التوب! مفضلات سنة 2014
2014 Elite: Favourite Products of the Year!
السلام عليكم ورحمة الله وبركاته
دخلنا سنة جديدة، آتمنی تكون سنة سعيدة مليانة بالفرح والايجابية وتحقيق الاهداف والاحلام.. من خططي للسنة الجديدة آعطي وقت اكثر لمدونتي واحاول انظمها، بما اني كل فترة اكتب موضوع بس تقريباً بعشوائية، ببالي احاول مرة او مرتين بالاسبوع للتدوين، غير الريفيوز المعتادين والمشتريات، اخصص وقت للآسئلة ووقت للتجربة وغيره، عموما للحين مارتبت الافكار عدل بس ان شاء الله قريب.
موضوع اليوم هو موضوع مفضلات سنة 2014، المنتجات اللي تميت ارجع استخدمها بشكل متكرر طوول السنة، بعضهم عندي اياههم من بداية السنة وبعضهم من اوقات لاحقة.
Hello Everyone! & Happy belated New Year!
I hope it’s going to be a year full with Happiness, Joy, Success and Positivity! I’m planning to give more attention to my blog and organise it more, & blog more! I’m planning to assign 1 or 2 days a week to blog, and to have a system: other than hauls and swatches, keep space for FAQs, Experiments & others. But I’m still organising my thoughts.
For today I have My 2014 Elite Favourites to share with you all! Stuff I loved and used a lot during the year, even though some of them were purchased later on 2014.
Sorry for not translating! every time I want to translate I fell asleep! I thinks that’s because eI wrote everything in Arabic first not as usual translating every paragraph then writing the next, but I will translate it this week so check back next week! xoxo
ببتدي بمنتجات البشرة، من التنظيف للترطيب، التقشير، الوقاية، العلاج، الماسكات..
هذي مجموعة منتجاتي المفضلة..
للتنظيف،،
سائل بايوديرما للتنظيف وازالة المكياج اسميه الماي السحري لان قوامه مثل الماي ويشيل المكياج بسهولة وماتتحس منه لا البشرة ولا العين. ممتاز ولازم كل بنت يكون عندها منه، يمسح المكياج بس ماعندي عن غسل الوجه.
لمسح مكياج العين الثقيل والواتر بروف واللونق لاستنق، مزيل بالمز اوي من ذا بالم.. ينظف العين ويمسح كل المكياج حتى الثقيل مثل كحل انجلوت، قوامه لزج مثل الفازلين وبتدليك كمية بسيطة على العين بشكل دائري عشان يتفكك المكياج، وبعدين ينمسح بقطنة.
لغسل الوجه بعمق،، غسولي المفضل افين السائل الاخضر، جربت وايد بس ماحبيت شي كثر هذا احسه ينظف البشرة وينقيها تصير نااعمة بعد التنظيف، وطبعا استخدمه مع فرشتي ميا تو من كليراسونك فرشة تنظيف وجه رهييبة تنظف من قلب واستخدم معاها راس تنقية المسام، سبق وكتبت عنها بوست كامل:
بعد التنظيف دور المقشر والماسك، المقشر اللي حبيته من اوريجينز بيوديرم فريكشن.. مقشر قوي نوعاً ما يستخدم على البشرة النظيفة وهي جافة، مساج بحركات دائرية لين تختفي حبيبات المنتج على البشرة بعدين ينغسل بماي ويتنشف، المقشر قوي نوعاً ما خصوصا عالبشرة الحساسة.. بس دايماً بعد ما استخدمه احس بشرتي لييينة وسطحها مستوي.. بس يحتاج مرطب بعده.
ماسكي المفضل من كيهل لتنقية البشرة والمسامات يتوزع على بشرة نظيفة مافي مانع لو كانت شوي رطبة وينترك لين يجف وينغسل.. صج ينقي البشرة ودايماً احسها تكون مشدودة بعده.
