{ 2016 BLACK FRIDAY & YEAR END SALES | تخفيضات البلاك الفرايدي ونهاية السنة }

السلام عليكم ورحمة الله وبركاته

يسعد صباحكم او مساكم وين ماكنتوا

قربنا نهاية شهر 11 وطبعاً هذا يعني: البلاك فرايدي! في الأسبوعين الأخيرين أكثر شي إنسألت عنه وسمعته هالكلمة: خبرينا عن عروض البلاك فرايدي السنة.

آخر تحديث: الخميس 24 نوفمبر 5:00 مساءًا

{ What have I bought lately | شنو شريت مؤخراً؟ موضوع محدث بإستمرار }

السلام عليكم ورحمة الله 

يسعد صباحكم أو مساكم وين ماكنتوا 

موضوعي اليوم بعد غيبة هو عن مشترياتي بس بشكل مبسط ونوعاً ما مختلف، 

فكرت بما إن دايماً أصور مشترياتي أول ماتوصل أول بأول وأحطها بالسناب وأحياناً بانستقرام وتروح عقب مدة وارد أنسأل عنها

فقلت احسن حل أسوي هالبوست ويكون متجدد باستمرار، أحط فيه مشترياتي اللي وصلتني، مع النبذة المبسطة عنها ولنك الشراء المباشر. منها تبقى المعلومات على طول والوصول سهل لها، ومنها تفيدني أنا بعد أعرف شنو الأشياء اللي عندي أحتاج أسويها ريفيو. 

قبل ما أبدأ بمشترياتي بالفترة الأخيرة، بخبركم عن شركة الشحن اللي حالياً  أتعامل معاها، مفروض أكتب عنها بوست منفصل وأشرح تجربتي وكل شي بس بوقت ثاني... 

بس المختصر المفيد إن هذي شركة شحن جديدة صارلي كم شهر أتعامل معاها ووايد عاجبني التعامل، خصوصاً إنهم متعاملين مع أغلب شركات الشحن، البريد الأمريكي، أرامكس، دي إتش إل وفدكس.. أنا كل تعاملي معاهم مع أرامكس لأنها تعتبر شركة شحن إقتصادية فالسعر يكون دايماً أرخص من باقي الشركات وبنفس الوقت سريعة! تاخذ حوالي 5 أيام من تاريخ الدفع لين توصلني. 

الشركة عندها خدمة التجميع المجانية لمدة مية وثمانين يوم – يعني حوالي ستة شهور وعندهم خدمة التصوير الفوري المجاني للكرتون، مع امكانية طلب صور اضافية لداخل الكرتون بفلوس، وعندهم خدمة اعادة التغليف والتخلص من كراتين الاحذية والفواتير وغيرها. تجميعهم ياخذ تقريباً يوم إلى يومين والدفع عن طريق البايبال.

جربت أشحن معاهم كل شي تقريباً ماعدا العطور والسوائل.. المكياج، أصباغ الأظافر، أدوات كهربائية، ملابس، اكسسوارات، شنط، شوزات.. كلها انشحنت بدون مشاكل ووصلت سليمة. عندهم قائمة ممنوعات بس الحمدلله للحين ماصادفني اي شي انرفض شحنه. 

اسم الشركة فشزفاست وهذا لنك الاشتراك: 

[ HERE ]

وإذا حابين تتعلمون الشوبنق أون لاين بس ماعندكم أي خلفية عن الموضوع! لا تحاتون... الموضوع عندي بس تحتاجون ساعة عالاقل من الروقان والتركيز وان شاء الله بتعرفون كل شي 

[ HERE ]

ولا تنسون الكاش باك تستخدمونه قبل التسوق من كل موقع وتشوفون إذا فيه كاش باك 

شرحي لمواقع الكاش باك الأمريكية اللي أتعامل معاها: 

إيبيتس:

[ EBATES: SHOPPING ONLINE TREAT! إيبيتس: مكافآت التسوق أون لاين ]

مستر ريبيتس: 

[ MR REBATES CASHBACK, EBATES COMPARISON ] خدمة الكاش باك من مستر ريبيتس ومقارنتها مع إيبيتس

