار، بعضهم يشحنون مباشرة وبعضهم يحتاجون صندوق دولي

·         www.amazon.com
 انا احب امازون لان خدمة الزباين عندهم اعلى مستوى، خصوصا للمنتجات اللي تنباع من عندهم مباشرة يكون مكتوب تحتها Shipped from Amazon / Fulfilled by Amazon اذا مكتوب جذي يعني القطعة طالعة من مخازن امازون وعندهم وايد ماركات واشياء من كل النواحي، وعندهم شحن دولي وفي الفترة الاخيرة زادت الاشياء المتوفرة عندهم للشحن المباشر، سريع وامن والدفع عندهم من البطاقة مباشرة بدون بايبال

·         www.ebay.com
 اما ايباي فهو موقع اشتهر في البداية بالمزادات والحين فيه اشياء من كل دول العالم ممتاز للبحث عن الاشياء النادرة والمقطوعة بس يحتاج حذر لان فيه تقليد وايد.. اهم شي البايع يكون تقييمه عالي Top Rated Seller الدفع عندهم لازم بالبايبال 


لستة مواقع تشحن مباشر بدون الحاجة لصندوق اجنبي، الدفع بيكون يا اما بالبطاقة او عن طريق البايبال مثل ماشرحت فوق 

·        مواقع تقبل البطاقات الدولية او البايبال بس تحتاج صندوق اجنبي

التسوق آون لاين حاله حاله التسوق العادي، في بعض المواسم تكون في عروض وتخفيضات خاصة
هذي بعض مواسم التخفيضات الاساسية:

  • البلاك فرايدي / الجمعة الاسود 
يصادف اخر جمعة من شهر نوفمبر 11 الميلادي، العروض فيه تكون قوية واحيانا التخفيضات توصل حتى 50٪، غير عروض الشحن الرخيصة والهدايا المجانية، هالمناسبة معروفة عند الاجانب لان يبتدون فيها التسوق لهدايا الكرسمس، بعض المواقع تبتدي العروض مبكر مثل امازون من بداية نوفمبر يبتدون بعروضات وتخفيضات يومية، بعض المواقع التخفيض والعروض تكون محصورة بيوم البلاك فرايدي بس وبعضها التخفيض يكون موجود يومين او ثلاثة.

  • موسم الكرسمس والنيو يير
هالموسم احلى موسم عند الاجانب وااايد احبه للشوبنغ لان اغلب الماركات خصوصا المكياج والكريمات والعطور ينزلون اطقم حلوة بالاحجام الكاملة أو ميني خاصة بالهوليدي ويكونون بتغليفات ونقشات مميزة، غير الكولكشنات اللي تكون خاصة بهالفترة، هالموسم انسب موسم لشراء الهدايا والاطقم لانها تكون متوفرة بوفرة. احب اشتري عطور واطقم عناية هالفترة. 

  • تخفيضات منتصف السنة
غالبا تكون بنص السنة الميلادية على شهر يونيو الميلادي، اكثر شي هالسيل ينشاف بالمواقع اللي تبيع ماركات عالمية اصلية، السيل يكون على السيزن المنتهي، اشوفه اكثر شي يسوى للساعات والاكسسوارات والشنط.. خصوصا الموديلات الكلاسيك 

  • تخفيضات الذكرى السنوية لموقع نوردستروم: 
من التخفيضات المفضلة لي بالسنة! موقع نوردستوم يحتفل بذكرى افتتاحه كل سنة بشهر يوليو 7 الميلادي، في البداية يكون السيل بس حصري للي عندهم عضوية نوردستروم الخاصة، وبعد كم يوم يكون مفتوح للكل لمدة اسبوعين تقريبا من نص الشهر، السيل عجيييب ويشمل وايد اشياء بالموقع من الثياب للمكياج للاطقم للشنط للشوزات والاكسسوارات! ويكون في كاتلوج متوفر اون لاين وفيه الاشياء اللي عليها وسعرها بالسيل وبعد السيل جم راح يكون. غير التخفيضات يكون في اطقم ومنتجات تنزل باشكال خاصة بنوردستروم بهالمناسبة.

