| February'14 Favourites | مفضلات شهر فبراير 2014 |

صباح / مساء الخير من البحرين

بعد غيبة عن البلوق والبوستات.. اليوم راجعة لكم ببوست مفضلاتي لشهر فبراير

وهي الأشياء اللي حبيتها وشفت روحي كررت أستخدامها وايد بهالشهر،،

راح أول شي أكتب أسامي الأشياء وبعدين الصور وبتكلم عن كل شي بروحه

-         شنطة مايكل كورس "سيلما"

-         عطر لانكوم لافي ايست بيل

-         واقي شمس كيو في

-         غسول الوجه آفين

-         كريم اليد وكريم القدمن من ايوكرن

-      ساعة مايكل كورس

-      اكسسوار ذهبي

-      تراجي جيفنشي

-      ماسكرا حواجي

-      شادو حواجب بودي شوب

-         فاونديشن إيسنز

-         بودرة نيكس

-         برونزر ذ بالم

-         بلاشر نارس

-         برونز/بلاشر ذ بالم بيتي لو

-         روج إيسنز البنفسجي

-         مرطب إي أو إس البطيخ الأحمر

-         رموش هدى بيوتي رقم 1 جيزيل

-         ماسكرا ريفلون

-         كحل كريمي لوريال

-         باليت نيكد بيسكس

-         سبري أربان ديكاي لتثبيت المكياج

-         محدد نيكس

صورة جماعية

أول شي سنطة مايكل كورس سيلما.. حبيت هالشنطة من أول ماشفت صورها وشفتها بمايكل الستي سنتر.. بس تحيرت بينها وبين لون ثاني عشان اللون ماكنت محصلة هاللون.. بعدين حصلته بموقع بلومنغ ديلز

عندهم شحن مباشر للبحرين رخيييص.. وكان عندهم تخفيض 10% لأول طلب من الموقع، طلع علي سعرها تقريباً 155 دينار بحريني ووصلتني بأقل من أسبوعين

الشنطة روووعة.. حجمها مناسب ونوعية الجلد هاي كوالتي.. وواسعة تشيل أشياء وايد، بس تحتاج شوي عناية لأنها جلد طبيعي فبسهولة تتبقع من السوائل مثل العطورات والمكياج وكريمات اليد!

كنت أدور هاللون دوارة.. البيج الغامج لأنه يناسب كل شي ويركب على كل شي.. أغلب الناس يفضلون الشنط السودا عشان تكون عملية بس انا بالعكس أحس الألوان الغامجة تخش موديل الشنطة أحياناً.

هالشنطة موجودة على طول بمايكل كورس وعلى حسب الموسم تنزل منها ألوان جديدة.. حالياً لأنه قريب موسم الربيع والصيف فنازل منها ألوان أخضر وأزرق وفوشي وأسود بأبيض وايد روعة.

عطر لانكوم شفته قبل فترة كانوا يعلنون عنه بالستي سنتر وعجبني.. 

 طلبته أونلاين من موقع نوردستروم بعد ماتحيرت بينه وبين لانكوم تريسر روز وآخر شي استقريت عليه، خذته بموسم الكرسمس بست الهدايا.. العطر والبودي لوشن والعطر الصغير بسعر $80 تقريباً 32 دينار بحريني + دفعت عليه شحن مادري كم بالضبط لان كان مع أشياء وايد.

مرطب وواقي من الشمس طبي من شركة كيو في... قوته حمايته من الشمس 30 ويناسب كل البشرات بمافيها الحساسة، وصفته لي دكتور الجلدية الجميلة من عيادة ديرماكير في مستشفى النور التخصصي، كنت أستخدم قبله سيتافيل بقوة 50 وكان قريب بيخلص وغيرت لهذا وفعلا وايد حلووو بسرعة تمتصه البشرة وأبداً مو ثقيل.. وترطيبه حلو مايدهن. سعره إذا ماخانتني الذاكرة 6 دنانير وشي وأنا شريته من العيادة بس يتوفر في الصيدليات مثل بوتس

غسول سائل للوجه من آفين.. من زمان سامعة عنه وخاطري أجربه وشريته أخيرا موجود بالصيدليات وانا شريته من بوتس سعره حوالي 9 دنانير.. خالي من الزيوت والعطور ومناسب لجميع انواع لبشرات وااايد حلووو وينظف بضمير ولا يجفف البشرة ولا يحسسها