أما الحين نرجع لآخر المشتريات

أجندتي لعام 2017، اخترت الهابي بلانر من Me and My Big Ideas الحجم الوسط السبب لأنها تعطيني الحرية أشيل أو أضيف أي ورقة للبلانر، أخذت معاها الخرامة اللي تخليني أخرم أي ورقة خارجية بحجم البلانر، وفواصل أحط فيها أوراق خارجية، وانا اتصفح صفحة الستيكرات وأختار ستيكرات طلع جدامي اختراع جميل! اداة مكتبية بسيطة تحول أي ورقة مطبوعة حجمها مايزيد عن انشين إلى ملصق! اخذت معاها تعبئة مادة اللصق الاضافية، الاساسية اللي معاها لاصق دائم اما النعو الثاني فهو يخليني اغير مكان الملصق متى مابغيت.

تكلمت على السريع عن مميزات البلانر والملحقات، في هالبوست بس بصورهم مع اللنكات والسعر، بس إن شاء الله بعد ما اكون استخدمتها حوالي شهر على الأقل راح أسوي موضوع منفصل فيه مراجعة كاملة وكل الاضافات والنقاط المفيدة وتجاربي للملحقات. 

هالخمس أشياء طلبتهم بطلب واحد وشحنتهم مباشر على البحرين، كان سعر الشحن ثلاثين دولار والاغراض سعرها حوالي 58 دولار، صح ان الشحن سعره اكثر من نص قيمتهم بس في نفس الوقت مناسب، لأن البلانر والخرامة اثنينهم وزنهم ثقيل، بالنسبة للشحن وصلني الكرتون بـ 9 ايام بالضبط عن طريق ارامكس، قبل 6 أيام من التاريخ المحدد... كل مرة أختار صندوقي الامريكي لأن احس سعر الشحن المباشر غالي، هالمرة عجبني وكان جداً مناسب وسريع، اكيد بكررها مستقبلاً

اسم المنتج: هابي بلانر الحجم الكلاسيك، لـ 18 شهر

الاستخدام: أجندة يومية لتنظيم اليوم الاسبوع والشهر، مع امكانية اضافة صفحات وملحقات اضافية

السعر: حوالي 18 دولار 

اسم المنتج: خرامة أوراق

الاستخدام: من نفس شركة البلانر مخصصة لهالحجم عشان أخرم أو ورقة خارجين واضيفها للبلانر

التشغيل: عادي مثل أي خرامة

السعر: حوالي 19 دولار 

اسم المنتج: صانعة ملصقات يدوية

الاستخدام: تحول أي ورقة مطبوعة لستيكر، باضافة مادة لاصقة وتغليفها مثل الستيكر

التشغيل: يدوية بالسحب

السعر: 8 دولار 

اسم المنتج: ورق لاصق اضافي

الاستخدام: لتبديل الورق الاصلي مع الستيكر ميكر اذا خلصت، هذا النوع يخلي الستيكر ينشال ويتغير مكانه بدون مايخرب الورقة

السعر: حوالي 5 دولار 

اسم المنتج: 6 فواصل مع جيوب للبلانر 

الاستخدام: ينحط بالجيوب اي شي ورقي مثل جداول، صور، تذاكر، أرصدة...

السعر: حوالي 8 دولار 

والحين مشتريات آي هيرب الأخيرة 

تضايقت من آي هيرب من بداية السنة الجديدة ألغوا الخصم على الشحن من بعد مايطوف الطلب 40 دولار، بس بعدها عرفت ان الشحن المرتفع بس على المواد الغذائية أما الباقي للحينه رخيص، 

هالأسبوع كان عندهم خصم على منتجات البيوتي والشاور، فاستغليت الفرصة وسويت طلب وهذي كانت الأشياء اللي شريتها: 

ما شاء الله هالمرة وصل الطلب بيومين بس! يوم الطلب ويوم الشحن ويوم ثاني الصبح هو عندي.