بعد التنظيف والتقشير والماسك دور الترطيب والعلاج.. للعلاج استخدم اكريتن عشان الريتن اي لفيتامين الف لتجديد البشرة.. طبعاً هالكريم طبي ولازم استخدامه حسب التعليمات.. ينحط على بشرة نظيفة وجافة بعد غسلها بنص ساعة، وينحط كمية صغيييرة كبر حبة الحمص يتوزع باطراف الاصابع على البشرة مع تجنب حول الشفايف والانف والعين، ببداية الايام ينحط يوم وترك ولمدة قصيرة لين تتعود عليه البشرة. لازم ينحط بالليل والصبح لازم نحط واقي شمس قوته 30 على الاقل. الكريم طبي ينباع بالصيدليات ولازم تتبعون تعليمات اطباء الجلدية بدقة وتحملوا تخلطونه مع اي مستحضر دوائي ثاني!
وهالكريم مع الوقت يجدد البشرة في البداية تتقشر وتجف فالترطيب بعده مهم، ضروووري استخدام كريم مرطب طبي مضمون وخالي من العطور.. انا استخدم كريم فيسيوجيل الابيض اللي بالصورة بعد من الصيدلية.. اخذ كمية بسيطة منه واوزعه حتى قبل المكياج بس احطه قبل نص ساعة.
المنتج العلاجي الثاني كريم سكينورين للحبوب واثارها بعد هالكريم طبي احطه فقط على الحبوب واثارها.. يحرق ويلسع بس مفيد.
لترطيب تحت العين استخدم كريم الافوكادو من كيهلز بعد.. مرطب يستخدم بالليل والنهار اخذ نقطة واوزعها من برة داخل حول العين وعلى الجفن، راائع بس مطب ويطري المنطقة مو علاجي ولا ياثر بالهالات.
اخر شي مرطب الشفايف حبيت اثنين، المدور الازرق من بلستكس استخدمه بالليل لانه ثقيل ويرطب الشفايف عدل، الثاني المعصار من جاك بلاك استخدمه للنهار لانه طبي وفيه حماية 20 او 25 من الشمس.
استخدم بعد مركز كيهلز الليلي بالزيوت الطبيعية، نسيت اصوره بالصورة الجماعية احطه بعد الاكريتين بساعتين تقريباً.. خمس قطرات براحة اليد امسحهم باليدين وبعدين ادلكه على بشرتي بحركات دائرية.. اقعد الصبح بشرتي طرية وفرش بدون ماتكون مدهنة.
خلصنا من العناية بالوجه انتقل للعناية باليدين، مادري اذا قلت لكم من قبل بس انا مهووسة بمنتجات اليدين خصوصا الترطيب والمقشرات! من السياقة والشمس دايماً احس يديني اكثر حزء يتضرر.. احيانا ما افتح شنطتي الا داخلها 3 كريمات يد :\
لغسل اليدين احب استخدم صابون باث اند بودي ووركس السائل ودايما اشتريه بالكميات من السيل!
في نوعين.. نوع جل بالحبيبات وفيه تقشير خفيييف والثاني سائل يتحول لرغوة.. احب الاثنين وارتاح لهم، لترطيب اليدين المكثف احب كريم كيوفي الوردي.. وكريم هاند سالف الابيض من كيهلز، اثنينهم ثقال نوعاً ما وقوامهم كثيف بس يرطبون عدل بعد ماتمتصهم البشرة، وحبيت بعد كريم توكا وكريم ووركنغ هاندز اثنينهم وصلوني باحجام ميني.. قوامهم خفيف بس يرطبون عدل وريحتهم حلوة والازرق من سي ان دي مخصص لمقدمة الاصابع وحول الاظافر يطري الجلد الجاف.
بعد اليدين، دور الاظافر.. انا وااايد اصبغ اظافري، اظافري بطبيعتهم الحمدلله وما شاء الله قواي ويطولون بسرعة، يدي اليسار ما اواجه فيها مشكلة دايما الاظافر مرتبين، اما اليمين لاني اكتب باليمين واستخدمها بوايد اشياء، بين فترة والثانية يتكسرون اظافري اليمين!
نبتدي بالمقويات، افضل مقوي جربته السنة من ماركة اورلي.. الوردي طريقته ينحط بداية الاسبوع وكل يوم تنضاف طبقة لنهاية الاسبوع ينمسح وتحطي من جدي وتزيدين طبقة كل اسبوع.. وبعدين تنعطى الاظافر راحة اسبوع وتكررين الاستخدام مرة ثانية اسبوعين، استخدمته فترة كنت مركبة اكريلك بصالون ركبوهم لي غلط .. صجاجرمت بحق ظفري ضعفوا بشكل رهييب… هذا المقوي فعلاً فادهم من ناحية النمو والتغذية.