  • تخفيضات الاعياد المختلفة:
هالتخفيضات والعروض مو بمستوى التخفيضات الكبيرة اللي فوق، بس احيانا فيها عروض حلوة… امثال هالاعياد: الام، الاب، الفالنتاين، الفصح الايستر، الهالوين، القديس باتريك، العيد الوطني، عيد العمال، العودة للمدارس. اغلب العروض في هالاعياد تكون بشكل عروض تخفيضات او شحن مجاني او شحن سريع، واحيانا في تخفيضات على المنتجات المرتبطة بالمناسبة. بالاضافة الى ان احيانا ذكرى انشاء الموقع يكون في عروض خاصة. 

·        كوبونات التخفيض والعروض الخاصة:
شي اخير غير التخفيضات المعلنة، في شي اسمه كوبونات تخفيض احيانا تكون متوفرة بعروض بسيطة مثل هدية مجانية او شحن مجاني او خصم بسيط كم دولار، تتحصل بقوقل كتابة اسم الموقع ووراها كلمة كوبون مثل Nordstrom Coupon ونشوف كم موقع اللي يطلعون اول، الكوبونات يا تكون عن طريق لنك ينقل للموقع ويكون العرض موجود، او من خلال رمز محدد ينسخ وينحط بخانة الكوبون تكون موجودة بخطوة الدفع

طبعا مثل ماقلت الكوبونات احيانا تكون موجودة، مو شي اساسي بعملية الشراء


هذي بعض المواقع اللي فيها كوبونات:


وبعض المواقع في حالة الاشتراك بقائمتها البريدية ترسل على الايميل كوبونات وعروض خاصة لفترة محددة، غالبا كهدية ترحيبية بسيطة بمناسبة اول طلب.

ختام الموضوع، حابة اذكر انه مافي شي كامل بدون عيوب، الشوبنغ اون لاين عجيب وبحر واسع واي شي يخطر على البال يتحصل، وبعض الاشياء تتحصل باسعار وعروض رهيبة، بنفس الوقت في اشياء ممكن تصير مثل التلف، التكسر، ضياع الشحنات لا سمح الله! احيانا التغليف يلعب دور واحيانا حتى الجو، انصحكم تحطون بالكم لهالنقاط مثلا لما بتطلبون شي يتكسر حاولو تطلبونه وسط كذا قطعة مو بروحه عشان يكون وسط حماية، في عز الصيف لما يكون الجو وايد حار تجنبو تطلبون الاشياء اللي ممكن تذوب مثل الارواج والكونسيلرات والباليتات الكريمية، تجنبوا تطلبون فاونديشن او بودرة او عطر بدون تجربة شخصية! لا تعتمدون بس على الصور من النت وحاولو تقرون المواصفات بالتفصيل بالنسبة للملابس وتحاولون تدورون صور لنفس المنتج من تصوير ناس لان الصور الرسمية تغير من شكل المنتج وايد.. طبعا للاحسن 

ان شاء الله تكونون استفدتوا واكون جاوبت على استفساراتكم وعلمتكم! 
اللي تستفيد تدعي لي، واللي بتنقل الموضوع تذكر الرابط واسمي في انستقرام @Sanooya 

ان شاء الله يكون الموضوع وافي قدر الامكان، عصرت مخي وحاولت اذكر كل معلومة عرفتها من خبرتي في الشوبنغ اونلاين بهالثلاث سنوات.

اللي عندها اي سؤال، او موقع حابة اضيفه في لستة المواقع تحطه لي بكومنت. 

عاد فرحوني بالكومنتات والتفاعل ترى وايد تعبت على الموضوع!

27 comments

  1. I was looking forward for this post. So much details which are SO HELPFUL. Thanks and keep it up xx y36eesh il3afyaa.

    ReplyDelete
    Replies
    1. You more than welcome dear, I'm really glad you liked the post and that it actually helped you.
      Thanks for your comment

      Delete
    2. السلام عليكم
      اخى الفاضل مجرد اضافة بسيطة لموضوع المميز
      هدا رابط اشتراك سنتين بدون ان تكون لديك بطاقة فيزا اى ان هدا الرابط صالح لجميع البطاقات
      رابط مختصر
      تفضلو http://goo.gl/Py5xRm
      ومشكور على الموضوع المميز

      Delete
  2. ما شاء الله عليج يا حبيبتي الله يعطيج العافيه .. وفيتي وكفيتي ..