لا تنسون تستخدمون كودي عند  الطلب: DQB354

نبدأ:

اللنك المباشر

 اسم المنتج: شامبو مادري  لابز

الاستخدام: لتكثيف الشعر

السعر: 7 دولار 

اللنك المباشر

 اسم المنتج: شامبو أفالون أورغانكس بزيت شجرة الشاي

الاستخدام: لموازنة فروة الرأس

السعر: 8 دولار 

اللنك المباشر

اسم المنتج: شامبو للفروة من ديرما إي

الاستخدام: لموازنة فروة الرأس

السعر: 10 دولار

أخذت هالثلاث شامبوهات لأن جذوري دهنية هالفترة وزايدة.. من جذي ركزت على شامبوهات مخصصة للفروة.

اللنك المباشر

اسم المنتج: ماسك للشعر بزيت الزيتون والأفوكادو 

الاستخدام: لتقوية وإصلاح وترطيب الشعر

السعر: 8 دولار 

اللنك المباشر

اسم المنتج: بلسم بجوز الهند والكركديه

الاستخدام: لتقوية وإصلاح وترطيب الشعر

السعر: 7 دولار 

اللنك المباشر

اسم المنتج: فرشاة للشعر من إيكو تولز

الاستخدام: تجفف الشعر بنسبة 40% اسرع من الفرش العادية، فكرتها إن الفتحة اللي بالوسط تسمح لهوا السشور ينفذ لكل الشعر وبالتالي يجف اسعر م نالفرش العادية اللي تغطي الشعر فتاخذ وقت  أطول بالتجفيف.

     السعر: 10 دولار 

اللنك المباشر 

اسم المنتج: فرشاة للشعر من إيكو تولز

الاستخدام: تجفف الشعر بنسبة 20% اسرع من الفرش العادية، فكرتها إن الفتحات اللي بالوسط تسمح لهوا السشور ينفذ لكل الشعر وبالتالي يجف اسعر م نالفرش العادية اللي تغطي الشعر فتاخذ وقت  أطول بالتجفيف.

     السعر: 10 دولار 

اللنك المباشر

اسم المنتج: أملاح  الشاور بملح الإيبسوم وزيت الزيتون وبرائحة الحمضيات والاكيبلابتس

الاستخدام: تنرش في ماي البانيو الجاري وهو حار، للاسترخاء وتهدئة الأعصاب

      السعر: 10 دولار 

أحب أملاح الشاور وأحب أطلبهم من إي هيرب لأن سعر الشحن جداً معقول وعندهم خيارات متنوعة، لو بطلبهم من مكان ثاني بدفع شحن مرتفع لأن وزنهم ثقيل، وفي السوق المحلي متوفرين بأنواع محدودة جداً. 

اللنك المباشر

اسم المنتج: رغوة البانيو باللافندر

الاستخدام: تصب بالبانيو تحت الماي الجاري وهو حار وتتذوب لين تستوي رغوة

      السعر: 7 دولار 

نفس الأملاح، الرغوة منتج أحبه للشاور وأحب أطلبه من آي هيرب بعد لنفس السبب.

اللنك المباشر

اسم المنتج: مقشر للجسم بالقهوة

الاستخدام: لتقشير الجسم خلال/قبل الشاور

      السعر: 12 دولار 

اللنك المباشر

اسم المنتج: صابون سائل لليد بالفانيلا والمشمش

الاستخدام: 

      السعر: 5 دولار 

اللنك المباشر

اسم المنتج: تونر ثايرز  الخالي من الكحول بالورد

الاستخدام: لتنظيف البشرة بعد المنظف، قبل المكياج، أو إنعاش  البشرة بأي وقت.

     السعر: 9 دولار 

اللنك المباشر

اسم المنتج: زيت خفيف بماء الأرز من ذا فيس شوب

الاستخدام: لتنظيف البشرة

     السعر: 11 دولار

اللنك المباشر

اسم المنتج: غسول رغوي بشمع النحل وزيت شجرة الشاي

الاستخدام: لتنظيف البشرة وموازنة الزيوت وتهدئة البشرة الحساسة

     السعر: 9 دولار

هالمنتجين كوريين، وانا ماحب المنتجات الكورية وماعندي ثقة فيهم بس قررت أعطيهم فرصة وأجرب هالاثنين وأشوف. 