منتج ثاني للتقوية يستخدم بكل حذر لانه فيه فورمالهيد مادة تستخدم بالتحنيط! يخوف صح؟ هذا يعتبر دوا وغرضه الاساسي يستخدم للاظافر الضعيفة اللي تتقشر.. يخلي الطبقات تنلحم ببعضها..
استخدامه لازم يكون حذر ودقيييق: اول اسبوع يستخدم مرتين بالاسبوع، يتوزع بالفرشة علي الجزء الخارجي من الظفر بدون مايلامس الجلد، وبعد مايتوزع على كل الاظافر تتوجه لتحت لمدة ثلاثين ثانية لين تمتصه اطراف الاظافر، بعدين يستخدم مرة بالاسبوع لمدة اسبوعين وتوقفين بعدين تستخدمينه حسب الحاجة مرة بالاسبوع.
انا افضل قبل استخدامه احط منتج للكيوتكل حول الاظافر على الجلد عشان يشكل عازل..
احسن منتجات كيوتكل احبهم.. من سي ان دي زيت السولار اويل رهيييب يرطب ويلين الاطراف الجلدية، الثاني زبدة الاظافر بالليمون من بيرت بيز.. كثيفة تشبه الفازلين بس تتدلك على الجلد تطريه مع الوقت.
هذا بالنسبة للتقوية والترطيب بعد الصبغ، اما قبل الصبغ لااازم استخدم بيس كوت خصوصا مع الالوان القوية.. اكثر اثنين احبهم من ايري ريدج فيلر هذا يملي فراغات الاظافر يخلي السطح مستوي،، يصلح خصوصا للالوان الفاتحة والصعبة مثل الابيض..
والثاني بيس كوت نيل فاونديشن من بتر لندن يعطي تقريباً نفس المفعول ولاحظت انه يشكل طبقة عازلة.. بعد يومين او ثلاثة يبتدي ينشال بروحه بدون اسيتون!
واخيراً بعد الصبغ.. توب كوت انستا دراي من سالي هانسن الاحمر، كنت باخذ القطرات بس ماحصلتهم واخذت هذا.. شفاف ينحط فوق الصبغ.. ينشفه ويخليه لماع عجيييب، بعد مايجف حتى لما اضرب ظفري بشي ماينحفر ولا ينقشر. بس عيبه بعد فترة يبتدي يتكتل ويصير كثيييف.
ومازلنا مع الاظافر.. وهذي احلى الوان حبيتها ب 2014.. من اليمين:
من ايزي اسمه فيجي.. لونه بيبي بينك حليبي يهبببببل تطلع اليد وايد ناعمة فيه
الباين سنو من او بي اي.. احلى ابيض جربته انغرم بيدي لما احطه ودايماً انسال عنه
بيبي جين من مارك جيكوبز من احلى درجات النود اللي جربتها بيجي يهبل ناعم وانيق
من اسنز اسمه بيربل شوقر.. بنفسجي واايد حلوو وحيوي اغمج شوي من الباستيل لمعته حلووة جنه جل
واخر شي فور اودري من جاينا غليز.. درجته تيفاني بلو عجيب احلى درجة تيفاني جربتها وبعد على طول انسال عنه لما احطه.
اما بالنسبة للشعر.. طبعاً انا عقدتي الشعر خخخخ بس بعد احاول دايما ادور مستحضرات حلوة..