    ReplyDelete
    Replies
    1. الله يعافيج :*
      حاضرين واهم شي انكم استفدتوا <3

      Delete
  3. شكككككرا جعلك فالجنه على هالبوست ❤❤

    ReplyDelete
    Replies
    1. حبيبتي آميين أجمعين
      أسعدني تواجدج

      Delete
  4. شكرااا سناء على البوست يعطيش العافية، بخليه رفرنس لوقت الحاجة:D

    عندي سؤال يمكن غبي شوي��، البايبال يقبل بطاقة الأي تي ام ولا لازم فيزا او بطاقة مسبقة الدفع؟

    وجربتين من قبل تشترين من المواقع العربية مثل نمشي وسوق كم؟

    وشكراً أقين❤️

    ReplyDelete
    Replies
    1. البايبال ما يقبل الا بطاقة فيزا او ماستر كارد

      بطاقة الاatm
      مايقبلها

      Delete
  5. عجيب ����

    اول مره اعرف عن الايبيتس ����

    شرح وافي وجميل

    عندش موقع carters
    حليوين ثيابه .. كذا مرة اطلب منه
    يقبلون فيزا كارد وعنوان امريكي
    وعدهم عروض وسيلز
    ويطرشون كوبونات على الايميل
    وكوالتي مالهم جدا لطيفة

    ReplyDelete
  6. سيفورا ما رضوا يشحنون طلبي لصندوقي الامريكي يقولون سياسه يديده ����

    ReplyDelete
  7. How do you order from sephora?:( mayw9loon weya aramex

    ReplyDelete
  8. الله يعطيك العافيه سنوي وتسلم يدينك على هالموضوع الكامل المتكامل،،فعلا التسوق بالنت بحررررر ،وتوني ادري عن موضوع ايبيتس ،حساااافه عاد انا دايم اشتري من نوردستورم ،لو الحين جمعت نقاط ،موضوع رائع موااااه

    ReplyDelete
  9. ياسلام..موضوع مميز و شامل..سؤالي،،ابغا اطلب مكياج من شارلوت تليبيري،،هل يشحنون مباشر ..ام احتاج صندوق دولي

    ReplyDelete
  10. مشكوه حبيبتي على البوست الجميل

    ReplyDelete
  11. يا زينك يالسميّة
    الله يجزاك الجنة و يرفع قدرك

    ReplyDelete
  12. يا زينك يالسميّة
    الله يجزاك الجنة و يرفع قدرك

    ReplyDelete

  13. شرح جميل ومقال مميز .. شكرا لك
    واحب مشاركة مقالي هنا يضم قائمة باشهر موقع تسوق على الانترنت والشراء اونلاين:
    من الرابط التالي / http://www.urmianews.com/2015/06/blog-post.html


    تسوق عبر النت

    ReplyDelete
  14. موضوعك شامل ما شاءالله ،
    ربي يجزاك الخير

    عندي سؤال بخصوص عضويه نوردستورم، حاولت اسجل فيها بس ما عرفت وش يقصدون بالssn،
    قلت بما ان عندك العضويه تقولي لي هي عباره عن ايش؟ اكون شاكره لك

    ReplyDelete
  15. تعرفوا على افضل مواقع تسوق عبر النت في الوطن العربي
    افضل مواقع التسوق عبر الانترنت في الامارات

    ReplyDelete
  16. الله يعطيك الف عافية ������
    عندي سؤال من فضلك
    كيف اعرف ان الشحنه تتجزاء
    لان افكر اشترك بارمكس بس مابي الشحنه تتجزاء

    ReplyDelete
  17. اشكرك على المعلومات المفيدة

    بس حبيت اسال
    ارامكس يشحنون المكياج والعطور؟

    ReplyDelete
  18. شكرااااااااا موضوع مفييييييد جدا جدا

    ReplyDelete
  19. شكرًا شكرًا شكرًا كثير جزاك الله خير

    ReplyDelete
  20. Thank you so helpful cant wait to start shopping online

    ReplyDelete
  21. مررره مررره شكراً الله يسعدك استفدت منك مره وربي ينفع بنا😘❤️❤️

    ReplyDelete