اللنك المباشر

اسم المنتج: مقشر كوين هيلين بالنعناع

الاستخدام: لتقشير وانتعاش البشرة وتنقيتها

     السعر: 4 دولار

عندي منه الماسك واحبه وايد فعلاً فعال ومنعش، فقلت هالمرة أجرب المقشر

اللنك المباشر

اسم المنتج: منظف   للوجه من ديرما إي  

الاستخدام: لتنظيف وتجديد ومرونة البشرة

     السعر: 13 دولار

اللنك المباشر

اسم المنتج: مستحضر ليلي بالأحماض لتقشير البشرة من ديرما إي  

الاستخدام: يساعد  تقشير البشرة وإزالة الجلد الميت وتصفيتها  مع الوقت

     السعر: 16 دولار

اللنك المباشر

اسم المنتج: فرشاة كونسيلر من ريل تكنيك  

الاستخدام: للكونسيلر، حجمها حلو والراس مدور تسمح بتوزيع الكونسيلر بأصفر الاماكن حتى حول الانف وتحت العين.

     السعر: 7 دولار

مشتريات أمازون الأخيرة:

قبل ما أدخل بالمشتريات الجديدة خل أعطيكم نبذة صغيرة عن مشترياتي من أمازون، يمكن تلاحظون أغلب المشتريات اشيا صغيرة وبسيطة ووايد منها فيلها بدائل السوق المحلي، ليش أنا اشتريها أون لاين؟ 

أولاً، عندي الشوبنغ أون لاين أسهل لأن أقدر بمكان واحد وبوقت واحد أعرف المنتجات واقارن بينها وأشوف اقتراحات مكملة حتى أشياء ماتكون خاطرة على بالي، غير لما بوح السوق لازم أطق مشوار وصح إن الأغراض بسيطة بس أغلبها تحتاج تنقل من مكان لمكان وأحياناً اتعنى وتكون مخلصة! فعندي أنا أسهل أطلبها أون لاين وأريح بالي

ثانياً، مثل ماقلت فوق أنا أستخدم شركة شحن، كل هالأشياء الصغيرة لو بطلبها بروحها بدفع على كل قطعة (لو طالبة بروحها) حوالي  دنانير من أرامكس شوب & شيب، طبعاً ماتسوى! بس لما استخدم صندوق تجميع، أجمع الأشياء الكبيرة والصغيرة بكرتون واحد، فلما أدفع لكرتون وزنه مثلاً خمسة كيلو، تكون فيه ثياب ومكياج وشوزات وأشياء صغيرة، الأشياء الصغيرة هذا بالغرامات غالباً تكون محسوبة بالكسور اللي بين الأشياء الكبيرة اللي خذت أغلب الوزن، ولو بوزع مبلغ الشحن على العدد الكلي للأغراض بيطلع رمزي وجداً مناسب، أما للي بيطلبون القطع على أرامكس شوب & شيب ما أنصحكم أبداً أبداً بتطلع عليكم أغلى من بيع السوق حتى مع حسبة المشاوير والوقت. 

ثالثاً، أنا مشتركة بأمازون برايم (99 سنوياً أو 11 شهرياً) قلت بجربه أول شي شهرياً إذا حسيته يسوى بحوله سنوي، ولحد الآن جداً مرتاحة له... الأغراض اللي تنشحن من أمازون توصل صندوق خلال يومين عمل بشحن مجاني بدون ما احتاج أطلب بمبلغ محدد عشان أستفيد من الشحن المجاني بشرط تكون الأشياء ضمن الأمازون برايم، يكون تحتها علامة زرقا برايم، لو طلبت شي ب5 دولار مثلاً وهو برامي، يوصل صندوقي مجاناُ خلال يومين، وأحياناً في عروض تكون حصرية لعضويات البرايم ينفتح المجال للطلب قبل ثلاثين دقيقة، مثل صفقة شاحن آنكر اللي استفدت منها بالبلاك فرايدي، ومع العضوية إشتراك مجاني في برايم فيديو، برايم ميوزك وبرايم، وبرايم الكتب الإلكترونية

هالخدمات أغلبها متوفرة بس بأمريكا ولكن تشتغل عندنا ببرامج في بي إن، أنا أكثر شي استخدمه الشحن المجاني والعروض وأحس إني محللة قيمة الاشتراك فيهم بس قريب بمخمخ الباقي وبتكلم عنهم بوقت منفصل. 