لسنة 2014 حبيت شامبو افالون اورقانكس من موقع اي هيرب وايد حلو وكل ما اقول لاحد عنه يعجبه، وعجبني سبري صغير لحيوية الشعر وريحته حلوة بعد، وصلني مع واحد من البوكسات الشهرية بس مادري من
،وللحماية من حرارة السشوار اللي ماعرف له ههههه.. احب حامي الحرارة من تريسمي والثاني من ماركة جيوفاني، ممتازين ومن نفس الماركة بعد حبيت السيروم والبلسم اللي ماينغسل
والحين دور الجمال بعد ماخلصت منتجات العناية المفضلة، قبل ما ادش بالمكياج هذي عطوري المفضلة بسنة 2014،
عطر مارك جيكوبز ديزي فريش.. استخدمته اغلب السنة لانه خفيف وفريش صيفي اكثر بس طبعاً عارفين الخليج اغلب السنة صيف! ريحته منعشة على فلاور بس مو الروز ولا الياسمين اللي يصدعون! دايماً كولكشن ديزي من مارك جيكوبز روايحهم مميزة
والحب شانيل نمبر فايف طبعاً معروف، في البداية انزعجت منه قوي اول ما ارشه يدش بخشمي ريحته قوية جنه صابون! بس اكتشفت انه لما ارشه على ثيابي قبل ما البسهم بفترة كافية واشمه بعد مايستقر.. اممممم ادمان فعلاً مميز ورهيب.. مو لاستخدام يومي، والعطر الثالث كفالي تايقر عود من روبرتو كفالي.. فخم احبه للعباة وللشتا،، عجيب عجيب.
والحين وصلنا للمكياج الحب والادماان
البداية بمنتجات الوجه
آحلى برايمر حبيته كان مينرال فيل من اورغلاس.. لونه ابيض بس ينحط عالبشرة يصير شفاف وبس تمتصه البشرة يترك سطحها مخملي ونااعم جاهز للمكياج
احسن فاونديشن لهالسنة كانوا اثنين، بيرفكشن لوميير من شانيل درجتي فيه رقم 30 ومن دولتشي & قابانا المات درجتي فيه 120 ناتجرال بيج.. بتلاحظون في السواتشز تحت على يدي انه دولتشي مايل للصفار اكثر.. على وجهي اثنينهم متناسبين واحبهم، يدي افتح من ويهي
كونسيلري المفضل طبعا ماك برو لونغ وير الدرجة ان سي 35.. اغمج مني مايل للمشمشي بس ممتااز للهالات اخذ نص بمب بس واوزعه بانامل يدي بحركات دائرية بعدين ادمجه بالطبطبة بفرشة او بيوتي بلندر.
الهايلايتر المفضلين لهالسنة كانوا 3.. اول وحدة اورغلاس هي اضاءة وبودرة تثبيت بنفس الوقت لان على حسب الطريقة اللي تنحط تكون خفيفة ولا ثقيلة.. الدرجة اللي عندي لومينوس لايت لونها مثل ماتشوفون مشمشي واضاءتها خفييفة ماتبرق.. تمام للنهار
الاضاءة الثانية من ديو شارلوت تيلبري لونها ذهبي شامبين وهاادية بعد لمعتها مو قوية تناسب لكل الاوقات..
واخيراً ديور اللي درت عليها السبع دورات.. قوية للمناسبات والطلعات لونها صدفي ذهبي تهبببل
السواتشر حسب ترتيب الشرح
اما بالنسبة للبلاشرات والبرونزرات.. حبيت ثلاثة برونزرات بالاحرى آربعة بس ام اس اف ماك الدارك ضاع :( و آربعة بلاشرات
اول برونزر من ديو شارلوت تيلبري فيه حبات لمعة خفييفة يدوب يبين.. لونه فاتح يصلح ككونتور خفيف
الثاني كونتوري المفضل سكلبت من ماك تشوفون لونه بني مايل للرمادي بدون اي لمعة.. يناسب للكونتور سواء الوجه ولا الخشم
اللي بعده برونزر ماك اكسترا دايمنشن ديلفك من كولكشن ماك الصيفي.. مطفي على ستن ومع انه مايل للبدتقالي شوي بس عالبشرة يطلع وااايد حلوو جنه تان.
ذا بالم سيندي لو صايرة بين البرونزر والبلاشر.. لانه فيه شيمر خفيف فانا دايما ادمجه مع الكونتور المطفي والبلاشر، ماحب البرونزر بلمعة
واول بلاشر مفضل لي ماك من كولكشن ريهانا.. لونه بطيخي غامج وايد حلووو خصوصاً مع البرونزر
الثاني جينا من نارس مشمشي مطفي جميل
والثالث مود اكسبوشر من اورغلاس عجيييب لونه بلم يهبل على البشرة اعشقه ولو تلاحظون بدى يصير مسطح من كثر ما استخدمته.