كريمات اليد والقدم من ايوكرين هالماركة متوفرة في بوتس والصديدليات بس انا طلبتهم اونلاين.. كريمات طبية لترطيب الجلد ممتااازين واحلى شي فيهم ان البشرة تمتصهم بسرعة ومايلصقون ولا يوصخون،، اثنينهم بنفس المستوى ترطيبهم عجيب على الجلد الجاف

مرطب إي أو أس بطعم البطيخ الحلوو، هالمرطبات الحلوة انا عندي منهم كل الالوان عشان شكلهم الكيووت! وكل فترة اركز على استخدام واحد وهالمرة كان دور هذا.. ترطيبهم حلووو بس مايعتبر ترطيب عميق ولا علاجي! ولكنه يصلح تحت الارواج لانه مايلصق ولا هو سائل وايد

 سبري تثبيت المكياج من اربان ديكاي بعد=.. وصلني ميني مع طلبية نيكد 3 من عندهم.. لازالة لمعان الوجه واايد حلوو وهو اصلا من اسكندنافيا بس بتعبئة اربان ديكاي واسكندنافيا معروفين بجودة مثبتاتهم.. حبتيه انه صغيرون وينشال بالشنطة واقدر ارد اعبيه بسهولة لين خلص من سكندنافيا العود اللي عندي

والحين دور المكياج

قبل شهر وشي تقريباً يابوا عندنا ماركة إسنز أخيراً في صيدليات رويان.. هالماركة من الماركات الامريكية الرخييييصة بس جودتها عالية! أنا صراحة خميت منها خم فرصة لا تقاوم انه كل شي متوفر

أول شي من الماركة دخل بمفضلات هالشهر هو هالفاونديشن السائل من عندهم واللي عندي الدرجة رقم 3.. روووعة خفيف على البشرة وبنفس الوقت تغطيته ممتازة وتزيد مع الطبقات، وصج يثبت مايروح بسهولة ولا يدهن وايد.. وانا اوزعه باسفنجة ريل تكنيكس الجميلة

بودرة نيكس هذي خذيتها بالصدفة كانوا مسوين سيل بسنتر بوينت وحصلتها بدينار ونص بس! وشفت الدرجة مناسبة مايلة للاصفر فقلت التجربة ماتضر.. الدرجة رقم 6 واسمها ميديم بيج.. حبييتها تغطيتها حلوة متوسطة وتتوزع بالفرشاة تعطي مظهر طبيعي تنفع للدوام والطلعات السريعة، ماتتكتل على الويه.. واضح كثر استخدامي لها اني حكيتها ووصلت للقاع لووول

بروزنزر ذ بالم.. هالبرونزر معلقة عليه أكثر من شهرين! جميييل استخدمه للكونتور بفرشاة دقيقة وبعدين استخدمه بفرشاة البودرة كلمسة نهائية، لونه حلوو مب مايل للبرتقالي ولا للاحمر.. وحتى يصلح كآي شادو للدمج في الكسرة او لتحت العين، ماشيله من شنطة مكياجي دايماً معاي

برونزر وبلاشر بيتي لو من ذ بالم.. انا من يومي ماحب ابداً البرونزرات اللي فيهم لمعة، بس هذا حبيته كبلاشر فوق الكونتور يعطي مظهر حلووو.. وممكن لو استعمل بخفة واندمج عدل بفرشاة الاضاءط يعطي اضاءة برونز حلوة، هذا توام ماري لو الصدفية الجميلة وهالمرة نزلوا سيندي لو بيتشي روزي.. بشتريه إن شاء الله واتوقع بمستوي ماري وبيتي

بلاشر نارس جينا.. الحب الحب هذا من يابته لي رفيجتي من تايلند وانا مايمر اسبوع بدون ماستخدمه.. بس صارله فترة على طول بشنطة مكياجي.. لونه بيتش مات بدون لمعة واايد حلووو استخدمته علي وعلى كذا وحدة من ربعي يناسب كل الوان البشرات ويناسب اللوكات اليومية والثقيلة

والبلاشر الثاني سيود من سليك.. ماركة بريطانية تنباع اونلاين والتاجرات يوفروناه لونه بروزني على بنك مطفي وطبيعي وايد وايد أحبه