على فكرة، للاشتراك أول مرة يعطونكم تجربة مجانية لمدة 30 يوم وبعد ماتخلص ال30 يوم يسحبون منكم قيمة، ولو حابين بس تجربونها لمدة 30 يوم وبعدها ماتشتركون عادي تكنسلونها قبل ماتخلص، وبعد تقدرون تكنسلونه بعد ماينحسب المبلغ ويرجعونه لكم سواء كامل او جزئي، مثلاث لو كنسلتوها بعد 10 أيام بعد ماخلصت ال30 يوم المجانية، بيقتطعون مبلغ ال10 أيام ويرجعون لكم الباقي، ويصير تشغلون تنبيه قبل التجديد بـ 3 أيام يوصلكم ايميل يخبرونكم انه بعد 3 أيام بيقتطع المبلغ لو حابين تكنسلون. 

والله إنه أمازون ذربين!

هذا لنك  الاشتراك بالبرايم، إذا عندكم صندوق تجميع ووايد تتعاملون مع أمازون أنصح فيه بشدة:

وإذا تعرفون أحد مدمن شوبنق من أمازون وعنده خدمة تجميع، تقدرون تهدونه إشتراك أمازون برايم:

الحين ننتقل للمشتريات:

اسم المنتج: كيبل لايتنغ من آنكر طول 90سم

الاستخدام: لشحن الآيفون، الآيباد

التشغيل: 

السعر:  حوالي 8 دولار

كيبل لايتنغ لشحن الآيفون من آنكر، عندي عقدة كيبلات! من صار  كيبل الآيفون لايتنغ وهو يخترب بسرعة فظييعة سوا كان أصلي ولا تقليد أي كلام، هالمرة طلبت لي من آنكر لأن كيبلاتهم معتمدة من آبل ومعروفة بالجودة + سعرهم مناسب.

اسم المنتج: بكرة خيط - حبل طولها حوالي 10 أمتار

الاستخدام: الاستخدامات مختلفة، للتزيين، للتغليف، للربط، صايرة هالفترة أحب سوالف التنظيم والاشياء اليدوية

التشغيل: يدوي

السعر:  حوالي 5 دولار

اسم المنتج: عدد 12 من أمواس الوجه والحواجب

الاستخدام: لحلاقة شعر الوجه لقبل الليزر وتنظيف الحواجب

التشغيل: يدوي

 السعر:  حوالي 8 دولار للـ 12 موس

طلبتهم من أمازون مع إنهم يتواجدون بالسوق المحلي (الصيدليات وديسو) ولكن في الفترة الأخيرة صاروا صعب يتحصلون فأخذت لي وللزمن! الموس حاد بس ماعجبني إنه مشرشب مش سيدة + الشفرة شوي طويلة فيحتاج حذر خصوصاً عند الحواجب، بس مايجرح

اسم المنتج: عدد 5 كيبلات لايتنغ

الاستخدام: لشحن الآيفون والآيباد والآبل تيفي

التشغيل: يدوي

السعر:  حوالي 9 دولار للخمس كيبلات 

أوكي هذول شوي انصدمت فيهم :/ كنت أدور كيبلات Mfi-Certified (يعني معتمد من آبل) س بحيث يكون باكج فيه كذا حبة وبسعر معقل، لأني احتاج شاحن للسيارة وشاحن للمكتب  وغير البيت، والشاحن كل مانتقل من مكان لمكان يخترب زيادة.. من كثر ماقعدت أسوي سيرج بين الانواع المختلفة مانتبهت ان اللي طلبته مو من المعتمد من آبل! بس سعرهم رخيييص ههههه، مادري بصراحة عن جودتهم بس لحد الآن استخدم واحد واللي عدبني انه يشحن سريع جداً، فبيمشي الحال. 