السواتشز من اليمين لليسار بالترتيب:
مفضلاتي من الارواج والمحددات… آغلبها فوشي ونود مايلة للبلم والروز والوردي
بالنسبة للمحددات اكثر محدد حبيته لهالسنة محدد نيكد من اربان ديكاي لونه موف نود وااايد حلو احب استخدمه مع كل الارواج النود والبنفسجية او حتى بروحه يهبل
ثاني محدد ند حبيته هو موف من نكس لو تشوفونه شلون صار صغر من كثر مابريته ههههه.. لونه نود على موف بعد.. شبيه لاربان ديكاي بس ذاك كريمي اكثر.
المحددين الاثنين الباجين هم ماجينتا من ماك محدد فوشي مايل للبنفسجي احبه مع كل الارواج الفوشية، والثاني من دييقو ديلا بالما لونه وردي افتح من الفوشي رقمه 93 الحلووو فيه انه يناسب الدرجات الفاتحة يغمجهم بدون ماصير ميته، ويهدي الالوان الفاقعة.
اما الارواج اخترت ستة كلهم من ماك هههههه مو تحيز بس بصراحة ارواجي المفضلين يبقون من ماك.. حتى لو اشتري غيرهم وماركات هاي اند ما ارتاح الا لارواج ماك!
اول روج فلات اوت فابيولس الحب الحب احلى فوشي جربته الدرجة تهبل فوشيه فيها بوهة بنفسجي وكونه ريترو مات فيصير مطفي تاام جنه مخملي ولا ينشف.. رهيب وتكلمت عنه وااايد
الفوشي الثاني ليكابل من ماك.. لونه فوشي بس درجته مختلفة، فوشي بس بنفس الوقت عملي مب فاقع ولا قوي وايد.. احسه يحلي ويعطي الويه رونق لما يكون باقي المكياج وايد خفيف
الدرجات الثلاث الباقية كلهم فواتح ونود
فوكس لون نود بيبي بينك جداً جميل وهادي وعملي
ميستيكال لمتد لدشن نزل بكولكشن الصيف وانا الصراحةو عادتي استخدم لون لمتد بهالسخاء هههههه بس جميل! لونه روز متوسط.. احبه مع بلاشر بلم او برونز يطع جميييل
روج هوت التيتيود بعد لمتد لونه نود بينك فاتح وحلاته مع واحد من المحددات البلم اللي ذكرتهم فوق..
واخر روج بلامفل من ماك رغم انه لاستر بس لونه حلوووو مو شفاف.. لونه موفي على وردي، واايد عملي وجميل وحتى يصلح للتخلط
ترتيب السواتشز:
محدد دييغو، محدد نيكد، روج بلمفل، روج فوكس، روج فلات اوت فابيولس، روج ليكابل، روج هوت التيتيود، روج ميستيكال، محدد نكس موف، محدد ماك ماجينتا.
والحين دور مكياج العيون والسموحة نسيت اصور سواتشز بس تلاقونهم سهولة في النت
احلى باليتات اي شادو عندي ل2014 كانوا:
نيكد ون طبعاً.. الحب للآبد، توفيسد جوكلت بار.. عجيب هالباليت كفاية ريحة الجوكلت في الاي شادو! الوانه متنوعة بس عيبه انه شوي يتناثر يحتاج بيس كريمي، باليت ميت مات العجيييب لارم يكون عند كل وحده من ذا بالم جودة الشدوات رهيييبة والالوان كلها مطفية وعملية سواء بتستخدمينها بروحها ولا مع الوان ثانية للدمج! صج اللي ماعندها لازم تشتريه مابتندم، الباليت الثالث لوراك سكيني نود.. صغيرون هالباليت وفيه 7 درجات ترابية بين الغامج والفاتح، المطفي والشيمر يعني وااايد عملي،، بس يحتاج بيس قوي.
احسن بيس اي شادو عندي بينترلي من ماك كريمي بيج اول ماينحط عالجفن يتوزع ويجف الحلووو فيه انه يوحد لون الجفن يخليه بيج فيصلح للجفون الغامجة ويضبط مع كل الشدوات تقريباً.. الثاني من اسنز على رخص سعره بس ممتاز وبعد يوحد لون الجفن بلون بيج مصوفر بس اهم شي ماتحطين كمية وايد عشان مايخطط.