الشي الثاني من ماركة إيسنز الروج البنفسجي..اللون البنفسجي خصوصا في الارواج كان موضة السنة اللي طافت وكل الماركات تقريباً نزلت ارواج بنفسجية، هاللون من اسنز من شفته سحرني وفعلاً جمييل حتى ربعي من شافوه عندي شروه.. لونه بنفسجي على وردي ابداً مب فاقع ويناسب مع البرونزرات والبلاشرات اللي قلت عنهم فوق ومع الشدوات البيجية البنية.. واحسه يناسب كل البشرات

رموش هدى رقم 1 اسمهم جيزيل.. أخيراً صاروا ينباعون بسيفورا عندنا.. حبيييتهم وطبعاً يستخدمون اكثر من مرة سعرهم 7 دنانير.. وايد يبينون طبيعيين من احطهم دايما أنسأل عنهم ولا يتعبون العين ولا تحسين فيهم ثقال.. أكيد بشتريلي منهم أرقام زود لأن جد من أحلى الرموش اللي استخدمتهم

ماسكرا ريفلون طلبتها من فترة من عقب مامدحتها مي المؤيد (ذا ميكب مانول) وصج حبيتها حلووو خصوصا بعد ثالث طبقة تكثف الرموش بشكل جميل.. وماتتعب بالمسح تنمسح بسهولة بالميكب ريموفر

كحل لوريال الكريمي من نزلوه في دراقستور طلبته بعد ماكنت استخدم مايبلين وكلينيك.. حبيته سواده عجيب يخط بسرعة ومايسيح ويتم مدة طويلة وماينشف بعد، وقوامه حلوو لا هو يابس وايد ولا وايد سائي

باليت نيكد بيسكس من اربان ديكاي هالباليت الصغيرون دايماً معاي بشنطتي لان الوانه تنفع للطوارئ سواء لللآي شادو او للاضاءة او للحواجب.. للوكات السريعة وللدمج مع الوان ثانية ممتاز ماستغني عنه

لحواجبي هالشهر أكثر شي حبيته... ماسكرا الحواجب خذيتها من مدهش كاركتر ومادري جمم رقمها بس يتميز هو افتح لون.. ومثل ماتشوفون غطاها انكسر لوول فاستخدماه بفرشاة تمشيط الحواجب.. تخلي لون حواجبي فااتح.. وفوقها استخدم شدو بودي شوب اللون البني اللي فيه غامج فاستخدمه بضربات خفيفة

وأخيراً محدد نيكس اللون الموف سبقت وتكلمت عنه بانستقرامي هاللون عجيييب استخدمه تحت الالوان النود او تحت الالوان الفاقعة عشان يهديها! وايد درجته حلوووة وحتى بروحه ساعات أحطه

ومن الاكسسوارات.. أكثر شي لبسته هالشهر 3 قطع وبالصدقة كل الالوان المعدنية ذهبي وفضي وروز قولد لووول

الساعة من مايكل كورس إذا ماخاب ظني اسمها رانوي طلبتها أولناين بس موجودة هني.. حجمها عود بس مو دفشة وانيقة باللبس.. انا يدي ضعيفة فالساعة من هالديزاين تناسبني.. في منها نفس الشكل بس حجم وايد اكبر، وتتوفر بعد باللون الفضي والذهبي سعرها حوالي 120 دينار أونلاين بس أنا أخذتها بسيل حوالي 85 دينار بدون الشحن

تراجي جيفنشي اللون الفضي طلبتهم من نوردستروم وايد حلوين وناعمين مع فص كبير سوارفسكي وفصوص صغيرة.. لمعتهم حلوة والتراجي حلوين يناسبون للبس اليوم والمناسبات البسيطة، موجود منهم لون ذهبي بعد وايد حلو خذناه لرفيجتي بعيد ميلادها

وآخر قطعة.. قلادة ذهبية مطفية اخذتها من معرض الخريف من محل كويتي.. واايد حلوة على العبايات / التوبات / القمصان بشرط يكونون سادة لون واحد وبدون اي تطريز ولا شي.. لانها كبيرة ونازلة شوي فتحلي القماش السادة خصوصا اءا كان لونه أبيض / بيج / بطيخي / أسود

ووبس هذي كانت مفضلاتي لشهر فبراير

شنوو عجبكم منها؟ شنو اللي تتفقون معاي فيه؟ شاركوني

إن شاء الله بحاول ألتزم أنزل مفضلات كل شهر ببوست جذي

 لأي سؤال أو استفسار.. اسألوني بالآسك

www.ask.fm/Sanooya

أو انستقرامي

@Sanooya

سلااام :**