اسم المنتج: عدد 2 علب حافظة 

الاستخدام: للصلصة ودريسنغ السلطات

التشغيل: يدوي

السعر:  أنا شريت إثين بحوالي 5 دولار بس الحين استغربت انه طالع 11 دولار!

شفت هالعلبة عند صديقتي فاطمة من  Skin Overdose وعجبتني الفكرة خصوصاً إني أوقات وايد آكل بالدوام واتواهق لما اكون مسوية سلطة! هاالعلبة تنحط فيها الصلصة وتحفظها من التسريب، عملية وايد وحجمها صغنون بس تشيل كمية كفاية.

 اسم المنتج: أحزمة مقاومة مطاطية للتمارين الرياضية

 الاستخدام: كعنصر مساعد في التمارين الرياضية، الطقم فيه 5 قطع بقوات مختلفة ومعاه بروشور صغير فيه أمثلة عن التمارين وبعد يرسلون معاه كتاب إلكتروني بي دي إف، هالأحزمة ممتازة لتقوية العضلات بالتمارين المختلفة والحلو إنها تستخدم بالبيت ومع أغلب أنواع التمارين حتى التمارني البسيطة وتمارين الاحماء والستريتشنغ

التشغيل: يدوي

السعر:  حوالي 11 دولار

اسم المنتج: كتاب Year of Cozy

الاستخدام: كتاب فيه أفكار منزلية للتطبيق، أعمال يدوية، أنشطة، طبخات، وصفات.. 

التشغيل: يدوي

السعر:  حوالي 14 دولار

شفته أول مرة شوب بوب وكان سعره 25 دولار وشحن مجاني فعجبني وحطيته ببالي شفته أول مرة شوب بوب وكان سعره 25 دولار وشحن مجاني فعجبني وحطيته ببالي بس لما جيت أطلبه لقيته سولد آوت! دورته  بأمازون لقيته بتخفيض وسعره 14$ واستانست بس ماكان شحن مجاني وهو كتاب كبير وغلافه سميك جنه مجلد فقلت بدفع ضعف سعره شحن! فانتظرت هالمرة اخوي كان طالب ثياب فطلبته بالصندوق وتجمع، نفس ماقلت فوق استفيد من فروقات الوزن بالتجميع.. خذته حسيت فكرته حلو يجمع افكار واشيا جديدة + شكله جميل تغذية بصرية على قولة هيا Hayas Blog ويصلح للتصوير بعد. 

اسم المنتج: كيندل بيبر وايت اللون الأبيض

الاستخدام: قارئ للكتب الإلكترونية

التشغيل: ينشحن بمايكرو يو إس بي والشحن يبقى لعدة أسابيع، الكتب يشغل الـ PDF ويشغل الكتب  الإلكترونية صيغة كتب أمازون وصيغة Mobi

السعر:  120 دولار وبالبلاك فرايدي كل سنة يتخفض ويصير 99 دولار 

الكيندل بيبر وايت مخصص بس للقراءة وفيه متصفح انترنت بدائي جداً بس يصلح للبحث عن الكتب لأن في مواقع تتحصل فيها كتب تتنزل مجاني، في منه أربع أنواع من الأرخص للأغلى: كيندل، كيندل بيبر وايت، كيندل فوياغ، كيندل أويسس

أنا اخترت البيبر وايت لأن حجمه مناسب جداً، 6 إنش وفيه إضاءة ذاتية فأقدر أقرأ فيه بأي وقت حتى لو ظلام، الموديلين الأغلى فوياغ وأويسيس حسيتهم أغلى بس بدون مميزات فعلية! كل الموديلات حجم الشاشة 6 إنش ضد الانعكاس، وكل الموديلات الثلاثة وضوح الشاشة 300 بكسل وفيهم اضاءة ذاتية ماعدا كيندل العادي وضوح الشاشة 167 بكسل وبدون اضاءة يعني بالظلام ماينفع للقراءة، برايي يصلح لاستخدام الاطفال أو الناس الي عارفين 100% انهم يقرون بس بالنهار. 