من الشدوات السنقل طبعاً بدون منازع شدوات ماك الاكسترا دايمنشن.. على اني ماحب اشتري شدوات سنقل بس ماك اكسترا دايمنشن مايتطوفون ملمسهم وثباتهم ولمعتهم رهيبة.
اكثر ماسكرتين حبيتهم سموكي لاش من ميكب فورايفر.. رهيبة تكثف وتطول، من زمان اسمع عنها وصج حبيتها لما جربتها، الثانية بيق لاشز البرتقالية من اسنز.. رخييصة بس عجيبة عجيبة ولا تتكتل.
وتكملة لمنتجات العين، الرموش اللي حبيتهم وايد هالسنة
من هدى بيوتي وتحديدا رقم واحد جيزيل.. بالنسبة لي واايد حلوين وطبيعيين وماحصلت شبيه لهم بمارك ثانية، اما الباجين جربت دقم 6 حلوو بس مب واو مثل رقم واحد وثقال.. ماجربت الباقي بس من تحربتي اقول انه رقم 1 من احسن الرموش اللي جربتهم اما رقم 6 عادي مستواه حلوو بس مو واااو
وبعد حبيت رموش رد جيري مثل رقم 43 ودبليو اس بي واعتقد 82، وايد حلوين وخفاف على العين (بالصص،ورة العلبة مكت،ب عليه 203 بس الرموش دبليو اس بي بس ضيعت علبتهم)
واخر نوع حبيته رموش خبيرة التجميل البحرينية ازهار حبيل.. ملمسهم طبيعي وكلش مايبينون فيك
اكثر شي مهم عندي بالرموش انهم يكونون خفاف على العين وان خط الرموش يكون ضعيف،، اذا الخط متين يحتاج ضمغ وايد واحس بثقل بعيني كلش ما ارتاح ابي اشيلهم باقصى سرعة!
وآخر شي في المفضلات.. الفرش! وما ادراك ما الفرش بصراحة كان اختيار صعب لان عندي فرش ما شاء الله هههههه
بس اخيرا استقريت على هالمجموعتين للوجه والعيون..
مجموعة فرش الوجه
للفاونديشن حبيت سيقما الكبوكي المدببة اف 86 والمدورة اف 82، حذي شغل الفرشة يكون مضبوط وتوصل للحنيات بسهولة
فرشة الكونتور من ريل تكنيكس من طقم الوجه.. ممتااازة هالفرشة مدورة وراسها صغير ترسم وتدمج خط الكونتور عدل.. وبعد تصلح للاضاءة
وللاضاءة حبيت فرشة شارلوت تيلبري شعراتها مدببة ومب اوفر ناعمة ولا خشنة.. صج عجيبة توزع حتى اصعب الاضاءآت مثل اضاءة ديور هالفرشة اكثر فرشة ضبطت معاها.. وتوزع وتدمج بسهولة
للبلاشر حبيت فرشتين، فرشة نارس ياتشي يو اليابانية.. فنانة للبلاشرات اللي ماتطلع بسهولة على الويه.. هالفرشة تشيل اللون وتوزعه عدل.. بصراحة سعرها غالي تقريباً 25 دينار بالشحن بس احبها واحسها تسوي لان احس بتدوم لي سنين، اما فرشة البلاشر الثانية فهي الفرشة الوردية من ريل تكنيك.. حجمها كبي نوعاً ما بس وااايد ناعمة فتوزع البلاش والبرونزر عدل ماتخافين انها بتحط وايد وبتصيرين جنج مهرج.
إخر فرشة فرشة الباودر الكبيرة من ماك عندي اياها من اكثر من سنتين نزلت بكولكشن الكوتور.. احبهااا كبيرة وتوزع اي شي تبينه على كل الويه عدل، اذا بغيت اوزع ستنق باودر لا لمسة برونزر نهائية على كل ويهي او لوز باودر
المجموعة الثانية فرش العين كان الاختيار اصعب من الويه لان صج عندي وااايد فرش عيووون!!