البيبر وايت اللي عندي ينشبك عالواي فاي بس لتنزيل الكتب أما القراءة تصير أوف لاين، ويصير ينطلب بإنترنت ثري جي مجاني عشان يستخدم أي وقت للتنزيل بدون انترنت، يزيد سعره 70 دولار، مادري إذا يشتغل بالخليج لأني طلبته بدون ماحسيت الزيادة بالسعر تسوى لأن الواي فاي متوفر بكل مكان أنزل الكتب اللي ابيها  وبعدها أقراها بأي وقت. 

أنا مشتركة يكيندل أنلمتد (12 دولار شهرياً) هالخدمة بمثابة استعارة للكتب من مكتبة امازون، أقدر أستعير حتى 10 كتب بالمرة الوحدة، وكل ماخلصت كتاب أقدر أي وقت أرجعه واستعير غيره بس ما أقدر أستعير أكثر من 10 كتب بالمرة الوحدة، 

لنك الإشتراك بكيندل أنلمتد، نفس أمازون برايم يعطون 30 يوم مجاناً وممكن إلغاء الإشتراك بأي وقت: 

أما بالنسبة للشراء فهو غير محدود واغلب الكتب بأمازون لما تكون متوفرة بنسخة كيندل تكون قيمتها أقل بوايد من النسخ الورقية، ويصير بعد تتنزل كتب PDF بتوصيله بالكمبيوتر أو تنرسل كاتاجمنت للايميل ومثل ماقلت في بعض المواقع تنفتح من المتصفح بالكيندل وفيها كتب للتنزيل، الجهاز ممكن يشيل أكثر من 2000 كتاب 

بحاول قريب أكتب لكم مراجعة شاملة عنه بس هذا مختصر مبدئي، وآخر ملاحظة اشتروا معاه كفر لأن المادة اللي مصنوع منها بلاستيك وسرعة ينشمخ، حملته معاه  بالسفر بشنطة يدي وانشمخت الاطراف وللحين معورة قلبي ومتضااايقة لأن ماطلبت معاه كفر أكثر شي عندي جهاز ينشمخ وانا ناوية احتفظ فيه مدة طويلة ما ابدله! إن شاء الله الكفر يغطي المنطقة المصابة عشان ما اتنرقز كل  ماشفت الشموخات هذي

والحين مشترياتي من امازون غير الأمريكي، 

قبل ذكرت في سناب إني لو أبي أشتري جهاز إلكتروني أدوره بامازون الدول الأوروبية، لأن الفيش يكون مثل الخليج + أغلبهم يشحنون شحن مباشر. 

هالأجهزة طلبتها باوقات مختلفة واللي لاحظته الحين إن أسعار وايد منها تغيرت - للأعلى للأسف! مادري السوق بشكل عام ارتفعت أسعاره ولا أنا كان حظي حلو وطالبة بفترات عروض؟، المعلومات اللي تحت بس لمشاركتكم  اللنكات، ماراح أحظ ريفيوز عن الأجهزة إلا نبذة بسيطة لأن أغلبها تحتاج شرح طووويل وهذا الموضوع مخصص للمشتريات بس. 

لما أطلب من أمازونات (!) أوروبا غير بريطانيا، الموقع يكون بلغة البلد مو الانجليزية، بس أنا أسوي سيرج المنتج بالانجليزي واحصله، أمازون فيهم ميزة حلوة إنه الحساب يكون مشترك بكل الدول فأساساً ادخل بايميلي وعنواني يكون موجود، ولأن تصميم امازون نفسه باختلاف الدول فاعتمد على حفظي للأماكن، واضغط نكست وادد لأن عارفة شكل الازرار هههه واستخدم بطاقتي اللي أساساً مسجلين،  سمعت إنه أمازون اليابان هو الوحيد اللي يطلب إشتراك بحساب جديد، بس مادري لأن للحين ماطلبت شي من عندهم. 

أنا بحط لكم المنتجات بلنكاتها اللي شريتها منها، بس انتوا سجلوا عنوان دولتكم المحلي ممن أمازون أمريكا أو بريطانيا، وبعدها اختاروا المنتج بأمازون الدول كلها وشوفوا السعر النهائي مع الشحن المباشر واستخدموا الأوفر لكم، لأنه يفرق واحياناً بعض الدول تكون مسوية عرض على منتج وبأمازون الدولة الثانية يكون سعره أغلى. 

أمازون بريطانيا: 

لنك المنتج

اسم المنتج: بلك/فيش جدار بخمس وصلات يو إس بي من آنكر

 الاستخدام: لشحن كل الأجهزة اللي تنشحن باليو إس بي، والمنفذين الي باللون الأزرق للشحن السريع خصوصاً للشاحن المتنقل

التشغيل: بالكهرباء، أخذته من بريطانيا علشان أستخدمه مباشرة بدون محول

  السعر:  حووالي 30 باوند

صورته بس من السايت لأني شحنته على عنوان رفيجتي وللحين ماخذته من عندها. 

أمازون إيطاليا: 

لنك المنتج

اسم المنتج: ساعة بولار الرياضية A360 اللون أبيض مقاس السوار سمول

الاستخدام: لحساب الحركة، الخطوات، السعرات الحرارية، تسجيل التمارين الرياضية

التشغيل: تتشحن بالمايكرو يو إس بي

السعر:  لما خذتها كان سعرها حوالي مية يورو بعد حذف التاكس وقبل اضافة الشحن لما اخترت عنواني البحريني، الحين طلع حوالي121  يورو بعد حذف التاكس وقبل الشحن

لنك المنتج

اسم المنتج: آله الموكا الكهربائية للإسبريسو سعة كوبين

الاستخدام: لصناعة اللإسبريسو، مثل آلة الموكا التقليدية بس هذا كهربائية ماتحتاج فرن. 

التشغيل: بالكهرباء

السعر:  كان السعر حوالي 30 يورو بعد حذف التاكس وقبل الشحن، وانشحنت لي عادي للبحرين بس اما الحين لما جربت انطلب عنوان إيطالي.

أمازون إسبانيا: 

لنك المنتج

اسم المنتج: فيلبس ليزر لوميا المنزلي موديل 2009

الاستخدام: لنزع الشعر بالليزر الضوئي من جميع الجميع، الجهاز لاسلكي ومعاه 3 رؤوس

التشغيل: الشحن بالكهربا والاستخدام لاسلكي، فيه الـ 5 درجات المعتادة من فيلبس.

السعر:  كان السعر حوالي 326 يورو بعد حذف التاكس ومع الشحن المجموع اللي دفعته كان 375 يورو أما الحين سعره إرتفع لـ 415 يورو بدون الشحن ولـ 464 يورو مع الشحن! 

والحين منتجاتي من نوردستروم المكياجية، بس اثنين شرايكم فيني؟

لنك المنتج

اسم المنتج: باليت ماك برغندي تايمز ناين

الاستخدام: لآي شادو باليت فيه 9 ألوان بحجم صغير

التشغيل: 

السعر:  32 دولار بدون الشحن

هالنوع من باليتات ماك بحجم الباليت الرباعي وباليت الكونسيلر الكريمي بس فيهم تسع شادوات حجم صغير ومتنوعين بين المطفي والشيمر اخترت البرغندي لأن ألوانه تجنن. 

لنك المنتج

اسم المنتج: روج ماك سيلينا

الاستخدام: لمتحفي طبعاً 

التشغيل: 

السعر:  18 دولار بدون الشحن

الروج نازل بكولكشن لمتد إدشن للمغنية اللاتينية المقتولة سيلينا كونتالا، لمتد ادشن بس للحين موجود نازل للمرة الثانية بسبب الاقبال عليه

آخر تحديث: 29 يناير 2017 

WWW.NORDSTROM.COM

ببدأ بمشترياتي الأخيرة من موقع نوردستروم - موقع نوردستروم هو ديبارتمنت ستور فيه كل شي ن المكياج للملابس للاكسوارات للديكور للأثاث، وكلها اصلية وموثوقة - أكثر شي استخدمه للمكياج والاكواب والساعات والاكسسوارت والشنطـ مشترياتي الاخيرة منه كلها مكياجية وكانت بفترة سيل.. فراح احط لكم لنكاتهم بس مادري بتكون موجودة لوقتها أو لا!