اول فرش حبيتهم للكونسيلر تحت العين وتنظيف تحت وحول الحاجب والبيس الكريمي.. واحيانا الكونتور الكريمي رغم استخدامي القليل له.
فرش سيجما الكبوكي للعين.. نفس فرش الويه حبيت المدببة بي 86 والمدورة بي 82، استخدمهم حتى لتوزيعات بيسات الايشادو الكريمية مثل بينترلي من ماك او حتى اللي نوعهم معصار مثل ذا بالم
بعدهم فرشة الحواجب طبعاً الحب آنستازيا رقم 18 بصوبين صوب فرشة حواجب وصوب مشط.. شعرها ممتاااز وتصلح للمنتجات الكريمية والباودر شعرها قصير ومتماسك تتحكمين فيها بالرسم بسهولة. للإي شادو حبيت فرشتين، من ماك للأي شادو مادري كم رقمها بس من نفس مجموعة الروز قولد مع فرشة الويه.. شعرها متماسك وقصير نوعا ما تصلح اذا ابي اللون مركز، والثانية فرشة الاي شادو من ايكو تولز بعد تحط اللون عدل ومايتناثر
لدمج الالوان طبعاً ملكة الدمج فرشة 217 من ماك.. على كثر ماستخدمت فرش دمج من ماركات مختلفة بس مافي مثل ماك 217.. تدمج الالوان بخفة بس اهم شي ماتزيدين الدمج ولا بتدش كل الالوان ببعضها وبيبقى لح لون واحد رماي باهت! دمجي الاطراف وبس..
فرشة ثانية لتركيز اللون بالكسرة ودمجه فرشة زويفا 231.. مدببة تشبه البنسل برش بس طويلة.. حلوة لدمج الالوان المطفية خصوصا الغامجة بالكسرة مثل البني المحروق والكحلي وهالالوان.. وتصلح لدمج الالوان تحت العين بعد، فرشتين ثانيين بغرض مشابه بس باختلاف الشكل شوي.. فرشة نادية زيد رقم 5 شوي اخشن من فرشة زويفا فتصلح لدمج الالوان المطفي واللي فيهم لمعة والثانية من سيجما اي 45 واايد تشبه فرشة نادية زيد بس ان شعرها في النهاية مدبب آكثر، احبها لزاوية العين الخارجية
لتحت العين سبق وقلت انا دايماً احب تحت عيوني يكون سموكي لان عيني واسعة ولما احط مكياج بدون ماحط تحت عيني احس عيوني فاهية وويهي كله عيون! فدايما احب احط كحل اسود قلم خط ضعيف تحت، وفوقه لون غامج متناسب مع اللوك وبعدين لون بني متوسط.. هاللونين آحطهم بفرشة نادية زيد رقم 2 مربعة شعرها قصير وضعيييفة تركز اللون تحت العين عدل عدل! وادمجهم كلهم بوحدة من الفرش الثلاث اللي ذكرتهم قبلها.
خلصنا من الآي شادو ومنطقة العين، لتحت العين احب ادمج الكونسيلر خصوصا لما يكون سائل بفرة من ايكو تولز شعرها واية ومدورة وشعرها صناعي تعطي مظهر الاير برش فناانة ويا المنتجات الكريمية، واخد شي فرشة ريل تكنيك الصغيرة هذي دقيييقة تصلح لما ابي ارسم تحت الحاجب خط بالكونسيلر واموهه،، وحتى لتنظيف حول الروج عشان يطلع مرسووم عدل.
وهني آختم بوست مفضلاتي لسنة 2014
ان شاء الله تكون المعلومات كافية ووافية!
وبغيت رايكم.. غيرت طريقة التصوير لاحظتوا؟؟ شرايكم فيها؟؟ وخليت الصور مربعة حسيتها اسهل عشان تكون موحدة في البلق وانستقرام
شاركوني ارائكم وملاحظاتكم وشنو عن منتجاتكم المفضلة؟ عندكم اشياء مشتركة معاي؟؟
![[ BLOGLOIN' ]](http://4.bp.blogspot.com/-Jf-STPrmUcU/VcrpOV3yT3I/AAAAAAAAHPk/eio0410HZyM/s1600/BlogLovin.JPG)
%2B(1).jpg)
No comments